‏ Matthew 8:5-13

Иисүүс зуунай даргын зарасые эдэгээбэ

5Иисүүсэй Капернаум хото орожо байхадань, зуунай нэгэ дарга Тэрээндэ ойртожо, туһалхыень гуйба:

6– Эзэн, аа! Минии зараса саа үбшэндэ даруулагдаад, гэртээ тулижа хэбтэнэ, – гэбэ.

7– Зай, Би ошоод, тэрээнииешни эдэгээхэб, – гэжэ Иисүүс харюусаба. 8Тиихэдэнь зуунай дарга иигэжэ хэлэбэ:

– Ай, эзэн! Таниие гэртээ урижа оруулхаар бэшэ ахир дорой амитанби. Гансал зарлигаа буулгажа хайрлыт даа, тиигэбэлтнай зарасамни эдэгэшэхэл. 9Ушарынь хэлэбэл, бишье баһал дээрээ ноёдтой, мүн мэдэлдээ сэрэгшэдтэй хүнби. Тэдэнэйнгээ нэгэндэнь: «Ошо» гэхэдэм ошодог, нүгөөдэдэнь: «Ерэ» гэхэдэм ерэдэг, зарасадаа: «Тэрээниие хэ» гэхэдэм хэдэг юм.

10Иисүүс энээниие дуулаад, ехээр гайхаба, тиигээд хойноһоонь ябаһан зондо:

– Би израильшуудайшье дунда иимэ һүзэг этигэлтэй хүниие үзөөгүйб гэжэ таанадта үнэниие хэлэнэб, – гэбэ. 11– Тэрээнһээ гадна зүүн, баруун зүгһөө олон зон ерэжэ, Огторгойн хаан орондо Абраһаамтай, Исаагтай, Яковтай зэргэлээд, найрай шэрээдэ һууха. 12Харин хаан орондо орохо ёһотой байгаад, орохоёо арсаһан хүнүүд харанхы бүрэнхыдэ хаягдаад, уйлаха бархиралдаха, шүдөө хабиралдаха.

13Тиигээд Иисүүс зуунай даргада:

– Ши гэртээ хари, шинии этигэдэгэй ёһоор лэ болохо, – гэжэ хэлэбэ. Тиигэжэ хэлэхэтэйнь сасуу зуунай даргын зараса эдэгэшэһэн байгаа.
Copyright information for BxrBBL2024