‏ Job 15

1Теманхо волчу Элипаза жоп делира Аюбана: 2«Хьекъал долчо эрначу хабаршца жоп лур дара те?
Мохан даьссачух хьо санна волчо шен кийра бузур бара те?
3Пайдабоцучу дешнашца цо ша бехказавоккхур вара те?
Цхьанна а мехала ца хуьлучу къамелашца иза къийсалур вара те?
4Амма ахь ур-атталла нехан суьпалла жим а йо,
адамо Деле доӀа дарна ахь дуьхьало а йо.
5Хьо къилахь хиларо Ӏамайо хьан бага.
Хьайн лаамца хӀилланчийн мотт буьйцу ахь.
6Со вац хьуна кхел йийриг, хьан бага ю,
хьан матто хьуна дуьхьал тоьшалла до.

7Адамашна юкъахь хьо дуьххьара кхоьллина ву моьтту хьуна,
я лаьмнел а хьалха хьо вина ву моьтту хьуна?
8Стигаларчу гуламехь Делан ойланашка ладуьйгӀирий те ахь?
Я дерриг а хьекъалалла хьуна кхаьчна те?
9Тхуна ца хуург хӀун ду хьуна хууш?
Тхо ца кхеттачух стенах кхетта хьо?
10Тхуна юкъахь къежбелла баккхийнаш бу,
ткъа уьш хьан дел а баккхий бу.

11Ца тоьу те хьуна Делера долу синхьаамаш,
хьайца кӀеда деш долчу къамелах тоам ца бо те ахьа?
12Стенна даьлла те хьан дог цу тайпана карзах?
Стенна бу те хьан бӀаьргаш, ткъес санна, къегаш?
13Хьайн са Далла дуьхьал хӀунда доккху те ахьа,
хӀунда дуьйлуьйту ахьа хьайн багара и тайпа къамелаш?

14 ^aАдам хӀун ду, Далла хьалха ша цӀена хилалур ду мотта?
Зудчо винарг мила ву, Далла хьалха ша бакъ хилалур ву мотта?
15Дела Шен дезачу маликех а ца теша,
Цунна хьалха стигалш а цӀена яц.
16Ткъа дегаза а, телхина а долу адам мила ду,
хи молуш санна, вонаш деш лелаш долу?

17Соьга ладогӀа, тӀаккха ас иза туьдур ду.
Сайна гинчух лаьцна ас хьоьга дуьйцур ду.
18Хьекъалалла долчара дийцинчух а,
цара шайн дайшкара хезнарг, хьул а ца деш,
дийцинчух лаьцна а хаам бийр бу аса хьоьга.
19Вайн дайшна бен дӀаделла ца хилла латта,
хийра нах царна юкъахь лелаш а ца хилла,
цундела дайшкара дерг цӀена а, нийса а ду.

20Ша мел вехачу деношкахь Ӏесаниг баланехь хьийза.
Къизачу стагана билгалдаьхна шераш дагардина ду.
21Къематечу маьхьарийн аз хуьлу цуьнан лерехь хезаш.
Машар лаьттачу хенахь талорхой цунна тӀелета.
22Боданах кӀелхьарваларе цо са ца туьйсу,
даим а шена хьалха цунна гуш дерг тур ду.
23Иза дӀасаоьхуш лела, ломъаьрзуна кхача а хуьлий ▼

▼Грекийн гочдар тӀехь: Иза дӀасаоьхуш лела, ломъаьрзуна кхача а хуьлий. Ӏебархойн тептар тӀехь: Иза дӀасаоьхуш лела, шена кхача а лоьхуш.

,
цунна хууш ду боданан де тӀекхаьчнийла.
24Саготтоно а, синӀаткъамо а иза Ӏадийна латтаво,
тӀамца вогӀу паччахь санна, тӀегӀерта уьш цунна.

25И шадерг а цо Далла дуьхьал куьг айина хилар бахьана долуш ду,
Нуьцкъалчунна дуьхьал иза валар бахьана долуш ду.
26Курра дуьхьалволура иза Цунна,
ша ларвархьама деза турс а даьккхина,
27иза шех тоам бина волу дела а,
дозаллина севсина волу дела а.

28Иза йохийначу гӀаланашкахь вехаш ву,
адамаш чохь даха ца дезачу,
охьаэга кийча долчу цӀенош чохь.
29Иза дукха ханна хьал долуш хир вац,
цуьнан бахам а буьсур бац,
лаьтта тӀехь цуьнан долахь дерг алсамдер дац.
30Иза боданах кӀелхьарвалалур вац.
ЦӀеран алуно патарш дакъош долу
дитт санна, хир ву иза,
ткъа Делан Ӏаьнаро иза дӀавоккхур ву.
31Эрна долчух тешна Ӏаш ма хуьлийла иза,
цунах ша Ӏеха ма войла цо,
хӀунда аьлча эрналла цуьнан ял хир ю.
32Шен дахар чаккхенга дерзале, иза дакъаделла,
цкъа а сенделла дӀагӀур доцу га санна, хир ву.
33Хилаза йолу кемсаш охьаоьгу кемсийн таьлланг санна, хир ву иза,
я шен заза дожош долу зайт-дитт санна, хир ву.
34Ӏесачийн тобанарчун тӀаьхье хир яц, ткъа
кхаьънех доьгӀна цӀенош цӀаро дагор ду.
Шайн даг чохь вониг а кхуллу,
цара зулам дӀа а хӀоттадо.
Ӏесачеран кийрано мекарло йоккху».
35

Аюб

‏ Job 16

1Аюба цунна дуьхьал жоп делира: 2«И саннарг суна дуккха а хезна,
шун догъэцаро вон бен ца дахьа.
3Хир юй те пайда боцучу къамелийн чаккхе?
Иштта хабар деш хьо иракарахӀоттош дерг хӀун ду?
4Аса а дуьйцур дара хӀинца аша санна,
шу сан метта хилча,
соьга а далур дара хаза къамелаш,
кхардарца шуна дуьхьал корта а лестош.
5Аса а сайн маттаца шу чӀагӀдийр дара,
сан багахула даьллачо шуна синтем а бийр бара.

6Со вистхилча а, сан бала дӀа ца болу,
вист а ца хуьлуш со Ӏийча а, иза лах ца ло.
7Дала сан тӀаьххьара гӀора дӀадаьккхина.
Сан берриг а доьзал Цо бохийна-кх.
8Цо со схьа-ма-лаьцна,
ткъа иза суна дуьхьал тоьшалла ду.
Сан гӀора дайна хилар суна дуьхьалдаьлла,
сох бехкаш а дохуш.

9Делан оьгӀазлоно со цоьсту,
Шен цергаш суна хьекха а еш,
Цо соьца мостагӀалла леладо.
Сан МостагӀчо Шен ира хьажар суна тӀедерзадо.
10Адамаша шайн баганаш суна дуьхьал гӀаттийна,
дов дарца сан беснеш тӀе етта цара,
уьш массо а суна дуьхьалбовлу.
11Дала со вочу адамийн кара дӀавелла,
Ӏесачеран буьйна со дӀа а кхоьссина.
12Со синтеме Ӏаш вара, амма со кагвира Цо.
Вортанна тӀера схьа а лаьцна, со войра Цо.
Со Шен гӀакх санна вина дӀахӀоттийра Цо.
13Цуьнан пхерчий массо а маьӀӀера схьадетталуш ду,
Цо сан жаннех къа ца хеташ Ӏуьтту,
сан стим а лаьтта тӀе охьаӀанийна.
14Со пен болуш санна, юх-юха со вохош ву Иза.
ТӀемало санна, суна тӀеуьду Иза.

15Аса сайн чкъурана сингаттаман бедарш а тегна,
гӀора а дайна, дог доьхна чена юккъе охьа а хиъна.
16Велхарна сан юьхь цӀийелла,
сан бӀаьргаш тӀехь Ӏожаллин ӀиндагӀ ду.
17Иза иштта делахь а, сан куьйгаша цхьанна а
ницкъ ца бина, сан доӀа цӀена ду.

18Латта! Ма даккхахьа сан цӀий къайла!
Ас хьоькху мохь къайлаха дӀахьулбина ма хуьлийла!
19 ^cДелахь а, стигалахь сан Теш ву,
лакхахь ву суна ТӀехӀуттуш верг а!
20Сан юкъалеларг суна доттагӀа хилла дӀахӀоьттина,
Деле а хьоьжуш, ас бӀаьрхиш Ӏенадечу хенахь.
21Стеган дуьхьа цо Деле доьху,
адамо шен доттагӀчун дуьхьа ма-деххара.
Сан дахаран шераш чекхдовлуш ду,
юха ца воьрзучу новкъа волуш ву со».
22

‏ Job 17

Аюба кхидӀа а элира: 1«Сан дог доьхна лаьтта,
чекхдовлуш ду сан денош,
со кошан йистехь лаьтташ ву.
2Сох кхаьрдаш берш суна гонах лаьтта,
сан бӀаьргаш церан мостагӀалла ган дезаш бу.
3Дала дезарг дӀалохьа, Дела, со дӀахецархьама!
Кхин мила хир ву сох дош дала лууш верг?
4Церан дегнаш Ахь кхетамах даьхна,
цундела Ахь цаьрга толам боккхуьйтур бац.
5Са яккхархьама стага шен доттагӀий емалбахь,
оцу адаман берийн бӀаьргаш кхулур ду.
6Сох нахе кицанаш даладойтург вина Цо,
юьхь тӀе шеташ етташ волу стаг ву со.
7Сан бӀаьргаш балано талхийна,
сан дегӀ ӀиндагӀ санна ду.
8Бакъахьа леларш оцунах эргӀадбуьйлу,
бехк боцурш Ӏесачунна карзахбуьйлу.
9Делан лаамехь верг шен новкъа тӀера вер вац,
ткъа куьйгаш цӀена дерш чӀагӀлуш дӀахӀуьттур бу.
10Ткъа шу – кхин а цкъа схьа а дуьйла, дист а хила!
Шуна юкъахь хьекъалалла дерг карор вац суна.

11Сан денош чекхдевлла,
ас йина ойланаш йоьхна,
сан деган сатуьйсийла дӀаяьлла.
12Цу наха буьйсанах де ду олу,
суна хьалха бода лаьтташехь,
серло тӀекхочуш ю олу.
13Ас сатуьйсуш долу цӀа эхарт бен ца хилча,
цигахь болчу боданехь сайна мотт ас биллича,
14бух боцучу Ӏинах, сан да аьлла, цӀе яьккхича,
кошан нӀаьнех сан нана я йиша ас аьлча,
15тӀаккха мичахь ю сан сатуьйсийла?
Сан догдохийла хьанна гур ду тӀаккха?
Соьца кхочур юй те иза эхартан кевне,
соьца цхьаьна Ӏожаллин чене юьжур юй те?»
16

Билдад

‏ Job 18

1Иштта жоп делира шуахьахо волчу Билдада: 2«Маца совцур ду те шу и къамелаш дечуьра?
Ойла ейша, тӀаккха дийр ду вай къамел.
3ХӀунда лору тхо бежанаш санна?
Шун бӀаьргашна хьалха тхо кхетам боцуш ду хӀунда моьтту?
4Хьо оьгӀазвахханчохь хьайн са доу ахьа.
Хьо бахьана долуш дуьне дассо деза ткъа,
я тарх шен меттера дӀахилийта еза ткъа?

5 ^dӀесачун серло а кхулур ю,
цуьнан цӀеран алу а лепар яц.
6Цуьнан четар чохь серлонах бода хир бу,
цунна тӀехула болу къуьда дӀабовр бу.
7Цуьнан чӀогӀа болар а лахлур ду,
шен ойланаша иза вужуьйтур ву.
8Цуьнан когаша иза бойнна тӀе вуьгуш ву,
бойнан машшаш тӀехула иза воьдуш ву.
9Цуьнан кӀажа гуро дӀалоцуш бу,
кӀелоно иза схьахоьцуш а вац.
10Къайлаха речӀанаш цунна лаьттахь йоьгӀна ю,
цуьнан некъаш тӀе доьгӀна гураш а ду.

11Массо а агӀор цунна тӀегӀерташ кхерамаш бу,
иза цхьана меттера вукху метте вуьйлуьйтуш.
12Мацалло цуьнан ницкъ дӀакхоллу.
Бохам цунна уллохь кийчча лаьтта.
13Цамгаро цуьнан чкъор дӀакхоллуш ду,
къизачу Ӏожалло дегӀан меженаш юуш ю.
14Шен хӀусаман паргӀатонера схьа а ваьккхина,
къематийн паччахь волчу вуьгур ву иза.
15Цуьнан метта четар чохь кхин стаг Ӏийр ву,
цуьнан хӀусамна тӀе тесна саьмгал хир ду.
16Лахара цуьнан орамаш а дакъалур ду,
лакха тӀера цуьнан гаьннаш а маргӀалдулур ду.
17Дуьнен чохь иза дагавойтуш мел долу хӀума йойур ю,
урамашкахь цуьнан цӀе кхин яьккхина хир яц.
18Серлонгара бодане иза дӀалоллур ву,
кху дуьнен чуьра иза дӀавоккхур ву.
19Шен халкъана юкъахь бераш я кхин йолу тӀаьхье хир яц цуьнан,
иза Ӏийначу меттехь цхьа а дийна вуьсур вац.
20Малхбузера берш цуьнан кхолламах инзарбевр бу,
малхбалера берш цунна хиллачух Ӏадийна лаьттар бу.
Баккъалла а, иштта хир ю вочун хӀусам,
Дела къобал ца винчун цӀа иштта хир ду».
21

Аюба жоп ло

‏ Job 19

1ТӀаккха Аюба жоп делира: 2«Мел хьийзор ву аша со,
шайн дешнашца со хьоьшуш?
3Хьалха а уьттазза юьхь яьхна аша сан,
шаьш са готта хьовзорах оза а ца луш.
4Нагахь ас къа латийнехь а,
сан гӀалат соьца дуьсур ду.
5Нагахь санна со сийсазвина хилар суна тӀех а детташ,
суна хьалха шу лакхадовла гӀертахь,
6хаалаш: со охьатаӀийнарг Дела ву шуна,
Шен гураш суна гонах дӀа а хӀиттийна.
7Ас мохь бетта: „Со вуьйш ву!“– бохуш,
амма суна жоп луш цхьа а вац,
ас орца доху, амма суна нийсо ца йо.
8Суна хьалхара некъ Цо дӀалаьцна,
цундела со дӀа ца вахало,
сан некъаш тӀе Цо бода хӀоттийна.
9Соьга хилла болу ларам Цо дӀабаьккхина,
сан коьртара таж а дӀадаьккхина.
10Массо а агӀонгара тӀеетта Цо суна, со леш ву!
Сан сатуьйсийла дӀаяьккхина, орамашца схьадаьккхина дитт санна.
11Иза суна дуьхьал оьгӀазаллех вуьзна ву,
Цо со Шен мостагӀа санна лору.
12Цуьнан ардангаш суна тӀегӀерта,
шайна некъ а боккхуш,
цара сан четарна го бина.

13Сан гергарнаш суна уллора Цо дӀабаьхна,
со вевзарш а сох къехка.
14Сан тайпанах берш суна уллора дӀабевлла,
со вевзаш хиллачара со вицвина.
15Хьешашна а, ялхошна а со хийра хета,
царна гергахь со хийра стаг ву.
16Сайн ялхочуьнга кхойкху со, амма цо суна жоп ца ло,
цуьнга дехарш дан дезаш хуьлу со.
17Сан зуда сан Ӏаьнах къехка,
сан берашна а со боьха хета.
18Божаберашна а со сийсаза хета,
со шайна гучуволлушехь, сох кхарда буьйлало.
19Сан доттагӀашна а со боьха хета,
суна безнарш а суна дуьхьалбевлла.
20Сох, чкъор а, даьӀахкаш а бен, хӀумма а ца дисина,
валлал бен суна чохь са а дац.
21Къинхетам бейша! Къинхетам бейша сох,
сан доттагӀий, сох хьакхаделларг Делан куьг ду!
22ХӀунда лела шу суна тӀаьхьадевлла, Дела ма-леллара?
ХӀунда лела шу суна кхин а мотт бетташ?

23Сан дешнаш дӀаяздина делахьара!
Уьш тептар тӀехь дӀаяздина делахьара!
24Аьчка къоламца дошана тӀехула я
массо а ханна тӀулга тӀехь уьш хьаькхна делахьара!

25Суна хууш ду со Бехказавоккхург дийна вуйла а,
Иза тӀаьххьара а лаьтта тӀехь дӀахӀуттур вуйла а.
26Цамгарша сан чкъор дӀакхаьллинехь а,
сайн дилхана юкъара суна Дела гур ву.
27Суна сайна гур ву Иза.
Сан бӀаьргашна гур ву,
тӀаккха Иза суна хийра хир вац.
Со хьаьгна ву иза хилийта!
28Аша иштта аьллехь: „Цунна тӀаьхьа муха довла деза вай,
баланийн бахьанаш цунна чохь карош хилча?“,
кхералаш туьрах, хӀунда аьлча
дералло туьре бекхам бойту.
ТӀаккха хуур ду шуна кхел юйла».
29

Цупар

‏ Job 20

1Иштта жоп делира наӀматхо волчу Цупара: 2«Сан ойланаша соьга жоп долуьйту,
цундела вистхила сихвелла со.
3Со сийсазвоккхуш тӀехбеттамаш суна хезаш хилча,
сан кхетамо со иракарахӀоттаво царна жоп дала.

4Хьуна хууш дац, тоххара дуьйна схьа,
лаьтта тӀехь адам кхоьллинчу хенахь дуьйна,
5харцволчун синкъерам кӀеззигчу ханна буйла,
Ӏесачун самукъадалар йоццачу ханна бен доцийла а?
6Цуьнан куралла стигала кхаччалц лакхаяьлча а,
цуьнан корта мархех хьекхалуш хилча а,
7иза шен боьхалла санна, массо а ханна дӀавер ву,
ткъа иза хьалха гина болчара: „Мичахь ву иза?“– бохуш, хоьттур ду.
8ГӀан санна, карор воцучу тайпана къайлавер ву иза,
буьйсанан сурт санна, гучуьра дӀавоккхур ву иза.
9Иза гина болчу бӀаьргашна кхин гур вац и,
ваьхначу меттигашна а кхин гур вац иза.
10Цуьнан кӀентий сагӀадоьхучарна хьалха а хьесталуш лелар бу,
цо гулдина хьал цара юхадала дезаш ду.
11Цуьнан дегӀ дузийна хилла къоналлин ницкъ
цуьнца цхьаьна кошан ченала буьжур бу.

12Вон цуьнан багахь мерза делахь а,
цо маттана бухахь иза дӀалачкъадахь а,
13иза лардеш, охьа а ца кхуссуш, шен багахь,
стигална буьххьехь латтадо цо.
14И санна кхача гай чохь муьста хир бу,
цуьнан кийрахь лаьхьанан дӀовш хилла дӀахӀуттур бу.
15Цо дӀакхаьллина болу дуьненан бахам схьаӀеттор бу,
Дала цуьнга иза цуьнан кийрара схьатосуьйтур бу.
16Цо цӀубдеш дерг лаьхьанан дӀовш ду,
лаьхьанан матто иза вуьйр ву.
17Цо зовкх хьоьгур дац татолех а,
мазах а, кӀалдах а дуьзна долчу хих а.
18Къахьегарца ша гулдинарг, дӀа а ца кхоллуш, юхадала деза цо,
йохкаэцарх ша яьккхинчу санах цо зовкх хьоьгур дац,
19хӀунда аьлча цо нах бацийна, ца вешаш,
ша дина доцу церан цӀенош схьа а даьхна.
20Цуьнан сутаралла бух боцуш яра,
цуьнан лаамийн доза а дацара.
21Цхьа а хӀума цо дӀакхаллаза дисна дац,
цундела цуьнан беркат дукха лаьттар дац.
22Шен совбаьллачу бахамна юкъахь цунна готта хир ду,
цуьнан синан бала массо а ницкъаца цунна тӀе охьабужур бу.
23Шен тӀингар цо эккха йоллуш юзош хилча,
Делан оьгӀазалла юссур ю цунна тӀе,
догӀа санна, цунна тӀе таӀзарш а доуьйтур ду.
24Шаьлтанах кӀелхьарвалар цуьнан хилахь а,
цӀестан секхаӀодан пха цунах кхетар бу.
25И пха схьабаккха иза хӀоттахь,
цуьнан стима юккъера къегаш иза схьабалахь,
эццахь евзар ю цунна Ӏожаллин инзаралла!
26Ӏаьржа бода бу иза ларвеш цуьнга хьоьжуш.
Цхьаммо а серлайоккхуш йоцучу цӀаро дӀакхоллур ву иза,
цуьнан четар чохь мел хилла долу хӀума а хӀаллакьхир ду.
27Стигало цуьнан харц хилар дӀадоьллур ду,
латта а цунна дуьхьалдер ду.
28Цуьнан цӀера цо мел гулдинарг дӀадер ду,
хи санна, дӀагӀур ду Делан оьгӀазаллин дийнахь.

Иштта хир ду Ӏесачун Делера долу дакъа,
иштта Делера кхел а хир ю цунна».
29

Аюб

‏ Job 21

1Аюба цунна жоп делира: 2«Дикка ладогӀалаш ас бохучуьнга,
цунах суна шуьгара синхьаам хир бу.
3Ас къамел дечу юкъана сатохалаш,
со аьлла ваьллачул тӀаьхьа сох кхарда а мегар ду шуна.

4Со адамна арз деш ву? Вац!
Со собар доцуш хиларан доккха бахьана ду.
5Соьга схьа а хьовсий, инзардовла,
шайн бета тӀе куьг а дилла.
6Цунах ас ойла йича, къемато дӀалоцу со,
сан дегӀ а дего долало.

7Ӏесанаш дукха хӀунда беха,
къеналле а кхочуш,
хьолехь сов а бохуш?
8Церан бераш царна хьалха дӀахӀиттина хуьлу,
церан тӀаьхье церан бӀаьргаш хьалха хьалакхуьу.
9Церан цӀенош чохь кхерам ца лаьтта,
Делан гӀаж а яц царна тӀехь тӀеайина.
10Церан бугӀанашкахь массо а хенахь ницкъ хуьлу,
ткъа церан хьелаша, оста а ца довлуш, эсий а до.
11Жа санна, арабовлуьйту цара шайн кӀентий,
церан кегий бераш дӀасалелхаш ловзу.
12ЖиргӀанаш а етташ,
дечиг-пондарш а лоькхуш,
эшарш лоькху цара,
зурманан гӀовгӀанехь са а къоьру.
13Церан шераш беркатехь дӀаоьху,
тӀаккха паргӀатонехь эхарте кхочу.

14Цара Деле боху: „Дита тхо,
Хьан некъаш довза тхуна ца лаьа!
15Мила ву Нуьцкъалниг оха Цунна Ӏамал ян?
ХӀун пайда болу доӀанца Цунна тӀе верзарх?“
16Амма церан беркат церан-шайн куьйгаша кхоьллина дац.
Иштта Ӏесачеран хьехамаш тӀеэцар генахь ду суна!

17Кест-кеста бойий те Ӏесачийн чиркх?
Кест-кеста вонаш догӀий те цаьрга?
Ша оьгӀазваханчу хенахь кест-кеста
Дала баланаш хьовзабой те царна тӀе?
18Кест-кеста моха еана йолу ча санна бу те уьш,
я йилбазмохо дӀахьош йолу кегаш санна бу те?

19Бохуш ду: „Адамна догӀу таӀзар Дала цуьнан берашна кхоадо“.
Амма ас олу: адамна шена дойла Цо таӀзар, иза кхетийта!
20Цуьнан бӀаьргашна гойла шен хӀаллакьхилар,
цо ша молийла Ницкъболчун оьгӀазалла!
21Иза веллачул тӀаьхьа цуьнан хӀун бала бу шен доьзалан,
цуьнан оьмаран беттанаш чекхдевлла хилча?
22Далла хьехамаш бойла дуй те,
Цо лаккхахь Ӏаш болчарна а кхел еш хилча?

23Цхьаъ шегахь буьззина ницкъ болчу хенахь ле,
цхьана а хӀуманан бала а, гӀайгӀа а йоцуш.
24Цуьнан кийра махьарех буьзна бу,
цуьнан даьӀахкаш тӀамарах юьзна ю.
25Ткъа важа шен дог доьхначохь ле,
цкъа а цхьана а дикачух зовкх а ца хьегна.
26Амма и шиъ цхьабосса лаьтта вуьжу,
нӀаьнаша цхьабосса къайла а воккху.

27Суна шун ойланаш а, хӀилланаш а девза,
аш сайна дуьхьал даха кечдина долу.
28Аша олу: „Мичахь ду къизачу баьччанан цӀа?
Мичахь ду Ӏесанаш чохь Ӏийна четар а?“
29Некъахошка хаттарш ца дина те аша?
Церан дийцарийн тидам ца бина те аша?
30Бала тӀебеанчу дийнахь зуламхо кхоош хуьлу,
Делан оьгӀазаллин дийнахь иза кӀелхьарвоккху.
31Цуьнан лелар юьхь-дуьхьал хьан емалдийр ду?
Цо диначух хьан бийр бу цунна бекхам?
32Иза Ӏожаллин новкъа ваьккхинчул тӀаьхьа,
цуьнан кошана улло гӀарол хӀоттадо.
33ТогӀи чохь кошан латта цунна мерза хуьлу.
Массо а стаг цунна тӀаьхьахӀоьттина вогӀу,
цунна хьалха йоьду тоба ягарйина а вер вац.

Шун эрначу хабарх суна синхьаам муха хир бара?
Аша мел динчу жоьпех харцо бен ца юьсу!»
34

Къамелийн кхоалгӀа дакъа

(22:1–27:23)

Элипаз