‏ Judges 4:6-24

6Дебирас, Наптал-махкарчу Кхедашара Аби-НуӀаман кӀант Баракх ша йолчу схьа а кхайкхина, цуьнга элира: «Исраилан халкъан Везачу Дала хьуна тӀедуьллу: „Ваха а гӀой, Напталинний, Забуланний тӀаьхьенах волу итт эзар стаг вовшах а тохий, уьш Табур-лам тӀе дӀабига. 7Ткъа Аса Къишун-хи йисте Ябинан эскаран куьйгалхо волу Сисра а, цуьнан гӀудалкхаш а, эскар а, цига дӀа а далийна, хьан кара дӀалур ду“».

8Баракха Дебирига элира: «Хьо соьца ягӀахь, со цига гӀур ву, ца ягӀахь, гӀур вац».

9Дебирас цуьнга элира: «Со-м йогӀур ю хьоьца, амма хаалахь: Сисра эшийначул тӀаьхьа халкъо сий деш верг хьо хир вац хьуна. Везачу Эло зудчуьнга эшавойтур ву Сисра». Дебира Баракхца Кхедаш-гӀала дӀаяхара. 10Баракха Забулан а, Напталан а тӀаьхьенах болу нах Кхедаше схьакхайкхира. Итт эзар стаг тӀаьхьахӀоьттира цунна. Дебира а яхара цуьнца.

11Цигахь, Хьебар цӀе а йолуш, кхенахойх волу цхьа стаг вара. Иза шен халкъах дӀакъаьстинера. (Кхенахой Муса-пайхамаран стунваша волчу Хьабабан тӀаьхьенах бу). Хьабаба шен четар Кхедашана уллохь йолчу ЦаӀнаним цӀе йолчу меттехь ножан хьунна уллохь дӀахӀоттийнера.

12Сисрина хиира, Аби-НуӀаман кӀант Баракх Табур цӀе йолчу лам тӀе ваьллийла. 13Шен эчигах йина йолу исс бӀе гӀудалкх схьа а ялийна, шен халкъ а схьа а кхайкхина, уьш Хьаршат-Гойимара Къишун-хи долчу дӀахьажийра цо.

14Дебирас Баракхе элира: «Тахана Везачу Эло Сисра эшо ницкъ лур бу хьуна. Вало, Веза Эла хьуна хьалхаваьлла хир ву». Баракх, шеца итт эзар стаг а волуш, Табур-лам тӀера охьавоьссира. 15Баракха туьраца беш болчу тӀамехь Сисра а, цуьнан гӀудалкхаш тӀехь болу нах а бохийна хьовзийра Везачу Эло. Царна ца хаьара, шаьш хӀун дан деза. Ткъа Сисра, гӀудалкха тӀера охьа а воьссина, гӀаш ведда дӀавахара. 16Сисрин гӀудалкхашна а, эскарна а тӀаьхьавелира Баракх. Цара уьш Хьаршат-Гойиме кхаччалц, лаьхкина, дӀабигира, дийна цхьа а стаг ца вуьтуш.

17Сисра Хьебаран зудчун ЯӀалан четар долчу ведда схьавеара. Хьебар ша кхенахо вара, ткъа цуьнан цӀа хьацорхойн Ябин-паччахьца бертахь Ӏаш дара. 18ЯӀал Сисрина дуьхьал араелира. Цо цуьнга элира: «Чувола со йолчу, сан эла. Кхера а ца кхоьруш, чоьхьавала». Сисра цуьнан четар чу велира. ЯӀала цунна тӀе шаршу тесира. 19Сисрас цуьнга элира: «Со чӀогӀа хьагвелла. Суна жимма хи лохьа». ЯӀала, шура чохь йолу пӀаьлдиг схьа а баьстина, цуьнга шура а малийтина, цунна юха а тӀе хӀума тесира. 20Сисрас ЯӀале элира: «Четарна чувогӀийла долчу дӀа а хӀоттий, цхьаммо хьайга: „Кхузахь цхьа а стаг вуй?“– аьлла, хаттар дахь, „Вац“– алий, жоп лолахь».

21ЧӀогӀа кӀадвелла волчу Сисрина наб кхийтира. ЯӀал, четар чӀагӀдеш тухуш йолу дечиган хьостам а, варзап а схьа а эцна, меллаша цунна тӀе яхара. Сисра лаьттах дӀа а тухуш, лергъагӀонна тӀе варзап а тоьхна, дечиган хьостам чекхбаьккхира цо. Иза велира. 22Сисра лоьхуш лелаш волу Баракх ЯӀалан четарна тӀе кхечира. Цунна дуьхьал ара а яьлла, ЯӀала элира: «Чувола, аса гойтур ву хьуна ахьа лоьхуш верг». Баракх чоьхьаваьлча, цунна гира, лергъагӀонах боллуш хьокха а болуш, велла Ӏуьллуш волу Сисра.

23Цу дийнахь Везачу Эло Исраилан халкъана хьалхахь эшийра канаӀанхойн паччахь волу Ябин. 24Исраилан халкъ де дийне мел дели а ницкъ алсамболуш лаьтташ дара, цара Ябин хӀаллаквина дӀаваккхалц.

‏ Judges 5

Дебирин назма

1Сисра вийначу дийнахь Дебирассий, Аби-НуӀаман кӀанта Баракхий хӀара назма элира:

2«Исраилхойн баьччанаш хьалхабевлла арабовларна а,
халкъ лараме хьалагӀаттарна а,
хаставе Веза Эла!
3ЛадогӀалаш, паччахьаш!
Тергаме хилалаш, хьалдолу нах!
Хьуна дӀаолу аса хӀара назма, ва Веза Эла.
Исраилан халкъан Везачу Далла хастам а бо ас.
4Веза Эла, Хьо, СеӀирера ара а ваьлла,
Эдоман аренгахула схьавогӀучу хенахь,
латта дегош дара,
стигалш тӀадамаш ледош яра,
мархаш догӀа Ӏенош яра.
5 ^aЛаьмнаш дегош дара Везачу Элана хьалхахь,
ур-атталла хӀара Синай-лам а бегабора
Исраилан халкъан Везачу Далла хьалха.
6Ӏанатин кӀант Шамгар паччахьалла деш волчу хенахь а,
ЯӀалан заманашкахь а
некъахой шайн эмкалийн ковранашца юьстахчу некъашкахула лелара,
ткъа некъаш даьсса дара.
7Исраилан махкахь йолчу ярташкахь кхин ца Ӏийра,
со, Дебира, гӀатталц, ца Ӏийра цигахь нах,
Исраилан халкъан нана со хилла дӀахӀотталц.
8Уьш керлачу деланашна тӀаьхьахӀиттича,
гӀалин кевнна улло тӀом беана схьакхечира.
Шовзткъа эзар стаг шена юкъахь а волуш долчу Исраилан эскарехь
я турс а, я гоьмукъ а ца карийра.
9Исраилан мехкан куьйгалхой, сан дог шуьца ду.
Шен даго ма-хьоьхху, халкъана юкъара хьалагӀевттинчаьрца ду.
Хастам хуьлийла Везачу Элана!
10КӀайн варраш тӀехь дӀадоьлхурш а,
нуьйра тӀехь хиъна Ӏийраш а,
гӀаш дӀадоьлхурш а,
ойла елаш Везачу Эло диначун!
11Руьйтанахь бежанаш схьагуллучохь хезаш ду адамийн аьзнаш.
Цигахь Везачу Элан нийсачу толамашна хастам беш бу,
Исраилан махкара Цуьнан халкъо баьккхинчу толамашна:
Хьала а гӀаьттина, Везачу Элан халкъ гӀалин кевнашна тӀедахара.
12ХьалагӀатта, Дебира, хьалагӀатта!
Хьайн назма дӀаала!
ХьалагӀатта, Аби-НуӀаман кӀант Баракх,
шайна йийсар динарш схьалеца!
13ТӀаккха халкъ Сарид-юьрта охьадоьссира, куьйгалхошна дуьхьал.
Везачу Элан халкъ соьца цхьаьна майрачарна дуьхьалделира.
14Ӏамалекхахь орамаш хилларш Эпрайм-махкара схьабогӀура,
ва Бен-Яманан тайпа, хьоьца болу нах хьуна тӀаьхьа хӀиттина.
Макир волчуьра схьабогӀура куьйгалхой,
Забулан тӀаьхьенан хьаькамаш а схьабаьхкина.
15Иссарханан элий а Дебирица бара,
Иссарханан тайпа иштта Баракхца дара.
Цунна тӀаьхьа тогӀи чу араделира иза.
Раабанан тайпанна юкъахь
доккха дар-дацар дара лаьтташ.
16ХӀунда Ӏа хьо гӀотанашна юкъахь хиъна,
бажа Ӏоьхуш ла а доьгӀуш?
Раабанан тӀаьхьенна юккъе
даккхий дар-дацарш ма деана.
17ГалӀадара халкъ Йордан-хил дехьа дисира.
Ткъа Данан тайпа хӀунда дисира хинкеманашца?
Ашаран тайпа хӀордан йистехь дисира,
йисте догӀийла йолчохь.
18Амма Забулан а, Напталан а халкъаша,
шайн дахар ца кхоош, лаьмнашкахь тӀом бира.

19Паччахьаш вовшахлата схьабаьхкира,
канаӀанхойн паччахьаша тӀом бира.
ТаӀнакахь, МагӀиддан хиш долчохь, и хилла,
амма дато хӀонс ца кхечира царна цигара.
20Стигалара седарчий а дара вовшахлеташ.
Уьш шайн некъашкахь Сисрица тӀом беш дара.
21Къишун-хино дӀабаьхьира уьш.
Чехка доьдуш долу хи ма ду иза.
Сан са, нуьцкъала хьалхадалий, дӀагӀо!
22ТӀаккха Сисрин говрийн бергаш схьайогӀуш яра,
цара ден татанаш схьахезаш дара.
23„НеӀалт хуьлда Мераз-гӀалина, –
элира Везачу Элан Малико, –
Билггал неӀалт хуьлда цуьнан бахархошна,
цара Везачу Элана гӀо ца дарна,
шайн майрачу тӀемалошца цхьаьна“.

24Декъала хуьлда кхенахо волчу Хьебаран зуда ЯӀал!
Четарш чохь бехаш болчу зударшна юкъахь декъала хуьлда иза!
25Сисрас мала хи дехча,
цо цунна шура елира.
Элашна хьалхахь лелош болчу кеда чуьра схьа а йоьттина,
мустъелла шура елира.
26Шен четар чуьра ара а яьлла,
хьокха схьа а эцна,
аьтту куьйга варзап схьаийцира цо.
И хьокха Сисрин лергъагӀонах чекхбаьккхира цо.
27Цуьнан когаш тӀе а тевжина,
иза циггахь воьжна Ӏуьллуш вара.
Цуьнан когаш тӀе таьӀӀинчохь
валар а хилира цуьнан.

28Корах арахьоьжуш яра Сисрин нана.
Цо елхарца хаьттира: „Сан кӀентан гӀудалкх хье хӀунда елла?
ХӀунда ца хеза цуьнан говрийн бергийн тата?“
29Хьекъал долуш болчу цуьнан ялхоша жоп лора цунна,
цо ша-шена ма-даллара:
30„Схьахетарехь, уьш, хӀонс а карийна, шайна юкъахь иза йоькъуш хир бу.
ТӀемалоша хӀораммо а шайна цхьаъ я ши йоӀ схьаоьцуш хир ю.
ХӀонс юкъара бес-бесара бедарш Сисрас шена схьахоржу.
ХӀонс юкъара бес-бесара юьйцина цхьа бедар а,
бес-бесара тир яьккхина ши бедар а хӀонс яьккхинчун коча уллу“.
31Иштта хӀаллакьхуьлийла Хьан берриг а мостагӀий, Веза Эла!
Ткъа Хьо везаш берш, шен нуьцкъаллица схьакхетта богӀуш болу малх санна, ницкъ болуш хуьлийла!»

Шовзткъа шарахь лаьтта тӀехь машар лаьттира.