Psa 84 | CheCAC2012 | STEP | Эшарш локхучу тобанан куьйгалхочуьнга: Кхорахьан тӀаьхьенан назма.

‏ Psalms 84

Къомана диканиг дар доьхуш долу доӀа

1 ^{▼▼ Корта 84 (Грекийн) – Ӏебархойн меттан тептар тӀехь: 85.} Эшарш локхучу тобанан куьйгалхочуьнга: Кхорахьан тӀаьхьенан назма. 2 Веза Эла! Хьайн махкана диканиг дина Ахьа,
Якъубан тӀаьхье юхаметтахӀоттийна Ахьа.
3 Хьайн халкъан зуламна геч а дина Ахьа,
церан къинош къайла а даьхна Ахьа,
4 Хьайн оьгӀазвахар а Ахьа дӀадаьккхина,
Хьайн къизачу дераллех а Хьо дӀавирзина.

5 Дела, тхан КӀелхьардохург, тхо юхаметтахӀиттадехьа,
тхуна тӀехь йолу Хьайн дералла дӀаяккхахьа.
6 Массо а ханна ю те Хьан оьгӀазалла,
тӀаьхьенашкара тӀаьхьенашка а хир ю те Хьан оьгӀазалла?
7 Тхо юха дендийр дац те Ахьа,
Хьайн халкъ юха а Хьо бахьана долуш доккхадейта?
8 Гайтахьа тхуна, Веза Эла, Хьайн хедар боцу безам,
Хьайн кӀелхьардаккхар а лохьа тхуна.

9 ЛадугӀур ду аса Везачу Дала бохучуьнга.
Цо машар бийр бу Шен халкъаца, Шена тешаме болчаьрца,
юха а тила ма лойла уьш.
10 Цунна хьалха ларамах буьзна берш
Цо кӀелхьарбахар герга ду,
Цуьнан сийлалла вайн лаьттахь хилийтархьама.

11 Безам а, тешаме хилар а вовшахкхетар ду,
нийсоно а, маршоно а вовшашна барташ дохур ду.
12 Тешаме хилар лаьттара хьаладер ду,
нийсо стигалара схьа охьахьоьжур ю.
13 Везачу Эло беркат лур ду,
ткъа лаьтто шен стом кхиор бу.
14 Нийсо Цунна хьалхаяьлла лелар ю,
цо Везачу Элана некъ кечбийр бу.