1 Corinthians 3
Ata Kǝra Ndǝghǝ Nya akwa Ikǝlizǝya
1Ama madar mama, Yi adi ta mǝzi ka nkǝrɛ ala gǝri su apa gǝri ndzɛ aka Mambǝlɛ wɛ ama apa ndzǝr dunya—mbǝghyiwa yarɛ akwa Kǝrsti. 2 aYi la gǝri u’uwa, adi ɗǝvɛ ɓaɓal wɛ, akuya gǝri ta ɗǝmhǝdzi kari kwataku wɛ. Dzǝri, gǝri tsu ta ɗǝmhǝdzi wɛ. 3Gǝri tsu ada ‘ya sǝr dunya. Akuya tǝng tǝ sǝlku ba ɓwalnya tsu adai akwa ntsa gǝri, gǝri adi ada ‘ya sǝr dunya wɛ? Gǝri adi ada ‘ya su apa kum aka masi wɛ? 4 bAkuya ma ndǝ pathlu nkǝrɛ, “Yi ada nu Bulusu,” ba ndǝ damwa tsuwɛ, “Yi ada nu Apaulaus,” gǝri adi ada ‘ya sǝr kum aka masi wɛ? 5Apaulaus ni, dzǝ mǝrɛ tǝm? Ba Bulusu ni dzǝ mi? Dar madar kǝi ɗiɗi, atar dar tǝ gǝri si ka mbǝrsa—apa tǝ Thlaku tara la kǝthlǝrǝrni ala dar. 6 cYi dzǝ ani tara thlǝkati kulfǝ ni, Apaulaus ka tsatsǝni, ama Hyal ani tara kǝlati. 7Ani adi ndǝ nam tara thlǝkati wala ndǝ nam tara tsatsǝni ani mima wɛ, ama ɗiɗi Hyal, nam ada mǝrti su ka kǝlí. 8Ndǝ nam tara thlǝkati ba ndǝ nam tara tsatsǝni ‘yar dar duku, ba kǝlara akwa ntsa dar Hyal ata lari wadzǝɓa kal-kal aka kǝthlǝrǝrni. 9Akuya yar ndzǝr kǝthlǝr atakǝmaduku nǝr Hyal; gǝri dza babalǝr fwakǝr Hyal, kǝiyir Hyal. 10Atar ɗakur tǝ Hyal tara lai, Yi piyartsǝni garu ni apa ndǝ masukur tsa garu, ba ndǝ laka damwa ada tsa ata kǝrari. Ama kǝlara ndɛ ka dzǝ vǝdzǝ hankal ala whal nam tǝ dzǝ ata tsa ata kǝr. 11Akuya ndɛ adi awa mǝzi ka piyartsǝni garu damwa pam ta nam tǝ ndǝ kurta piyartsǝni wɛ, nam ani Yɛsu Kǝrsti. 12Ma kǝlara ndɛ tsa ata kǝra piyartsǝniyir garu ǝni aka dinar, lipǝla, paya yarɛ nam dzau, fwɛ, kusar wala kawi, 13kǝthlǝr kǝlara ndɛ ata tsantǝdzi, kadǝbar vǝr ǝnda ata sǝba akǝri ata babal. Ndɛ ata tsanti tǝni aka u’u, ba u’u ata dzaba ɗakur kǝthlǝrǝr kǝlara ndɛ. 14Ma kǝlara ndɛ nam tara tsa ata kǝra piyartsǝni ni aka sǝ nam tara ɓati kura ta mbantadzi, dzǝ ata dlutsi wadzǝɓarni. 15Ma kǝthlǝrǝr kǝlara ndɛ nam tara mbantadzi, dzǝ ata ɗar bwaniyir asar; dzǝ tǝ kǝrni dzǝ ta ɓui mbatǝdzi wɛ, ama ɗiɗi apa ndǝ tara whuiya sǝba akwa u’u. 16 dGǝri ta zǝndi apǝri gǝri tǝ kǝr gǝri gǝr fǝr Hyal ba Mambǝlǝr Hyal ada ndzai akwa gǝr wɛ? 17Ma kǝlara ndɛ nam tara ‘yanta fǝr Hyal, Hyal ata ‘yanta tǝni; akuya fǝr Hyal nǝni, ba gǝri dza fǝr ǝnda. 18Ta gǝr ta zǝla kǝr gǝri. Ma kǝlara duku akwa ntsa gǝri ɗǝnga apǝri dzǝ bǝrkawa akwa ndzaiyir zaman ǝni, ngyar ka dzǝ mǝrti kǝrni “dlang” ani ka dzǝ siya ndzai bǝrkawa. 19 eAkuya bǝrkawakur nǝr dunya ǝni ani dlangkur akǝma Hyal. Apa rǝbwa-rǝbwa: “Dzǝ ngǝti ndzǝ bǝrkawa akwa dabarikur dar”; 20 fba kadamwa, “Thlaku zǝndi apǝri ɗǝnga yarɛ nǝr ndǝ bǝrkawa dar adai aka paida wɛ.” 21Ani dzá, agula tsu adai ata kǝra ndzi wɛ! Sanga sǝ yarɛ nǝgǝri, 22wala Bulusu wala Apaulaus wala Kyafas wala dunya ni wala mpikɛ wala nti wala kulini ni wala saka nam ata si—sang nǝgǝri, 23ba gǝri nǝr Kǝrsti, ba Kǝrsti nǝr Hyal.
Copyright information for
CklSC