‏ 1 Corinthians 1

1Kakadu ǝni hyati aka Bulusu, nam tǝ Hyal kǝga ka dzǝ ndzai ndǝr hyar Kǝrsti Yɛsu apa tǝ dzǝ ada bara, ba zǝr mama muri Sasthlanisu.

2 ^a Yi ada rǝbwa ala ikǝlizǝyar Hyal nam akwa Kwaranti, ala ndzǝ nam tǝ dar nǝni akwa Kǝrsti Yɛsu ba nam tǝ Hyal vi pam ka dar ndzai ndzǝrni, atakǝmaduku kaka sanga ndzǝ akwa kǝlara vui nam ada kǝga thlǝma Thlakǝr muri Yɛsu Kǝrsti—Thlakǝr dar ba nǝmuri:

3Ka Hyal Tada ni ba Kǝrsti Yɛsu Thlakǝr muri la gǝri ɗakur Hyal ba ndzai lapiyakur.

Bulusu Usar Hyal

4Yi ada usar Hyal tatang akuya ka gǝri kadǝbar ɗakurni nam tǝ dzǝ la gǝri akwa Kǝrsti Yɛsu. 5Akuya akwa dza tǝ gǝri ndzai bǝrba akwa kǝlara whalɛ—akwa sanga ndǝrǝr gǝri ba akwa sanga zǝndi sǝr gǝri 6kadǝbar sǝ nam tǝ yar nkǝrɛ ata kǝra Kǝrsti ni kǝ tsantǝdzi dzǝri akwa gǝri. 7Ani ka ǝni akwa ntsa sanga sǝ nam tǝ Hyal ada hamnta ala ndɛ nam kura gǝri ta ɓui adi wɛ apa tǝ gǝri ada sǝkɛ ɓakta siyir Thlakǝr muri Yɛsu Kǝrsti. 8Dzǝ ata wulhǝ tǝ gǝri ka la gǝri dǝna har ka la vǝr dǝnta, ani ka gǝri ndzai kura aka aibai ata vǝrǝr Thlakǝr muri Yɛsu Kǝrsti. 9Hyal, dzǝ nam tara kǝga tǝ gǝri alǝkwa mwardzi aka Zǝrǝrni Yɛsu Kǝrsti Thlakǝr muri, dzǝ ndǝ aka dzǝrkur.

Ndǝghǝ Nya akwa Ikǝlizǝya

10Yi kǝgyǝ tǝ gǝri, madar mama kaka nkwaiyir mama, akwa thlǝma Thlakǝr muri Yɛsu Kǝrsti, apǝri sanga gǝri ka nya gǝri ndzai duku kaka kǝma gǝri, ani ka ta ndǝghǝ nya ta lǝkwa ɓwanga gǝri, ba ka gǝri ndzai aka kǝltsǝni kǝr nam dzǝri akwa hankal ba ɗǝnga. 11Madar mama, ndzǝr kǝiyir Kulawi yarɛ laka lai ndǝrɛ apǝri ɓwalnya adai akwa ɓwanga gǝri. 12 ^bSǝ nam tǝ Yi ada nkǝrɛ ani: Pathlu akwa ntsa gǝri ada nkǝrɛ, “Yi ada nu Bulusu”; ndǝ laka ada nkǝrɛ, “Yi ada nu Apaulaus”; ndǝ damwa ada nkǝrɛ, “Yi ada nu Kyafas”; ndǝ damwa tsuwɛ ada nkǝrɛ, “Yi ada nu Kǝrsti.” 13Kǝrsti ni dzǝ ndǝghǝbadzi ya? Bulusu ani tǝ ndǝ kukwanta akuya ka gǝri ya? Kǝna ndǝ ‘ya ala gǝri bamtizǝma akwa thlǝma Bulusu? 14 ^cYi ada usar Hyal ka kura Yi ta ‘ya bamtizǝma ala ndǝ laka akwa ntsa gǝri, ɗiɗi Kǝrispaus ba Gayus, 15ani ta ndǝ laka ta nkǝrɛ apǝri ndǝ ‘ya ala gǝri bamtizǝma akwa thlǝmawai. 16 ^d(A, Yi ‘ya bamtizǝma yɛ ala ndzǝr kǝiyir Istafanus; aghǝla ǝnda, Yi ta ɗǝngati apǝri Yi ‘ya Bamtizǝma ala ndǝ laka damwa wɛ.) 17Akuya Kǝrsti ta hya tǝra ka ‘ya bamtizǝma wɛ, ama ka nkǝr ndǝrǝr Hyal nam sǝɗa—adi aka masǝkukur labar ndǝ wɛ, ani ka ta ndǝ ta rutsǝni dǝna nam akwa undzum kadlǝkadlɛ nǝr Kǝrsti.

Kǝrsti ani Bǝrkawakur ba Dǝnar Hyal

18Akuya ndǝrɛ ata kǝra undzum kadlǝkadlɛ ni dlangkur ala ndzǝ nam ada santadzi, ama ala muri nam ada ɓui mbatǝdzi dzǝ ani dǝnar Hyal. 19 ^eAkuya rǝbwa-rǝbwa:
“Yi ata whuzanta bǝrkawakur nǝr ndǝ bǝrkawa;
Yi ata sazǝnta zǝndǝr ndzǝ nam tara zǝndi su.”

20 ^fDzǝ ama ndǝ nam bǝrkawa ni? Dzǝ ama ndǝ nam malǝmǝr mabari? Dzǝ ama ndǝ nam masukur ɓwalnya nǝr zaman ǝni? Hyal ta mǝrti bǝrkawakur dunya ni apǝri dlangkur wɛ? 21Akuya tǝng akwa bǝrkawakur Hyal dunya ni ta zǝndi tǝni atar bǝrkawakur wɛ, Hyal kǝ tsarba atar dlangkur sǝ nam tǝ ndǝ tara nkǝrnta ata kǝra ndǝrǝr Hyal tǝ dzǝ mbati ndzǝ nam aka mbǝrsa. 22Ndzǝr Yahudi ada bara ka dar wula parsu nǝr ndatǝdzi yarɛ ba ndzǝr Gǝriku ada bara ka dar ɓui bǝrkawakur, 23ama yar ada nkǝrɛ ndǝrǝr kukwanta Kǝrsti: sǝr mbuthlǝlɛ ala ndzǝr Yahudi ba dlangkur ala ndzǝ kura Yahudi, 24ama ala ndzǝ nam tǝ Hyal kǝga, ndzǝr Yahudi wala ndzǝ kura Yahudi gyapu, Kǝrsti ani dǝnar Hyal ba bǝrkawakur Hyal. 25Akuya dlangkur Hyal bǝrkawa ta bǝrkawakur ndɛ, ba kura dǝnakur Hyal ɓaɓal ta dǝnar ndɛ.

26Madar mama, ɗǝngatamɛ ndzaiyir gǝri akwa saka nam tǝ Hyal kǝga tǝ gǝri. Adi hang akwa ntsa gǝri aka bǝrkawakur nǝr dunya ma wɛ; adi hang akwa ntsa gǝri aka dǝnar mǝrti su akwa ntsa ndɛ wɛ; adi hang akwa ntsa gǝri tǝ ndǝ ya akwa kulfɛ nam ɗaku wɛ. 27Ama Hyal tsarba sǝ yarɛ nam dlang akwa dunya ka dzǝ hau ndzǝ nam bǝrkawa akwa sǝlai; Hyal tsarba sǝ yarɛ nam kura aka dǝna akwa dunya ka dzǝ hau ndǝr dǝna akwa sǝlai. 28Dzǝ tsarba sǝ yarɛ nam aghǝl aghǝli akwa dunya ni ba sǝ yarɛ nam tǝ ndǝ ngǝla-ngǝla—ba sǝ nam kura ndǝ ada tsɛ apǝri su tǝ dzǝ kǝthlǝr aka dar ka mǝrti sǝ nam tǝ dunya ada wulɛ apǝri sǝ nam aka paida ka ndzai kura paida, 29ani ka ta ndǝ laka ta mǝzi ka ‘ya agula akǝma Hyal. 30Ani kadǝbar ka Hyal ani tǝ gǝri paktsǝnidzi kaka Kǝrsti Yɛsu. Dzǝ kǝ ndzai ala muri bǝrkawakur adzǝ Hyal—nam ani, kadǝbar ka Kǝrsti muri ndzai kal-kal akǝma Hyal, muri dza ndzǝrni, ba muri ɓui pǝlidzi ta biku. 31 ^gKadǝbar ǝni, apa rǝbwa-rǝbwa: “Ngyar ka ndǝ nam ata agula ka dzǝ agula ata kǝra Thlaku.”