2 Corinthians 5
Vui Ndzaiyir Muri nam Atahyal
1Kulini yar zǝndi apǝri ma nguzi nam tǝ muri ada ndzai akwa kulini nǝr dunya whuzantadzi, muri aka kǝi adzǝ Hyal, kǝi nam kura ada ‘yantadzi atahyal, nam kura ndǝ ta tsa tǝ tsai. 2Akuya akwa nguzi ni, muri ada ngyɛ ka bara hadzɛ vui ndzaiyir muri nam atahyal, 3kadǝbar sakatǝ muri hadzǝ tǝni, ndɛ adi ata ɓui tǝ muri anghyaɗu wɛ. 4Akuya sakatǝ muri akwa nguzi ni muri ada whuwhuni ba muri ada nga kǝgǝɓǝkur ata kǝra muri, adi kadǝbar mur ada bara ndzai kura aka kari wɛ, ama kadǝbar mur adi ada bara ka mur ndzai kura kari wɛ ama ka muri hadzɛ kǝiyir muri nǝr ndzai atahyal, ani ka sǝ nam ata nti ni ka ndǝ ndahǝti tǝni tǝ mpikɛ. 5Kulini Hyal ɗǝmhǝi tǝ muri akuya sǝ ǝni ba dzǝ ka hau Mambǝlǝrni akwa ɗǝfa muri ani ka muri zǝndi apǝri dzǝri sǝ ǝni ata siya ‘ya. 6Kadǝbar ǝni, kǝlara saka muri aka dǝnautsǝnidzi ɗaku, ba muri zǝndi apǝri sakatǝ muri ada ndzai aivi akwa dzɛ ǝni muri ada ndzai pǝɗǝm ta thlaku. 7Muri ada ndzai atar hamnta dzǝri, adi atar sǝ nam tǝ muri ada wula wɛ. 8Yar adi aka hyivǝr wɛ, ndǝ Yɛ, ba kudzǝ alai ka Yi tǝra ka ngyar dzɛ ǝni ba ka Yi ‘ya aivi adzǝ Thlaku. 9Ani wala yar aivi akwa dzɛ ǝni, wala yar adi aivi wɛ sǝ nam tǝ yar ada bara ani ka yar panyi ɗǝfari. 10 aAkuya kǝ ndzai ntsakǝr ka mur tsaɓtsǝnidzi akǝma tsakurakǝr hakar Kǝrsti nam tǝ kǝlara ndɛ ata dlutsi wadzǝɓarni akuya ka sǝ yarɛ nam tǝ dzǝ ‘ya sakatǝ dzǝ akwa dzɛ ǝni, wala ɗa wala kulɗa.Kǝthlǝr nǝr Salautsǝnidzi ni
11Tǝng saka ǝnda, yar zǝndi sǝr mi ani hyivǝr Thlaku ni, yar ada ‘ya ha dǝna ka ndǝrhǝ hankala ndzi. Hyal zǝndi ndzaiyir yar, yar aka tǝmatsǝni apǝri gǝr yɛ gǝr zǝndi tǝ yar tsu apani akwa ɗǝngar ɗǝfa gǝri. 12Yar adi ada hǝm kǝr yar ala gǝri kadamwa wɛ, ama yar ada la gǝri saka nam tǝ gǝri ata mǝzi ka agula aka yar, ani ka gǝr mǝzi ka sǝnau ala ndzǝ nam ada agula aka sǝ nam tǝ ndɛ ada wula ata vuiya sǝ nam akwa ɗǝfu ni. 13Ma yar tsu adi akwa hankala yar wɛ, ǝnda ‘ya ata nyar Hyal; ma yar akwa hankala yar kal-kal ǝni ka gǝri. 14Akuya yiɗǝdzǝr Kǝrsti ani ada ha tǝ yar akwa whalɛ kadǝbar yar kurtaka zǝndi apǝri ndǝ pathlu nti akuya ka ndzǝ sang, kadǝbar ǝni ndzǝ sang nti. 15Ba dzǝ nti akuya ka ndzi sang, apǝri ka ndzǝ nam ata mulɛ ta dar ta ɓakta ndzai akuya ka kǝr dar ama akuya ka dzǝ nam tara nti ata nyar dar ba dzǝ hyati kadamwa. 16Ani baditsǝni ata kulini ka lǝkǝma yar tsu adi ada wulɛ ndzǝ apa tǝ kum aka masi ada wul wɛ. Kwa ahani akwa saka tara kwatsǝni yar kǝtǝ Kǝrsti akwa whal ǝni, yar tsu adi ada ‘ya kǝra wɛ. 17Kadǝbar ǝni, kǝlara ndǝ nam akwa Kǝrsti, dzǝ kǝ ‘ya su bǝlin tǝ Hyal tara mǝrti; sǝ nam halhali kǝ tǝra, sǝ nam bǝlin kǝ si! 18Sanga sǝ ǝni hyati adzǝ Hyal, nam tara salautsǝni tǝ muri aka kǝrni atar Kǝrsti ba dzǝ ka la muri kǝthlǝr nǝr salautsǝnidzi: 19apǝri Hyal ada salautsǝni dunya aka kǝrni akwa Kǝrsti, dzǝ adi ada tsǝ bikǝr ndzi ata kǝra dar wɛ. Ba dzǝ ka hau akwa tsiya yar labarǝr salautsǝnidzi ǝnari. 20Kadǝbar ǝni, yar ani wakilǝr Kǝrsti, Hyal ada gha ndǝrǝrni atar yar. Yar ada kǝgyǝ tǝ gǝri ata vuiya Kǝrsti: ka gǝr salautsǝnidzi kaka Hyal. 21Hyal mǝrti tǝni dzǝ nam kura biku ka ndzai ndǝr biku akuya ka muri, ani ka akwa paktsǝnidzǝr muri aka dza muri ata ndzai ani kalkalkur nǝr Hyal.
Copyright information for
CklSC