2 Corinthians 8
Dǝnautsǝnidzi akuya ka ‘Ya Whuyakur
1 aKulini, madar mama, yar ada bara ka gǝri zǝndi ata kǝra ɗakur nam tǝ Hyal tara la ikǝlizǝya yarɛ nǝr Makidauniya. 2Akwa bwaniyir dar nam dzau, kutsariyir dar nam hang ba ngudikurdar nam wur-wur hau tǝ dar ka ‘ya whuyakur. 3Akuya Yi gha apǝri dar hamnta su hang apa tǝ dar mǝzi, ba ɓwalta dǝnar dar ma. Tǝ dar ‘ya aka yiɗǝr dar, 4dar kǝgyǝ tǝ yar aka dǝna ka dar ɓui whalǝr hau mbanar dar akwa kǝthlǝr ndzǝr Hyal ni. 5Ba dar ka ‘yati adi apa tǝ yar tǝmatsǝni ma wɛ, ama dar hamnta kǝr dar ala Thlaku tangkǝma ba ada nuwɛ ala yar apa tǝ Hyal ada bara tǝ dar ka dar ‘ya. 6Ani yar kǝgyǝ Taitus, tǝng tǝ dzǝ kurtaka dzǝrai kǝma-kǝma, ka dzǝ siya dǝnta kǝthlǝr ɗakur ǝni akwa ntsa gǝri. 7Ama tsu apa tǝ gǝri ada ‘ya su ɗawurwur akwa sanga su—akwa hamnta dzǝri, akwa labar, akwa zǝndi su, akwa ufti, ba akwa yiɗǝdzǝr gǝri ala yar—ka gǝri wuti apǝri gǝri ‘ya su ɗawurwur akwa ɗakur hamnta su ni yɛ. 8Yi adi ada la gǝri tsau wɛ, ama Yi ada bara ka Yi dzaba dzǝrkurǝr yiɗǝdzǝr gǝri atar nkǝrti tǝni aka uftiyir ndzǝ damwa. 9Gǝri kurtaka zǝndi hangkur sǝ nam tǝ Thlaku Yɛsu Kǝrsti ‘ya akuya ka gǝri nam kura gǝri awa mǝzi ka ɓui, nam wala tǝ dzǝ bǝrba, ata nyar gǝri dzǝ ndzai ngudi, ani ka atar ngudikur ní gǝri ata ‘ya bǝrba. 10Ba ndá mɛ galarna ata kǝra sǝ nam ɗaku ala gǝri akwa su ǝni: nahunɛ gǝri ani tangkǝma adi ɗiɗi akwa hamnta su wɛ ama akwa bara ka hamnta su yɛ. 11Kulini ka gǝri kuraba sǝ nam tǝ gǝri tara baditsǝni, ani ka uftiyir ‘ya sǝ nam tǝ gǝri akǝri ka dzǝ tsantǝdzi atar ma gǝri ‘yati sǝ yarɛ, kal-kal apa dǝnar gǝri. 12Akuya ma aka yiɗǝr gǝri tǝ gǝr hamnta, ndɛ ata dlutsi sǝr hamnta ni kal-kal apa tǝ ndari akǝr, adi apa kura ndari akǝr wɛ. 13Sǝ nam tǝ yar ada bara adi apǝri ka ndzǝ laka ɓui sǝɗakur ba ka gǝri lǝkwa bwanai wɛ, ama apǝri ka ndzai kalkalkur ɓuidzi. 14Kulini sakatǝ gǝri aka su hang, ba ndzǝr hamnta dzǝri yarɛ nam akwa Yahudi dar adi aka sanga sǝ nam tǝ dar ada bara wɛ, aka sǝr hamntar gǝri dar ata ɓui su ka mǝzi tǝ dar. Kǝtǝ ka lǝkǝma, sakatǝ dar aka su hang, dar ata si akǝri ala gǝri aka sǝ nam tǝ gǝri ada bara. Antǝ ndzai kal-kal ata ɓuidzi, 15 bapa rǝbwa-rǝbwa apǝri: “Ndǝ nam tara tsaɓtsǝni su hang dzǝ adi akǝr hang wur-wur wɛ, ba ndǝ nam tara tsaɓtsǝni su nkyiɗu dzǝ adi akǝr nkyiɗu wur-wur wɛ.”Ndǝ Hya Taitus Atǝra akwa Kwaranti
16Yi usar Hyal, nam tara hau akwa ɗǝfa Taitus uftiyir mbana dzǝli nam tǝ Yi akǝri akuya ka gǝri. 17Akuya Taitus ta dlutsi ɗiɗi sǝ nam tǝ yar gha alari wɛ, ama dzǝ angwa ada si adzǝ gǝri aka ufti ba yiɗǝr ɗǝfari. 18Ba yar ada hya ata dǝrbari zǝr mama nam tǝ sanga ikǝlizǝya yarɛ ada hǝm tǝni akuya ka nkǝr labar Hyal nam sǝɗa. 19Mǝ damwa, ikǝlizǝya yarɛ tsarba tǝni tǝ dzǝ pwar tǝ yar sakatǝ yar mwari aka sǝr hamnta nam tǝ yar ndǝghɛ kadǝbar ka vǝkǝr sǝlai ala Thlaku tǝ kǝrni ba tsanti uftiyir muri akwa mbana ndɛ. 20Yar ada bara kura ndɛ awa ngǝlɛ whal nam tǝ yar ada ndǝghɛ sǝr hamnta hang ni ati. 21 cAkuya yar ada vǝdzǝ hankal ka yar ‘yati sǝ nam kal-kal, adi ɗiɗi ata ntsa Thlaku wɛ ama ata ntsa ndzǝ yɛ. 22Ba kadamwa, yar ada hya zǝr mama muri nam tara tsanti ala yar akwa whal hang apǝri dzǝ aka uftiyir ‘ya su, ba kulini dzǝ akǝr hang kadǝbar dzǝ zǝndi dzǝri apǝri gǝri ada bara hamnta sǝr hamnta ǝni. 23Ma ka Taitus, dzǝ ndǝr kǝthlǝrǝrna ba ndǝr kǝthlǝr akwa ntsa gǝri; ma ka madar mama mur yarɛ ǝnda tsuwɛ, dar ata vuiya ikǝlizǝya yarɛ ba dar ada vǝkǝr sǝlai ala Kǝrsti. 24Kadǝbar ǝni tsantamɛ ala sǝli yarni yiɗǝdzǝr gǝri ba sǝ nam tǝ yar ada agula akwa gǝri kari, ani ka ikǝlizǝya yarɛ wula.
Copyright information for
CklSC