Psa 90 | CheCAC2012 | STEP | Веза Воккхачун тхов кӀелахь вехаш верг Нуьцкъалчун ӀиндагӀехь Ӏаш ву.

‏ Psalms 90

Вай лардеш волу Дела

1 ^{▼▼ Корта 90 (Грекийн) – Ӏебархойн меттан тептар тӀехь: 91.} Веза Воккхачун тхов кӀелахь вехаш верг Нуьцкъалчун ӀиндагӀехь Ӏаш ву.
2 Цо олу Везачу Эле: «Хьо сан гӀап а, ха а ду,
сан дегайовхо Хьайца йолу Дела а ву!»
3 Цо кӀелхьарвоккху хьо мостагӀчун гурах а,
лечу цамгарх а.
4 Шен тӀемашца дӀахьулвина, Цо Ӏалашвийр ву хьо.
Цуьнан тешаме хилар ду хьан турс а, дуьхьало а.
5 Буьйсанна хуьлучу Ӏадорах а,
дийнахь кхоьссинчу пхарах а кхоьрур вац хьо,
6 боданехь лелачу уьнах а,
делкъехь кхетачу цамгарх а кхоьрур вац.
7 Хьуна гонах эзар а,
аьтту агӀор итт эзар а вожа мега,
амма хьуна Ӏожалла тӀейогӀур яц.
8 Хьайн бӀаьргашца гур ду хьуна
зуламечу нахана таӀзар хуьлуш.

9 Везачу Элах хьайн гӀап йина ахь.
Веза Воккханиг хьайн Ларвийриг хаьржина ахь.
10 Хьуна вон болх а хир бац,
цамгар хьан цӀенна улло а йогӀур яц.
11 ^bВезачу Эло Шен маликашна тӀедуьллур ду
массо а хьан некъашкахь хьо ларвар.
12 ^cЦара куьйгаш тӀехь дӀахьур ву хьо,
хьан ког тӀулгах а ца тасаболуьйтуш.
13 ^dЛом а, лаьхьа а хьошур ду ахь,
лоьман кӀорни а, текхарг а эшор ду.
14 Везачу Эло олу: «Со везарна кӀелхьарвоккхур ву Ас иза,
Ӏалашвийр ву Со ларарна.
15 Сайга кхайкхахь, жоп лур ду цунна.
ГӀайгӀанехь Со цуьнца ву.
Ас иза паргӀат а воккхур ву,
цуьнан сий а дийр ду.
16 Цуьнан дахар деха а хуьлуьйтур ду,
цунна кӀелхьарвалар а лур ду».