1 Peter 3
Ndzaiyir Mwala ba Sal
1 aMwahyi, tsu apani ka gǝri kǝlǝngkǝr ala salǝr gǝri, ani ka ma kǝlara akwa ntsa dar nam kura ada mbǝrsa aka labar Hyal, hankala dar ata si ka dar mbǝrsa. Adi ata ndzai ntsakǝr ala gǝri ka gǝri ndǝr wɛ, 2kadǝbar dar ata wula kǝtsǝkǝtsikur gǝri ba vǝkǝr sǝlai gǝri ala Hyal. 3 bDakwikur gǝri ta dzǝ ta si ata dzǝgudzi nam abǝla, apa nakǝr, ha kulum kaka ainga yarɛ nǝr dinar, ba kari ɗa-ɗa. 4Ata vuiya ǝni ka dzǝ ndzai dzǝgudzi nam akwa ɗǝfu, dakwaikur nǝr kanadi ba ndzai lapiyakur nǝr mambǝlɛ, nam ani ɗa wurwuri akǝma Hyal. 5Akuya ǝni ani whal nam tǝ mwahyi nam tara ndzai kartǝ akwa zaman watsi, nam tara vǝti tǝmá ata Hyal, ada ‘ya dakwikur dar akwa: dar ada kǝlǝngkǝr ala salǝr dar, 6 capa Saratu, nam tara kǝlǝngkǝr ala Ibrahim, tǝ dzǝ ada kǝga tǝni thlakǝrni. Gǝr nkwaiyir ni ma apǝri gǝri ada ‘ya sǝ nam kal-kal, ba kura gǝri ada ngyar whalɛ ka sǝ laka hyivǝrati tǝ gǝri. 7 dSǝli nam aka mwala, tsu apani ka gǝri ndzai kaka mwahyir gǝri aka ngabadzi, apa ala ndǝ nam kura ɓaɓal apa gǝri, ba ka gǝri la dar sǝlai, kadǝbar dar yɛ dar dlutsi vwam kaka gǝri, mpikɛ aka Hyal. ‘Yamɛ ǝni ani ka ta sǝ laka ta kanti whal ‘ya aduwar gǝri.Ɗar Bwanai akuya ‘Ya Ɗakur
8Dǝntari, sanga gǝri ka gǝri ndzai aka ɗǝnga duku, ‘ya damitsǝnidzi ka kǝma gǝri, yiɗamɛ kǝma gǝri apa madar mama ba nkwaiyir mama, ka gǝri tsan kalhur ba tǝrghǝlkǝr ala kǝma gǝri. 9Ta gǝr ta nkyɛ kulɗakur aka kulɗakur wala ngǝlɛ aka ngǝlɛ, ata vuiya ǝni ka gǝri vǝkǝr barka, kadǝbar ǝni ani tǝ Hyal kǝga tǝ gǝri ka gǝri ‘ya, ani ka gǝri ɓui wartar barkar Hyal. 10 eApa rǝbwa-rǝbwa akwa Labar Hyal:“Kǝlara ndǝ nam ada bara ka dzǝ nga sǝɗar ndziyirni
ba ka dzǝ sǝkar akwa dunya,
kǝ ndzai ntsakǝr ka dzǝ ɗǝwar kanyarari ta gha su kulɗa,
ba ka dzǝ ɗǝwar nyari ta labar hawi.
11Kǝ ndzai ntsakǝr ka dzǝ ngyar ‘ya su kulɗa
ka dzǝ ‘ya sǝ ɗa,
kǝ ndzai ntsakǝr ka dzǝ bara ndzai lapiya,
ka dzǝ ɓui tǝni ka dzǝ lǝkǝma akǝri.
12Akuya ntsa Thlaku ata ndzǝ nam ada ‘ya su kal-kal,
ba dzǝ ada sǝthlǝmɛ ala aduwar dar,
ama Thlaku ada mbalnta kǝmari ta ndzǝ nam ada ‘ya sǝ nam kulɗa.” 13Wa ani ata ‘yanta tǝ gǝri ma apǝri gǝri ada bara-bara ‘ya sǝ nam ɗaku? 14 f gAma wala ma gǝr ɗar bwanai akuya ‘ya sǝ nam kal-kal, gǝri ndzǝr barka. “Ta gǝr ta hyivǝr waima, ba ta gǝr ta ɗǝnga.” 15Ama ka gǝr la nggakur ala Kǝrsti akwa ɗǝfa gǝri kadǝbar dzǝ ani Thlakǝr gǝri. Kǝlara saka ndziyamɛ aka ɗǝmhǝdzi ka gǝr sǝnau ala kǝlara ndǝ nam tara yu tǝ gǝri, ka gǝri nkǝrba ala dar ata kǝra tǝmá nam tǝ gǝri akǝri. Ama ka gǝri ‘ya aka kanadikur ba vǝkǝr sǝlai 16ba ka gǝr ndzai aka ɗǝngar ɗǝfu nam kura aka aibai, ani ka ndzǝ nam ada gha su kulɗa ata kǝra halǝr gǝri nam ɗa akwa Kǝrsti ka dar lǝkwa sǝlai gha su kulɗar dar ata kǝra ndɛ. 17Ata ‘ya ɗaku ka ndǝ ɗar bwanai akuya ‘ya sǝ nam ɗaku, ma apǝri ani yiɗǝr Hyal, alaka tǝ ndǝ awa ɗar bwanai ka ‘ya sǝ kulɗa. 18Akuya Kǝrsti nti ka duku ka bikǝr muri, ndɛ kura aka biku ata nyar ndzǝ nam aka biku, ani ka Dzǝ si aka gǝri adzǝ Hyal. Ndǝ tsi tǝni nǝr kumǝr dzɛ, ama ndǝ lari mpikɛ akwa mambǝlɛ. 19Akwa mambǝlǝrni, Dzǝ mwara lǝka nkǝrɛ ala mambǝlɛ yarɛ akwa fǝrsǝna. 20 hƏni ani mambǝlɛ yarɛ nda nam kura ta kǝlǝngkǝr ala Hyal, sakatǝ dzǝ ada sǝkɛ aka kǝmar akwa vǝri yarɛ nam tǝ Nuhu ada mar dzǝlkǝiyir yimǝrni. Ndzǝ yiɗau laka ani akwa dzǝlkǝiyir yimari, sang-sang dar ntsisu, tara ɓui mbatǝdzi atar yimi, 21ba yimi ǝni dludzǝr bamtizǝma nam kulini tara mbatǝ tǝ gǝri yɛ—bamtizǝma ni adi apǝri kǝtsǝnta diɗǝr dzɛ wɛ, ama alkawal nǝr ɗǝngar ɗǝfu nam ɗaku tǝbwar Hyal. Dzǝ mbatǝ tǝ gǝri atar hyatǝr Yɛsu Kǝrsti akwa ntǝnti ni, 22dzǝ nam tara tǝra atahyal ba dzǝ ndzai tǝbwar tsisǝma Hyal—kaka ndzǝr hyantǝr Hyal, ndzǝr wada yarɛ ba dǝna yarɛ akwa kǝlǝngkǝr alari.
Copyright information for
CklSC