‏ Job 22

1Теманхо волчу Элипаза, жоп а луш, элира: 2 ^a«Далла хӀун пайда бу адамах?
Ур-атталла хьекъал долчух хӀун пайда бу Цунна?
3ХӀун синкъерам бу Нуьцкъалчунна хьо бакъ хиларх?
ХӀун пайда хир бара Цунна хьан некъаш цӀена хиларх?
4Цунна хьалха хьо ларамах вуьзна хилар дуй те
хьуна Ӏиттарш еш а, хьо кхеле вуьгуш а Иза лелар?
5Бакъду, хьан вонаш дукха ду,
хьан къинош доза доцуш ду.
6Бахьана доцуш вежаршкара закъалташ ийдина ахьа,
царна тӀера бедарш а яьхна, уьш беркъа а бохуш.
7ГӀелвеллачунна мала хи а ца лора ахьа,
мацвеллачуьнга бепиг а ца кховдадора.
8Ницкъ болчуьнга ахьа латта схьалоцуьйтура,
цӀеяхана верг цигахь ваха а хоуьйтура.
9Бисина Ӏаш болу зударий даьссачу куьйгашца ахьа дӀабохуьйтура,
ахьа байшкахь болу ницкъ а хӀаллакбора.
10Цундела ду хьуна гонах хӀиттийна гураш,
цундела хьо цӀеххьана къемато Ӏадийна ву.
11Цундела хьуна хӀумма а ца галлал бода тӀебеана,
цундела хи тӀедаларо хьо къайлавоккхуш ву.

12Дела лекхачу стигалшкахь Ӏаш вац ткъа?
Хьалахьажал седарчашка, мел лекха ду уьш!
13Ткъа ахьа боху: „ХӀун хаьа Далла?
Цуьнга адамна кхел ялур юй те юькъачу мархашна юкъара схьа?“
14Мархаша хӀума ган Цунна новкъарло йо,
Иза стигалан Ӏаьршашкахула лелачу хенахь.

15Ткъа гӀур вуй те хьо кхидӀа а ширачу а,
зуламхоша баьккхинчу а новкъа?
16Уьш шайн хан а кхачале хӀаллакьхилла,
ткъа церан цӀенош хино дӀадаьхьна.
17Цара Деле баьхна: „ДӀавала тхуна уллора!
ХӀун дийр ду тхуна Ницкъболчо?“
18Ткъа Цо церан цӀенош хьолах хьаладузура.
Амма ас церан хьехамаш тӀеоьцур бац!
19Амма бакъахьа леларг, цаьрга а хьоьжуш,
церан дакъазадийлар а гуш, сакъералуш хир ву,
цӀена верг царах воьлуш а хир ву:
20„ХӀаллакьхилла тхан мостагӀий,
ткъа царах диснарг цӀаро хӀаллакдина“.

21Делаца тайна хилахьа а,
Цуьнца барт болуш вахахьа.
Иштта хиларца хьуна тӀе дика догӀур ду.
22Цуьнгара схьаболу хьехам дӀаэца,
Цуьнан дош хьайн даг чу дӀадилла.
23Нуьцкъалчунна тӀе верзахь, хьо юхаметтахӀоттийна хир ву.
Нагахь санна хьайн хӀусамера къинош ахь дӀалахкахь,
24нагахь хьайн деши ахь ченашка дӀакхоссахь,
Апаран деши – Ӏаннийн тӀулгашка,
25тӀаккха Нуьцкъала Дела хьан деши хилла дӀахӀуттур ву,
Иза иштта къегаш долу дети санна хьуна хир ву.
26ТӀаккха хьо Нуьцкъалчунах воккхавер ву,
хьайн юьхь Далла дуьхьал а ерзор ю ахьа.
27Ахьа доӀа дича, Цунна дӀахезар ду,
тӀаккха кхочушдийр ду ахьа хьайн нигаташ.
28Ахьа дагалаьцнарг дерриг а кхочушхир ду,
хьан некъаш тӀехь серло хир ю лепаш.
29Адамаш охьатаӀийна делахь, ахь эр ду: „Хьалаайина хила“,
ткъа корта охьабахийтинарг Дала кӀелхьарвоккхур ву.
Бехк берг а Дала кӀелхьарвоккхур ву,
цуьнан кӀелхьарвалар хьан цӀена куьйгаш бахьана долуш хир ду».
30

Аюб

‏ Job 23

1Аюба, жоп а луш, элира: 2«Тахана а къаьхьа ду сан аьрзнаш,
куьйгаца сайн узарш ас Ӏаткъадахь а.
3Суна хууш делахьара, Дела мичахь карор ву а,
Цуьнан хӀусам йолчу со дӀавогӀуш велахьара а,
4аса дӀадуьйцур дара Цуьнга сайн гӀуллакх,
сайн бага со бехказадохучу дешнех а юзур яра.
5Цо сайга хӀун олу а хуур дара суна,
Цо сайга бохучух а кхетар вара со.
6Шен болчу ницкъаца соьца къовсалур вара те Иза?
Вацара! Цо Шен тидам суна тӀебохуьйтур бара.
7ТӀаккха бакъахьа лелаш волу со Цуьнца къовсавала мегара,
ткъа суна а сан Кхелахочуьнгара массо а ханна паргӀато хир яра.
8Со малхбузехьа дӀавоьду – цигахь Иза вац,
малхбалехьа – цигахь а суна Иза ца караво.
9Иза къилбаседехь къахьоьгуш хилча а, сан Цунах бӀаьрг а ца кхета,
къилбехьа Иза дӀавирзина хилча а, суна Иза гуш вац.
10Ткъа Цунна хууш ма ду, со лела некъ муьлха бу.
Цо со зийча, деши санна, цӀена хилла дӀахӀуттур ву со.
11Цуьнан лар лохуш, леррина вогӀу со.
Юьстах а ца волуш, Цуьнан некъ ас ларбо.
12Цуьнан багара девллачу весеташ тӀера со ца ваьлла,
Цуьнан багара дешнаш сайн даг чохь Аса леладо.

13Иза хийцам боцуш ву – мила ву Иза хийцавалийта?
Шена дага мел деанарг Цо кхочушдийр ма ду.
14Суна дуьхьал Ша леринарг Цо кхочушдийр ду,
ишттаниг Цуьнан дуккха а ду дӀадиллина.
15Цундела ву со Цунна хьалха Ӏадийна,
айса ойла ешшехь – Цунах кхерало со.
16Дала кӀаддина сан дог,
Нуьцкъалчо со кхерийна.
Со вист ца хуьлуш лаьтташ вац, бода белахь а,
сан юьхь Ӏаьржачу бодано дӀахьулйинехь а».
17

‏ Job 24

Аюба кхидӀа а элира: 1«ХӀунда ца доху Нуьцкъалчо кхел ен денош билгал?
ХӀунда ца го и денош Иза вевзачарна?
2Адамаша доза къастош диллина тӀулгаш дӀасадоху,
цара жаш лачкъа а до, уьш дажа а до.
3Байлахь бисинчеран варраш дӀаюьгу,
йисина Ӏачун сту закъалтана дӀабуьгу.
4Цара къен верг шайн некъа тӀера дӀатотту,
махкахь гӀело хьоьгурш къайлабуьйлуш лела безаш бу.
5Аренгара акха варраш санна, кхача а лоьхуш,
шайн болх кхочушбан арабовлу уьш.
Яьссачу арено царна а, церан берашна а кхача ло.
6Цара нехан кхаш тӀехь шайна докъар гулдо,
хьарамлелачун кемсийн бешахь йиснарг схьагулйо.
7ТӀехь хӀума доцуш дӀабуьйшу уьш,
шийлачу заманахь тӀеюха хӀума а яц церан.
8Ламанан догӀанаша уьш башабо,
уьш тархех дӀахьерча,
дӀалечкъийла шайн ца хиларна.

9Бобераш декхачуьра доху,
къечун аганара бер закъалтана доккху.
10ТӀехь хӀума йоцуш лела къен нах.
Ялта чудерзош болчара санна цара
болх бахь а, уьш мацболуьйту.
11РаьгӀнашна юкъахь, Ӏовдий, зайтдаьтта доккху цара,
кемсаш Ӏуьйдуш мутта доккху, амма шаьш хьогалла лов цара.
12ГӀалахь леш болчеран узарш ду хезаш,
чевнаш йинарш а бу гӀо доьхуш,
амма Далла церан доӀанаш дӀа ца хеза.

13Серлонна дуьхьал гӀевттинарш а бу,
царна ца девза Цуьнан некъаш,
уьш цу некъаш тӀехула а ца лела.
14Сахуьллуш хьалагӀотту нах бойург,
къениг а, декъазаниг а цо воь,
ткъа буьйсанна хӀума лачкъайо.
15Нахаца леларг бода тӀебаре хьоьжу,
цунна моьтту: „Со цхьанна а гур вац“,
шен юьхь а цо туьтмӀаьжигаца дӀакъовлу.
16Буьйсанна цӀийнан пенах Ӏуьрг доккху талорхоша,
ткъа дийнахь, дӀа а ловчкъий, ара ца бовлу уьш.
Дийнан серло хӀун ю царна а ца хаьа.
17Царна массарна а Ӏуьйре – Ӏожаллин ӀиндагӀ санна ю,
ткъа оцу ӀиндагӀан инзаралла царна евзаш ю.
18Амма, хина тӀехула хӀуттург санна, уьш сихха дӀабовду.
Царна кхаьчнарг лаьттан декъан тӀехь неӀалт ду,
церан кемсийн беша боьду некъ а баьсса бу.
19Йокъано дешаш долчу лайн хи дӀа-ма-худдара,
иштта эхарто дӀахуду къинош летийнарш.
20Ненан кийрано а иза вицво,
цунах нӀаьнийн даар а хуьлу,
цхьанна а иза дага а ца вогӀу,
дитт санна, кагло къинош летийнарг.
21Цара бер доцучунна а, бераш ца хиллачунна а гӀело йо,
йисина Ӏачунна а диканиг ца до цара.
22Амма Дала Шен ницкъаца ницкъберш а дӀакхоьхьу.
Дела хьалагӀаьттича, шайн дахарх церан дегайовхо ца хуьлу.
23Дала цаьрга кхерам ца хиларе сатийсийтахь а,
Цуьнан бӀаьргаш церан некъашка хьажийна бу.
24Уьш кӀезигчу ханна бен хьала ца айабелла, тӀаккха уьш бац.
Охьа а эгна, уьш, берриш а санна, схьагулбеш бу.
Кенан баххьаш санна, схьахадийна а хир бу уьш.
Иза иштта ца хилча, сан харц хилар гучу хьан доккхур ду?
Сан дешнаш эрна ду хьан эр ду?»
25

Билдад

‏ Job 25

1Шуахьахо волчу Билдада, жоп луш, элира: 2«Ӏедал а Делан ду, ларамах бузуьйтуш ву Иза.
Лекхачу Шен стигалахь Цо машар латтабо.
3Чот юй те Цуьнан эскарийн?
Хьанна тӀе ца юссу Цуьнгара серло?
4Муха хир ду адам Далла хьалха бакъ?
Муха хир ву зудчо вина волу стаг цӀена?
5Цуьнан бӀаьргашкахь бутт а сирла ца хилча,
Цунна хьалха седарчий а цӀена ца хилча,
кхин а кӀезиг ду адам – нӀаьвцицигах а,
нӀаьнах а терра бен вац адаман кӀант».
6

Аюб

‏ Job 26

1Жоп луш, Аюба элира: 2«Стенна тӀехь гӀо дина ахьа гӀора дӀадаьллачунна?
Куьйгашкахь ницкъ боцучунна гӀо диний ахь?
3ХӀун хьехар дина ахьа хьекъал доцучунна?
КӀорга хьекъалалла луш ницкъ бина ахьа хьайна!
4Хьан гӀо дина хьуна и дешнаш ала?
Хьенан са дара хьан багахула къамел дийриг?
5Хина а, цунна чохь бехачарна а бухахь
беллачийн синош дегош лаьтташ ду.
6 Эхарт Далла хьалха дерзина а ду,
талхаран меттиган кхалор а яц.
7Цо яьссаллина тӀехь къилбаседехьара стигал дӀаяржийна,
цхьа а хӀума йоцучохь латта а хьалаоьллина.
8Шен мархаш юкъахь хи схьагулдо Цо,
ткъа марха хи деза хиларх екъа а ца ло.
9Цо беттасин юьхь дӀалачкъайо,
марха цунна тӀе а йохийтий.
10Хи тӀехула сиз хьаькхна Цо,
серлонна а, боданна а юкъара доза а къастош.
11Цуьнан оьгӀазаллех инзардевлла,
стигалара бӀогӀамаш ду дегош.
12Шен ницкъаца хӀорд дӀатебира Цо,
хӀордан саьрмик болу РахӀаб Цо
Шен хьекъалаллица хьаьшира.
13Цо схьадеттачу хӀоно стигал серлаяьккхира,
Цуьнан куьг шершаш боьдучу лаьхьанах чекхбелира.
ХӀара дерриг а Цуьнан гӀуллакхийн кӀеззиг долу дакъа бен дац.
Шабар-шибар дечу хенахь бен вайна Цунах лаьцна ца хеза!
Ткъа Цуьнан ницкъан къекъар къасто хьенан хир яра йиш?»
14

Аюб

‏ Job 27

1Шен къамел кхидӀа а дира Аюба. Цо элира: 2«Аса чӀагӀо йо суна нийса кхел ца йойтуш дийна волчу Делах а,
сан дагна сингаттам баьккхина волчу Нуьцкъалчух а,
3суна чохь садеӀар дӀадаллалц,
сан мерӀуьргашкахь Делан са мел ду,
4сан багара харцдерг арадер ма дац,
сан матто бакъ доцург а дуьйцур ма дац!
5ХӀуъа хилахь а, со аша бохучунна тӀетовр вац,
со дийна мел ву, сайн цӀена хилар дойур дац ас.
6Сайн бакъхилар чӀоггӀа латтадо аса, иза ас дӀа а лур дац –
цу тӀехь сан даго, со мел веха, бехк а боккхур бац сох.

7Сан мостагӀа харцонча санна лорийла,
суна дуьхьал ваьлларг зуламхо санна хуьлийла.
8Стенах сатийса деза Ӏесачо,
Дала ша дӀатеттича,
Цо шен са дӀаэцча?
9Далла хезар дуй те цуьнан тийжар,
цунна бохам тӀебеача?
10Воккхавеш хир вуй те иза Нуьцкъалчух,
кхойкхур вуй те иза Цуьнга массо а хенахь?

11Ас дуьйцур ду шуна Делан куьйгах лаьцна,
Нуьцкъалчун некъаш а шух къайладохур дац ас.
12Шуна шайна а ма гина дерриг а.
Стенна дуьйцу и даьсса хабарш?

13ХӀара ду шуна харцо лелочунна Делера хиндерг,
хӀара ду Нуьцкъалчуьнгара къизачунна кхочун дерг ▼

▼Цхьадолчу гочдаршка хьаьжжина, 13-чу аята тӀера 23-чу аята тӀекхаччалц Цупаран къамел ду.

.
14Цуьнан кӀентий мел дебарх, уьш туьро хӀаллакбийр бу,
цуьнан тӀаьхьено дуззалц бепиг дуур дац.
15Цунах тӀаьхьабиснарш Ӏожаллин уьно коше кхачор бу,
царах бисинчу зударша царна тӀаьхьа тийжарш а дийр дац.
16Ченал дукха дети шена гулдахь а,
поппарал дукха бедарш цо гулъяхь а,
17уьш Делан лаамехь болчара тӀедухур ду,
цуьнан дети цӀена лелачара доькъур ду.
18Цо шена деш долу цӀа нецан бен санна
я хехочун бун санна, до.
19ДӀавуьжуш, хьолада санна дӀавуьжу иза,
амма самаваьлча, цуьнан бахам ца хуьлу.
Цо бӀаьргаш схьабиллича, цуьнан хӀумма а дисина ца хуьлу.
20Хи тӀедалар санна, тӀекхочур ду цунна Ӏадор.
Буьйсанна шайтӀанан мохо иза дӀа а хьо.
21Малхбалехьарчу мохо иза дӀаваьхьча,
иза кхин хир вац. Шен метта тӀера
оцу мохо дӀахьокхур ву иза.
22Къинхетам боцучу мохо иза дӀахьоькху,
цуьнан караравала гӀертачу хенахь.
23Самукъадаьллачу мохо, цунах кхаьрдаш, тӀараш вовшахдетта,
иза мел кхочучу меттехь цунна шок а етташ».