Mic 1 | CheCAC2012 | STEP | ЯхӀуд-мехкан паччахьаша – Йовтама, Ахьаза, Хьузакх-ЯхӀус – паччахьалла дечу хенахь Муршат-юьртара волчу Мика-ЯхӀуга Везачу Элера хаам кхечира. Оцу хаамехь Мика-ЯхӀуна дӀаделладелира Шамран а, Ярушалайм а цӀераш йолчу гӀаланех хиндерг.

a ТӀаьххьарнаш 15:32-38; 2 Шерашкахь 27:1-7; ТӀаьххьарнаш 16:1-20; 2 Шерашкахь 28:1-27; ТӀаьххьарнаш 18:1–20:21; 2 Шерашкахь 29:1–32:33.

‏ Micah 1

Везачу Эло Мика-ЯхӀуга хаам бар

1 ^aЯхӀуд-мехкан паччахьаша – Йовтама, Ахьаза, Хьузакх-ЯхӀус – паччахьалла дечу хенахь Муршат-юьртара волчу Мика-ЯхӀуга Везачу Элера хаам кхечира. Оцу хаамехь Мика-ЯхӀуна дӀаделладелира Шамран а, Ярушалайм а цӀераш йолчу гӀаланех хиндерг.

Шамран а, Ярушалайм а гӀаланех болу тийжам

2 ЛадогӀа массо а халкъаша,
тергам бе лаьтто а, цунна тӀехь мел долчо а!
Шуна дуьхьал теш хуьлийла сан Хьалдолу Эла,
Шен дезачу цӀийнера волу Веза Эла!
3 ХӀунда аьлча Шен езачу меттигера араволуш ву Веза Эла.
Охьа а ваьлла, лаьттан лакхенаш хьоьшур ю Цо –
4 Цунна кӀелахь лаьмнаш дешар ду,
цӀергахь лела балоз санна,
уьш тогӀеш чу текхар ду,
гуна тӀера охьадогӀу хи санна.

5 Якъубан тӀаьхьенан аьрхалла а, Исраилан халкъо летийна къинош бахьана долуш ду и дерриге а. ХӀун бахьаница ю Якъубан тӀаьхьенан аьрхалла? Шамран-гӀалица йоьзна юй те иза? ХӀун бахьаница бу ЯхӀуд-махкахь цӀушна сагӀа доккху гунаш? Ярушалаймаца доьзна-м дац те иза? 6 Везачу Эло боху: «Иза бахьана долуш Ас Шамран-гӀаланах саьлнаш йийр ю аренгахь, кемсаш лелон бен пайден хир яц и меттиг. Ас цуьнан тӀулгаш тогӀи чу кхуьссур ду, цуьнан баххаш гучу а дохуш. 7 Дерриге а цуьнан Ӏамал еш долу суьрташ дохор ду. Сийсаза леларна делла долу совгӀаташ цӀергахь дагор ду. Ас цуьнан массо а цӀуш бохабойтур бу. ЦӀуйн дуьхьа лелаш долчу кхахьпаллина цо совгӀаташ схьаэцарна, кхахьпаллина уьш кхин а дӀалур ду».

8 Юха Мика-ЯхӀус элира: «Со цунна воьлхур а ву, тийжар а ву, когаш Ӏуьйра а, верзинаваьлла а лелар ву со. Со, чангӀалкх санна, угӀур ву, бухӀа санна, воьлхур ву, 9 хӀунда аьлча Шамранан чевнаш йоьрзур йолуш яц. Изза ЯхӀуд-махкана а дӀакхаьчна. Ур-атталла сан халкъан кевне, Ярушалайме а, кхаьчна иза».

МостагӀа Ярушалаймана тӀевогӀу

10 Иза Гати-гӀалахь ^{▼▼Гати... Байт-Ӏапру – кхузахь ирони ю. Оцу аяташкахь пайхамаро дуьйцу цхьайолчу гӀаланех а, яртех а лаьцна. Церан шатайпа цӀераш яра, ткъа и цӀераш шайн-шайн маьӀнаш долуш ю.} дӀа ма кхайкхаделаш, цигахь хозуьйтуш ма делхалаш (Гати – «кхайкхо» бохург ду). Амма Байт-Ӏапру олучу юьртахь шайна тӀе чан тасалаш (Ӏапру – «чан» бохург ду). 11 Эхь дайна, берзинабевлла болу Шапир-гӀалин бахархой, керлачу метте дӀакхалха. Цаинунехь бехаш берш а дӀабовдалур бац. (Цаинун – «довда» боху маьӀна долуш ду). Байт-Эцал-юьртахь дечу белхаро шу цигахь соцуьйтур дац. 12 Марут-гӀалин бахархой шайна гӀо даре сатесна бу, хӀунда аьлча Везачу Элера болу бохам Ярушалайман кевне кхаьчна (Марут – цуьнан «къаьхьа» бохург ду). 13 Лахиш-гӀалин бахархой, чехка говраш дӀайожа гӀудалкхана (Лахиш – цуьнан маьӀна «гӀудалкх» бохург ду). Шу Ярушалайман бахархойн къинойн юьхьиг ю, хӀунда аьлча шуна тӀера дӀадоладелла Исраилан халкъан зуламаш. 14 Иштта аша Муршат-Гати-гӀала совгӀаташ дӀакхоьхьуьйтур ду, амма Ахзиб-гӀала Исраил-мехкан паччахьаш Ӏехорна хир ю (Муршат – цуьнан маьӀна «зудчух луш болу там» бохург ду).

15 Марешера бахархой, Ас шу мостагӀчун кара дӀалур ду (Мареш – цуьнан маьӀна «толамхо» бохург ду). Исраилан халкъан куьйгалхой, бевдда, Ӏадулам-хьехана чохь къайлабевр бу. 16 Дукха дезачу шайн берашна шаьш гӀайгӀанехь хиларна, шайн коьртара месаш дӀаяша. Шу долчуьра уьш махках бохург хиларна, ломъаьрзунан санна, шайн кортош дерзина даха.