1 Timothy 6
1Sanga ndzǝ nam akur yakur falikur ka dar kǝtǝ thlakǝr dar yarɛ apǝri dar mǝzi ka dar la dar sǝlai nam ghǝi-ghǝi, ani ka kura ndǝ awa ngǝlɛ thlǝma Hyal ba sǝr hyipǝr yar. 2Ndzǝ nam tǝ thlakǝr dar yarɛ aka mbǝrsa ta dar ta tsan rutsǝni ala dar kadǝbar dar madar mama yarɛ. Ata vuiya ǝni, ka dar dzakti ‘ya kǝthlǝr ala dar kadǝbar tǝ ndzǝ nam ada nga sǝɗar kǝthlǝr dar ni ndzǝ nam aka mbǝrsa, ba dar aka yiɗǝdzi ala dar. Ka gǝ hyipǝ sǝ yarni, ka gǝ ‘yǝ tǝ dar akǝri.Yiɗǝ Kwapa
3Ma kǝlara ndǝ nam ada hyipǝ sǝr tsǝl nam hawi kura ta lu ala sǝr tsǝl nam dzǝri nǝr Thlaku Yɛsu Kǝrsti ba ala sǝr hyipɛ nǝr Hyalkur, 4dzǝ ada agula aka kǝrni ba dzǝ ta ngaba mima wɛ. Miyirni ka sǝ nam kulɗa akwa lǝkǝdzikur kaka ɓwalnya yarɛ ata kǝra ndǝrɛ nam ada si aka sǝlku, mpa, nya dlawarwarkur, tǝmá sǝ kulɗa 5ba ɓwalnya kǝlara saka akwa ntsa ndzǝ nam tǝ hankala dar sǝwatǝdzi, ndzǝ nam kura tsu aka dzǝrkur ni ba dar ada ɗǝnga apǝri nu Hyal kǝ ndzai whal ɓui kwapa. 6Ama ndzaiyir Hyalkur aka sǝ nam tǝ gɛ ɓui mǝzi ani ɗǝru nam ngga. 7Akuya muri ta si akwa dunya aka mima wɛ, ba muri adi ata kǝlba mima akwa wɛ. 8Ama ma muri aka ɗǝvɛ ba kari ha, sǝ yarɛ ni mǝzi tǝ muri. 9Ndzǝ nam ada bara ka dar ‘ya bǝrba dar ada ɗu akwa sǝr nkǝrti ba kyal ba dar ada lǝkwa dlangkur hang ba mau sǝr yarɛ nam ada ‘yanta ndɛ nam ada ndǝru ndzi akwa whuzanta ndɛ ba santadzi. 10Akuya yiɗǝ kwapa ani ngǝyanga sanga dzǝli kulɗakur. Ndzi laka, akuya dzala ka kwapa, dar pǝranta ta hamnta dzǝri ba dar hau kǝr dar akwa sǝwa ɗǝfu yarɛ.Galar Bulusu ala Timathlawus
11Ama gɛ, ndǝr Hyal, ka gǝ whui ta sanga sǝ yarni, ba ka gǝ nu ‘ya sǝ kalkalkur, ndzai nǝr Hyalkur, hamnta dzǝri, yiɗǝdzi, ɓatǝsu ba kanadikur. 12Ka gǝ mpai mpa nam ɗaku nǝr hamnta dzǝri ni. Ka gǝ ngǝzi mpikǝ nam kura kurkuri ni, nam tǝ ndǝ tara kǝga tǝngɛ kari ba ata kǝrari tǝ gǝ tara nkǝrba sǝ nam ɗaku aka nya gɛ akǝma sakǝida yarɛ hang. 13 aAkǝma Hyal, nam tara la mpikɛ ala sanga su, ba akǝma Kǝrsti Yɛsu, dzǝ nam saka nam tǝ dzǝ ada ndǝrɛ akǝma Pauntiyus Pǝlatus dzǝ nkǝrba ndǝrɛ nam ɗaku ni, Yi tsau ala gɛ 14ka gǝ ɓǝlati tsau ǝni kura aka aibai wala sǝr ngǝlɛ har ka la sakar siyir Thlakǝr muri Yɛsu Kǝrsti, 15nam tǝ Hyal ata si akǝr akwa sakar ni—Hyal, ndǝr barka ba dzǝ duku ɗiɗi ani ngga, Kuhyir kuhyi yarɛ ba Thlakǝr Thlaku yarɛ. 16Dzǝ duku ani kura awa nti, ba dzǝ ada ndzai akwa paraku nam kura ndɛ awa mǝzi ka si kudzǝghɛ adzɛ, dzǝ nam kura ndɛ ta saga wula wala awa mǝzi ka wula. Hǝmɛ ba nggakur kǝ ndzai alari kura kurkuri. Apani. 17Tsau ala ndzǝ nam bǝrba akwa dunyar kulini ni ta dar ta ndzai kǝngɛ wala ka dar puti tǝmatsǝniyir dar ata gǝna, nam kura ndɛ ta zǝndi sǝ nam ata ɓui tǝni, ama ka dar puti tǝmatsǝniyir dar ata Hyal, dzǝ nam ada la muri kǝlara sǝ hang akuya ka nga sǝɗar muri. 18Tsau ala dar ka dar ‘ya sǝ ɗaku, ka dar ndzai bǝrba akwa ‘ya sǝ nam ɗaku, ba ka dar ndzai whuya ba dar ada yiɗɛ la sǝ ala ndzi. 19Akwa whal ǝni dar ata tsaɓtsǝni gǝna ala kǝr dar apa piyartsǝni nam ɓaɓal akuya ka saka nam ata si, ani ka dar ɓui ka ngǝzi mpikǝ nam ani mpikǝ nam dzǝri. 20Timathlawus, ka gǝ wulhǝ sǝ nam tǝ Hyal hau akwa tsiya gɛ. Tabardzi ta ɓwahawi nam kura nǝr Hyalkur ba ta ɓwalnya yarɛ nam tǝ ndzǝ laka ada nkǝrɛ apǝri zǝndi su, ama adi dzǝri wɛ, 21nam tǝ ndzǝ laka nuwɛ ba akwa tǝ dar nu ni dar pǝranta ta hamnta dzǝri ni. Ka ɗakur Hyal ndzai adzǝ gǝri.
Copyright information for
CklSC