‏

Baditsǝniyir Ndǝrɛ

“Ndǝ nam ngga ni” rǝbwa Kakadu nǝr Sǝɗǝkur tǝ Yawhana ni rǝbwa ala “Mwalara ɗa ni ba ala madarni” nǝhum ada ndǝrɛ ata kǝra ikǝlizǝya ba ndzǝrni. Ndǝr nkyiɗǝ laka ni ani kǝgyǝ akuya ka yiɗǝ kǝmani ba ɗǝmnya ata kǝra ndzǝr hyipǝ hawi ba sǝr hyipǝr dar.

Sǝ yarɛ nam akwa Kuta Kakadu ni

Baditsǝniyir ndǝrɛ (1-3)

Ɓwalkur yiɗǝdzi (4-6)

Ɗǝmnya ata kǝra sǝr hyipǝ hawi (7-11)

Kyahi ndǝrɛ (12-13)

‏ 2 John

1Kakadu ǝni hyati aka Yawhana ndǝ nam ngga ni. Yi ada rǝbwa ala mwala nam tsartsari ni ba madarni, nam tǝ Yi yiɗɛ akwa dzǝrkur ni—ba adi Yi ɗiɗi wɛ, ama sanga ndzǝ nam ada zǝndi dzǝrkur— 2kadǝbar dzǝri ni, ada ndzai akwa muri ba ata ndzai aka muri kura kurkuri.

3Ka Hyal Tada ni ba Yɛsu Kǝrsti, Zǝrǝrni, la muri ɗakur Hyal, kǝtǝrdzi, ba ndzai lapiyakur; ka dar ndzai nǝmuri akwa dzǝrkur ba yiɗǝdzi.

4Yi aka kutsari hang tǝ Yi ɓui laka madar ngɛ ada ndzai akwa dzǝrkur, tsu apa tǝ Tada ni tara tsau ala muri. 5 ^aBa kulini, mwalara ɗa Yi adi ada rǝbwa ala gǝ tsau nam bǝlin wɛ ama nam tǝ muri akǝri tǝng akwa baditsǝni ni. Yi ada kǝgyɛ apǝri ka muri yiɗǝ kǝma muri. 6Ba ǝni ani yiɗǝdzi: apǝri ka muri mwari akwa ngandǝrɛ ala tsawurni yarɛ. Apa tǝ gǝri ngati akwa baditsǝni, tsawurni ani apǝri ka muri mwari akwa yiɗǝdzi.

7Ndzǝr zǝla yarɛ hang, ndzǝ nam kura ta yiɗɛ apǝri Yɛsu Kǝrsti kǝ si akwa kumǝr dzɛ, kǝ lǝba akwa dunya ni. Kǝlara ndzǝli ndzǝ yarni dar ndzǝr zǝla ba dǝgunmar Kǝrsti. 8Ka gǝri ɓǝla kǝr gǝri ta gǝri ta nai ta sǝ nam tǝ muri kǝthlǝr kari, ama ka gǝri siya dlutsi wadzǝɓa ghǝi-ghǝi. 9Kǝlara ndǝ nam tara whui alǝkǝma ba kura ta lǝkǝma akwa hyipǝr Kǝrsti ni dzǝ adi aka Hyal wɛ; ama kǝlara ndǝ nam tara lǝkǝma akwa hyipǝ ni dzǝ aka Tada ba Zǝr ni gyapu. 10Ma kǝlara ndǝ nam ada si adzǝ gǝri ba dzǝ ta si aka hyipǝ ǝni wɛ, ta gǝri ta mwari aka dza ahar gǝri wala dlutsi tǝni. 11Kǝlara ndǝ nam ada dlu tǝni dzǝ ada ndǝghǝi kǝthlǝrǝr kǝmangarkurni.

12Yi aka sǝ hang nam tǝ Yi ada bara ka Yi gha ala gǝri, ama Yi adi ada bara ka Yi rǝbwa ata kakadu wɛ. Ata vuiya ǝni, Yi aka tǝmatsǝni ka Yi mwari adzǝ gǝri ka Yi ndǝrɛ kaka gǝri ntsɛ ka ntsɛ, ani ka kutsariyir yar ka dzǝ ndzai ghǝi-ghǝi.

13Madar nkwar mama gǝri nam tsartsari ada hyanti thlawardzǝr dar ala gǝri.