‏ 1 Thessalonians 5

1Kulini, madar mama kaka nkwaiyir mama yarɛ, yar ta bara ka yar rǝbwa ala gǝri su ata kǝra saka ba vǝr yarɛ nam tǝ sǝ yarni ata ‘ya wɛ, 2 ^akadǝbar gǝr tǝ kǝr gǝri gǝr zǝndi dzǝri, apǝri vǝr Thlaku ata si apa ndǝr hǝlɛ avǝrvǝri. 3Sakatǝ ndzi ada nkǝrɛ apǝri, ndzai lapiyakur aka kalangkur adai, Kura aka yakǝn ani kǝriku ata ɗǝkǝr ala dar, apa kura aka yakǝn apa tǝ kalǝr yar mwala aka hur nam baga ya, ani whal lǝba adi wɛ.

4Ama gǝri madar mama kaka nkwaiyir mama yarɛ gǝri adi akwa kuthlɛ wɛ ani ka ta vǝr ǝni ta siya ɓui tǝ gǝri kura aka zǝndi apa ndǝr hǝlɛ. 5Gǝr sang madar paraku ba madar tsǝtsi. Mur adi nǝr vǝri wala kuthlɛ wɛ. 6Ani ahani ta muri ta ndzai apa ndzǝ damwa, nam ata hanyi, ama ngyar ka muri ndzai ata mulɛ ba ɓǝlati kǝr. 7Kadǝbar ndzǝr hanyi, avǝrvǝri ani tǝ dar ada hanyi, ndzǝ nam ada sa ka tsi tǝ dar ma avǝrvǝri ani tǝ dar ada sa ka tsi tǝ dar. 8 ^bAma kadǝbar muri nǝr tsǝtsi, ngyar ka mur ɓǝlati kǝr muri, ka mur hakǝr hamnta dzǝri ba yiɗǝdzi apa yangǝr mbu kǝrathlɛ, ba tǝmatsǝniyir ɓui mbatǝdzi apa darar yang. 9Kadǝbar Hyal ta ɗǝmhǝ ala yar ka ɗar bwanai akwa sǝwakur ɗǝfari wɛ, ama ka ɓui whalǝr mbatǝdzi atar Thlakǝr muri Yɛsu Kǝrsti. 10Dzǝ nti ka muri, kadǝbar wala muri ata mulɛ, wala muri ntǝnti muri ata ndzai vwam kaka dza. 11Kadǝbar ǝni, dǝnautsǝniyamɛ kǝma gǝri ba ka gǝri kǝlati kǝma gǝri, tsu apa tǝ gǝri ada ‘ya dzǝri.

Gala ba Thlawardzi

12Kulini, madar mama kaka nkwaiyir mama yar kǝgyǝ tǝ gǝri, ka gǝri la sǝlai ala ndzǝ nam ada kǝthlǝr dzau nam akwa ntsa gǝri, ndzǝ nam ada pwar tǝ gǝri akwa Thlaku, ndzǝ nam ada ɗǝmnya ala gǝri. 13Ka gǝri vǝkǝr sǝlai ala dar nam hang akwa yiɗǝdzi kadǝbar kǝthlǝr dar. Ka gǝri ndzai lapiya kaka kǝma gǝri. 14Yar ada gala tǝ gǝri tsuwɛ madar mama kaka nkwaiyir mama, ka gǝri ɗǝmnya ala ndzǝ nam sǝrwai, ka gǝri dǝnautsǝni ndzǝr hyivǝr, ka gǝri mbanatsǝni ndzǝ nam kura aka dǝnar hyati, ka gǝri mbwai ɗǝfu ala kǝlara ndɛ. 15Ka gǝri vǝdzǝ hankal dzá ta waima ta nkyǝ kǝmangarkur aka kǝmangar, ama tatang vǝri ka gǝri ‘ya ɗakur ala kǝma gǝri nǝr ntǝwhulkur, kaka sanga ndzi.

16Ka gǝri ‘ya kutsari tatang vǝri, 17ka gǝri lǝkǝma aka ‘ya aduwa kura ngyar-ngyar, 18ka gǝri gwaditsǝni ala Hyal akwa kǝlara hal nam tǝ gǝri lǝkwa; kadǝbar ǝni ani sǝ nam tǝ Hyal ada bara ala gǝri akwa Kǝrsti Yɛsu.

19Ta gǝri ta tsai u’ur Mambǝl. 20Ta gǝri ta rutsǝni nabikur. 21Ka gǝri wulba kǝlara su ka gǝri ngǝzi sǝ nam ɗaku. 22Ka gǝri ya pǝɗǝm aka kǝlara dzǝli kulɗakur.

23Ka Hyal aka kǝrni, Hyalǝr lapiyakur ka dzǝ mǝrti tǝ gǝri ka gǝri ndzai nǝni. Ngyar ka sanga mambǝlǝr gǝri, ba sangura gǝri ba dzá gǝri ka dzǝ ndzai kura aka aibai har ka la vǝr siyir Thlakǝr mur Yɛsu Kǝrsti. 24Ndǝ nam ada kǝga tǝ gǝri ni ndǝ nam aka dzǝrkur ani dzǝ ata ‘yati.

25Gǝri nam madar mama kaka nkwaiyir mama, ka gǝri ‘ya ala yar aduwa. 26Ka gǝri thlawar sanga madar mama, aka yiɗǝdzǝr Kǝrsti. 27Yi tsau ala gǝri aka Thlaku apǝri, ka ndǝ kǝratsǝni kakadǝ ni ala dar.

28Ɗakur Thlakǝr muri Yɛsu Kǝrsti ka dzǝ ndzai adzǝ gǝri.