Psa 87 | CheCAC2012 | STEP | Кхорахьан тӀаьхьенан назма. Эшарш локхучу тобанан куьйгалхочуьнга: Ӏезарахьахо волчу ХӀайманан хьехаме йолу хӀара назма «Махьалат Лаунат» олучу мукъамехь лакха езаш ю.

‏ Psalms 87

ГӀо доьхуш бина тийжам

1 ^{▼▼ Корта 87 (Грекийн) – Ӏебархойн меттан тептар тӀехь: 88.} Кхорахьан тӀаьхьенан назма. Эшарш локхучу тобанан куьйгалхочуьнга: Ӏезарахьахо волчу ХӀайманан хьехаме йолу хӀара назма «Махьалат Лаунат» олучу мукъамехь лакха езаш ю. 2 Веза Эла, сан кӀелхьарваларан Дела!
Хьоьга кхойкху со дийнахь а,
Хьуна хьалха ву со буса а.
3 Хьан юьхь-дуьхьал дӀакхочийла хӀара сан доӀа.
ЛадогӀахьа хӀокху сан орца даккхаре.

4 ХӀунда аьлча сан дог баланех хьаладуьзна,
ткъа дахар эхартана уллохь ду.
5 Со кошана уллохь болчу нахаца дӀанисвелла.
Со гӀора доцу стаг хилла дӀахӀоьттина.
6 Со беллачу нахана юкъахь волуш санна ву,
со вийна Ӏуьллу стаг санна ву,
Хьуна дага а ца вогӀуш,
Ахь гӀо дечуьра дӀа а ваьлла.
7 Ахь со эхартан саьнгар чу виллина,
бодане, бух боцучу Ӏин чу тесна.
8 Язъелла суна тӀехь Хьан дералла,
Хьайн ерриге а тулгӀенашца хьаьшна Ахьа со.

9 Ахь сан доттагӀашка а со витийтина,
царна хьалха маьттаза вина дӀахӀоттийна Ахьа со.
Со чохь Ӏаш ву, аравала йиш а яц сан.
10 Сан бӀаьргаш дукха велхарна лозуш бу.
ХӀора дийнахь со Хьоьга кхойкхуш ву,
сан куьйгаш Хьоьга дӀакховддийначохь лаьтташ ду.

11 Беллачарна лерина ду ткъа Хьан тамашийна гӀуллакхаш?
Я белларш, хьала а гӀевттина, Хьуна хастамаш беш хир бу?
12 Хьан хедар боцучу безамах лаьцна коша чохь дуьйцуш хир ду ткъа?
Я Хьан тешаме хиларх лаьцна талхаран меттехь дуьйцуш хир ду ткъа?
13 Ахь дина тамашийначу гӀуллакхех лаьцна боданечу меттехь хуур ду ткъа?
Бицбеллачеран дуьненахь Хьан нийсонах лаьцна хуур ду ткъа?

14 Амма со, Веза Эла, Хьоьга кхойкхуш ву,
сахуьлучу хенахь ас сайн доӀа Хьуна хьаладоуьйту.
15 Веза Эла, со хӀунда дӀатоьтту Ахь?
Сох хӀунда йоху Ахьа Хьайн юьхь къайла?
16 Ас жимачу хенахь дуьйна гӀело а хьоьгу, Ӏожаллина уллохь а ву со.
Хьан къематаш а хьоьгуш, со дог доьхна ма ву.
17 Хьан дералла суна тӀехула йоьдуш ю.
Хьан бохамаша со хӀаллаквеш ву.
18 Дийнахь сарралц цара, тӀехдогӀучу хино санна, суна го бо,
цара со массо а маьӀӀера дӀа а хьулво.
19 Ахьа суна уллора сан гергарнаш а, доттагӀий а дӀабаьхна.
Сан накъост санна болу бода бен, стаг а ца висна.