Psa 72 | CheCAC2012 | STEP | Асайпан назма. Мел дика ву Дела Исраилан халкъаца, дог цӀена болчаьрца!

‏ Psalms 72

КхоалгӀа тептар

(72–88)

Делан нийсо

1 ^{▼▼ Корта 72 (Грекийн) – Ӏебархойн меттан тептар тӀехь: 73.} Асайпан назма. Мел дика ву Дела Исраилан халкъаца,
дог цӀена болчаьрца!
2 Амма сох лаьцна аьлча, сан ког шарша гергга бара,
некъа тӀехь гӀулч а йоккхуш, галвала со гергга вара.
3 Ӏесачеран аьтто балар сайна гича,
дозаллаш дечаьрга сан хьагӀ хуьлура.

4 Шаьш дӀакхалххалц цара баланаш а ца хьоьгу,
церан догӀмаш могуш а хуьлу ^{▼▼Я иштта: Цара баланаш а ца хьоьгу, уьш могуш а, ницкъ болуш а хуьлу.}.
5 Адамийн гӀайгӀанашкахь цара дакъа а ца лоцу,
кхиболчу наха санна, цара гӀело а ца хьоьгу.
6 Цундела, коча ухкучу туьтеша санна,
куралло дӀалаьцна уьш,
тӀедухучу духаро санна,
къизалло дӀахьулбина уьш.
7 Берстина хьера а бевлла, къинош летадо цара,
церан дегнаш чохь йолу ойланаш мекара ю.
8 Кхардамца кхечарах лаьцна вон къамелаш до цара.
Дозаллаш дарца нахана гӀело яран ойланаш йо цара.
9 Цара шайн баганаш стигалшка хьала а йохуьйту,
церан меттанаш лаьттахула дӀаса а даьржа.
10 Цундела цара дечунна тӀедоьрзу Цуьнан халкъ а,
цара лелочух кхоччуш ша дуза а деш.
11 Цо олу: «Далла и муха хуур ду?
Веза Воккхачунна иза хуийла а дуй те?»
12 Иштта бу и Ӏесанаш!
Цхьана а хӀуманан гӀайгӀа ца ешшехь,
церан хьал алсамдолу.

13 Ас сайн дагахь элира: «ТӀаккха аса сайн дог цӀандар а,
сайн куьг цӀена леладар а эрна хилла те?
14 Дийнахь сарралц соьга Ӏазап а хьоьгуьйту,
хӀора Ӏуьйранна суна таӀзарш а дойту».

15 Ткъа: «Ас цу тайпана къамел дийр ду», – ас аьллехьара,
Хьан берийн тӀаьхьенна хьалха со бехке хир вара.
16 Ас ойла йора, со цунах муха кхетар вара те бохуш.
Амма суна цунах кхета хала дара,
17 Делан цӀийнан керта а вахана,
Ӏесачеран кхолламах со кхетталц.

18 Бакъду, ког шершачу меттиге дӀа а хӀиттийна,
Ахь уьш тӀепаза бойуьйтур бу.
19 Ма сиха хӀаллакьхуьлу уьш,
къемат тӀедарца чекхбовлу уьш.
20 Самабевлча, дӀадовш долу гӀан санна хуьлу уьш, Хьалдолу Эла.
Сама а ваьлла, царах хилларг а дицдийр ма ду Ахь.

21 Сан дог гӀайгӀане хиллачу хенахь,
сан са карзахдаьллачу хенахь,
22 сонта а вара, кхеташ а вацара со.
Хьуна хьалха бежана санна вара со.
23 Амма гуттара а Хьоьца ву со.
Ахь аьтту куьйга дӀалоцу со.
24 Хьайн хьехарца дахарехь дӀанисво Ахь со,
цул тӀаьхьа Хьайн сийлалле дӀаоьцур ву Ахь со.
25 Хьо воцург мила ву суна стигалахь?
Хьо воцург цхьа а ца оьшу лаьттахь.
26 Сан дегӀ а, сан дог а ца мегачу даьллехь а,
Дела – сан деган чӀагӀо а ю,
абаденналц сан дакъа а ду.

27 ХӀунда аьлча шаьш Хьуна гена бохурш хӀаллакьхуьлу.
Хьайна тешаме воцу хӀорра а Ахь хӀаллакво.
28 Ткъа сох лаьцна аьлча, суна-м дика ду Далла гергахь хилар.
Со ларваран меттиг йира ас Хьалдолчу Элах.
Хьан дерриг а гӀуллакхаш ас дӀакхайкхор ду.