Mar 7:1-23 | BxrBBL2024 | STEP | Иерусалимһаа хэдэн фарисейнүүд, Хуули заадаг зарим багшанар ерээд, Иисүүсые тойрон сугларба.

‏ Mark 7:1-23

(Мт 15:1-20)

1 Иерусалимһаа хэдэн фарисейнүүд, Хуули заадаг зарим багшанар ерээд, Иисүүсые тойрон сугларба. 2 Иисүүсэй зарим шабинарай гараа гуримай ёһоор угаангүй эдеэлжэ байхые тэдэ обёорбо. 3 Фарисейнүүд, бусадшье бүхы еврейнүүд хуушан заншалнуудаа наринаар сахижа, гар угаалгын тусхай ёһололгүйгөөр эдеэ хоолдо хүрэдэггүй байгаа. 4 Худалдаа наймаанай газарһаа юумэ асараад, өөһэдыгөө угаажа арюудхаагүй һаа, тэдэ эдидэггүй байгаа. Мүн тэдэ аяга шанагаа, амһарта табагаа, забьяануудаа, һандали һуудалнуудаа оро дэрээ угааха гэхэ мэтын ондоошье заншал гуримуудые сахидаг бэлэй.

5 Тиимэһээ фарисейнүүд, Хуули заадаг багшанар Иисүүстэ хандан:

– Шабинартнай юундэ үбгэ эсэгэнэрэймнай зааһан заншалнуудые сахинагүйб? Тэдэтнай яахадаа гараа угаангүйгөөр эдеэлнэб? – гэбэ. 6 Иисүүс харюудань хэлэбэ:

– Хоёр нюуртан! Таанар тухай лүндэншэ Исай үнэн сохомые уридшалан хэлээ һэн лэ: «Энэ улад зон хэлэ амаараа Намайе хүндэлнэ,
харин зүрхэ сэдьхэлдээ Нам тухай огто бодоногүй.
7 Хүнүүдэй зохёоһон ёһо гуримуудта һургажа байхадаа,
тэдэ дэмы Намда мүргэнэ даа».

8 Таанад Бурханай захяа заабаринуудһаа арсаад, хүнэй зааһан ёһо гуримуудые сахибат. 9 Таанад Бурханай захяа заабаринуудые гурим заншалнуудаараа арга мэхэтэйгээр һэлгэжэ шададаг байнат. 10 «Аба эжы хоёроо хүндэлэ», «Аба эжы хоёроо муушалһан хүн үхэлдэ хүртэхэ ёһотой» гэжэ Моисейгээр дамжуулан Бурхан хэлэһэн байгаа. 11 Харин таанад эхэ эсэгэдээ туһалха юумэтэй байгаад, «Энэшни Корбан», ондоогоор хэлэбэл, Бурханда үргөөтэй юм гэхэнь зүб гэжэ зониие һургахадаа, 12 аба эжыдээ ямаршье туһа бү хүргэгты гэжэ һурганат. 13 Тиигэжэл таанад Бурханай захяа заабариие өөһэдынгөө тогтооһон ёһо заншалаар һэлгэнэт, тиин үшөөшье олон иимэрхүү юумэнүүдые таанад үйлэдэжэ байдагта.

Ямар юумэнүүд хүниие бузарланаб?

14 Иисүүс дахин улад зониие Өөртөө дуудажа хэлэбэ:

– Хүн бүхэн хэлэһыемни шагнажа, ойлгохые хэшээгты! 15 Гаднаһаа досоотнай орожо байһан юумэн таниие бузарладаггүй. Харин досооһоотнай гаража байһан юумэн таниие бузарладаг ^{▼▼ Зарим эхэ бэшэгүүдтэ иимэ хэһэгээр үргэлжэлэгдэдэг: 16 Шэхэтэй юм һаа, анхарагты.}.

16 – 17 Иисүүсэй улад зониие орхёод гэртэ ороходонь, хэлэһэнээ манда тайлбарилжа үгыт гэжэ шабинарынь гуйба.

18 – Хэлэһыемни хэнтнайшье мүнөө болотор ойлгоогүй гээшэ гү? Гаднаһаа зосоотнай ороһон ямаршье юумэн үнэндөө таанадые бузарлажа шадахагүй, 19 юундэб гэхэдэ, тэрэ юумэн танай зүрхэндэ ороно бэшэ, харин танай хотондо ороод, һүүлдэнь бэеһээтнай гаргагдадаг ха юм. (Иигэжэ хэлэхэдээ Иисүүс ямаршье эдеэ хоолые эдихэдэ зохихо юм гэжэ батална гээшэ.)

20 Тиигээд Иисүүс үргэлжэлүүлбэ:

– Досооһоотнай гарадаг юумэн таанадые бузарладаг. 21 Досоотнай, һанаа зүрхэндэтнай нүгэлтэ хүсэлэнгүүд түрэжэ, таанадые ташаяангы ябадалда хүргэдэг, хулгай хүүлэдэг, алаха хюдаха, 22 эрэдээ гү, али эхэнэртээ урбаха тээшэ түлхидэг, хомхой сэдьхэлтэй, хара һанаатай болгодог, худал хуурмаг, зальхай ябадал, атаа жүтөө түрүүлдэг, хэрүүл ама, бардам зан, тэнэг ааша гаргадаг. 23 Эдэ бүхы нүгэлтэ юумэнүүд досооһоотнай гараад, таанадые бузарладаг юм.