1Ti 2 | CklSC | STEP | Tangkǝma, Yi ada kǝgyǝ tǝ gǝri, apǝri ka gǝr ‘ya kǝgyǝ yarɛ, aduwa yarɛ, ‘ya aduwa ata nyar ndzi damwa yarɛ ba gwaditsǝni ala Hyal akuya ka sanga ndzi

‏ 1 Timothy 2

Gala ata Kǝra Vǝkǝr Sǝlai

1 Tangkǝma, Yi ada kǝgyǝ tǝ gǝri, apǝri ka gǝr ‘ya kǝgyǝ yarɛ, aduwa yarɛ, ‘ya aduwa ata nyar ndzi damwa yarɛ ba gwaditsǝni ala Hyal akuya ka sanga ndzi— 2 akuya ka kuhyi yarɛ ba sanga ndzǝ nam aka wada, apǝri ka muri ndzai akwa lapiyakur kura aka nya ba ndzaiyir Hyalkur ba ndzai akwa whal nam ada si aka vi sǝlai. 3 Əni ni ɗaku, ba ada panyi ɗǝfa Hyal Ndǝr Mbati tǝ muri, 4 dzǝ nam ada bara ka sanga ndzi ɓui mbatǝdzi ba ka dar si ka zǝndi dzǝrkur ni. 5 Akuya Hyal duku ani adai, ba ndǝ nam akwa dabu nam akwa ɓwanga Hyal aka ndzi, dzǝ ani Kǝrsti Yɛsu, 6 dzǝ nam tara hamnta kǝrni akuya ka pǝli sanga ndzi—sakǝida ni ndǝ hamnta ata saka nam kal-kal. 7 ^aBa akuya ka sǝ ǝni tǝ Hyal tara vi tǝra ndǝr nkǝr ndǝrǝr Hyal nam sǝɗa ba ndǝr hyar Hyal, Yi ada nkǝr dzǝri, Yi adi ada hawi wɛ, ba Yi malǝm nǝr hamnta dzǝri nam dzǝri ala ndzǝ nam kura ndǝr Yahudi.

8 Yi ada bara sǝli yarɛ nam ada ndzai ka Hyal akwa kǝlara vui ka dar ‘ya aduwa tǝ dar ada haɓǝti tsiya dar yarɛ kura aka sǝwa ɗǝfu wala ɓwalnya. 9 ^bYi ada bara tsuwɛ mwahyi ka dar ha kari nam ada ndzai kal-kal ala mwala, ka dar ngǝngǝuti kǝr dar aka sǝlai, ta dar ta ‘ya dzǝgu kǝrǝr agula wala ha sǝr dzǝgu dzɛ nǝr dinar wala nǝr dzǝli paya yarɛ nam dzau wala kariyir ha yarɛ nam dzau, 10 ama aka kǝthlǝr yarɛ nam ɗaku, nam ada ndzai kal-kal aka mwahyi yarɛ nam ada vǝkǝr sǝlai ala Hyal. 11 Mwala ka dzǝ tsǝl sǝ kura aka ‘ya nya ba akwa kǝlǝngkǝr. 12 Yi ta ngyar mwala ka dzǝ hyipǝ sǝ wala ‘ya wada ata kǝra sal wɛ; ntsakǝr ka dzǝ ndzai kǝɗǝk. 13 ^cAkuya Hyal hǝnti Adambu tangkǝma, kama Awa. 14 ^dBa adi Adambu tǝ Satan tara zǝlanta wɛ, ama mwala ni ani tǝ Satan tara zǝlanta ba dzǝ ka ɓǝlnta mabariyir Hyal. 15 Ama mwahyi ata ɓui mbatǝdzi atar ya madar—ma dar lǝkǝma akwa hamnta dzǝri, aka yiɗǝdzi, ba aka hamnta kǝr dar ala Hyal ba ngǝngǝuti kǝr.