‏ Matthew 24:1-14

(Мк 13:1-13; Лк 21:5-19)

1Иисүүс Һүмэһөө гараад ябаба. Тиихэ үедэ шабинарынь Тэрэнэй анхарал Һүмын барилгануудта хандуулха зорилготойгоор хажуудань ерэбэ. 2Иисүүс шабинартаа:

– Эдэ бүгэдые харана гүт? Энэ һууринда ганса шулууншье үлэхэгүй; баран һандаргагдаха гэжэ танда хэлэнэб, – гэбэ.

Тудаха бэрхэшээл зоболонгууд тухай һэргылэмжэ

3Хожомынь Иисүүсэй Элеон хада дээрэ гараад һуухадань, шабинарынь Тэрээндэ ерээд:

– Эдэ бүхы юумэн хэзээ болохоб, хэлэжэ үгыт. Танай заларжа ерэхэдэ, газар дэлхэйн хосорходо ямар дүлгэ тэмдэгүүд харуулагдахаб? – гэжэ асууба.

4Иисүүс тэдэндэ харюусаба:

– Хэн нэгэнэй мэхэдэ орохоһоо болгоомжолжо байгты. 5Юуб гэхэдэ, олон хүнүүд Минии нэрые зүүжэ ерэхэ: «Би Бурханай табисууртаб», – гэжэ өөһэд тухайгаа гэршэлхэ, тиигэжэ олонииетнай мэхэдээ оруулха. 6Мүн байлдаанууд тухай, дайн сэрэг тухай һураг дуулахат, теэд бү айгаарайгты. Тиимэрхүү юумэнүүд болохо ёһотой. Зүгөөр энэнь үшөөл эсэс бэшэ байха. 7Нэгэ арад нүгөө арадтаа добтолон орохо, хаан оронууд хоорондоо хёморолдон тэмсэхэ, эндэ тэндэ үлэсхэлэн зоболон, үхэл тахал дэлгэрхэ, газар ехээр хүдэлхэ. 8Зүгөөр эдэ бүхэн бэрхэшээл зоболонгуудай эхииень лэ табиха. 9Тэрэ үедэ таанарые барижа хааха, тамалха, алаха. Минии түлөө таанадые бүхы арадууд үзэн ядаха. 10Тиихэдэ олониинь һүзэгһөө арсаха, бэе бэедээ урбаха, бэе бэеэ үзэн ядаха. 11Баһа олон хуурмаг лүндэншэд бии болохо, олон уладай толгой эрьюулэн мэхэдээ оруулха. 12Тиигэжэ нүгэл шэбэлэй элбэгжэн дэлгэрхэдэ, олон зоной хайра дуран хүйтэрхэ. 13Зүгөөр эсэстэнь хүрэтэр тэсэжэ гараһаниинь абарагдаха. 14Бурханай хаан түрэ тухай Һайн мэдээсэлэй бүхы газар дэлхэйгээр, бүхы арадуудта гэршэлэгдэн номногдоһон хойно эсэс болохо.
Copyright information for BxrBBL2024