2 Thessalonians 1
1 aKakadu ǝni hyati aka Bulusu, Silas ba Timathlawus. Yar ada rǝbwa ala ikǝlizǝya nam akwa Tasalaunika, nam nǝr Hyal Tada muri ba Thlaku Yɛsu Kǝrsti. 2Ka Hyal Tada ni muri ba Thlaku Yɛsu Kǝrsti ni la gǝri ɗakur Hyal ba ndzai lapiyakur.Gwaditsǝni ba Aduwa
3Kǝ ndzai ntsakǝr tatang ka yar gwaditsǝni ala Hyal akuya gǝri, madar mama kaka nkwaiyir mama yarɛ, kal-kal ahani, kadǝbar hamnta dzǝri gǝri ada kǝlkǝli ka hang, ba yiɗǝdzǝr kǝlara ndɛ ala kǝma gǝri ada dzagi. 4Kadǝbar ǝni, akwa ntsa ikǝlizǝya yarɛ nǝr Hyal yar ada agula ata kǝra ɓatǝ sǝr gǝri ba hamnta dzǝri akwa sanga bwanai ba nkǝrti yarɛ nam tǝ gǝri ada ɓati. 5Sang ǝni ani sǝ nam tara tsanti apǝri hakar Hyal ani kal-kal, ba ata nyar ǝni ndǝ ata tsu tǝ gǝri apǝri gǝri mǝzi ndzai akwa kuhyikur Hyal, nam tǝ gǝri ada sa bwanai akuya kari. 6Hyal dzǝ ada ‘ya sǝ kal-kal: Dzǝ ata nkyinta aka bwanai ala ndzǝ nam tara ‘ya ala gǝri bwanai 7ba dzǝ ata la gǝri ghǝrbadzi gǝr nam tǝ ndǝ tsanǝ ala gǝri bwanai, ba ala yar yɛ. Əni ata ‘ya sakatǝ Thlaku Yɛsu ata tsantǝdzi atahyal akwa mbar u’u kaka ndzǝr hyantǝr Hyal yarɛ nam aka dǝna. 8Dzǝ ata hakatsǝni ndzǝ nam kura ta zǝndi Hyal ba ndzǝ nam kura ta kǝlǝngkǝr ala ndǝrǝr Hyal nam sǝɗa nǝr Thlakǝr muri Yɛsu. 9 bDar ata sa bwaniyir santadzi nam kura kurkuri ba ndɛ ata ndǝghǝba tǝ dar ta kǝma Thlaku ba adzǝ ɓwalkur dǝnarni. 10Vǝr tǝ dzǝ si tǝ ndɛ ata vǝkǝr nggakur alari akwa ndzǝrni ba dar ata ndatǝdzi akwa ntsa sanga ndzǝ nam tara mbǝrsa. Əni gǝr ma gǝri akwa, kadǝbar gǝri mbǝrsa aka sakǝida nam tǝ yar ‘ya ala gǝri. 11Aka ɗǝnga ǝnǝni, tatang yar ada ‘ya ala gǝri aduwa, apǝri ka Hyalǝr muri tsu tǝ gǝri akwa ntsa ndzǝ nam tara mǝzi kǝgarni, ba apǝri aka dǝnarni dzǝ ata ghǝiyaba kǝlara sǝ nam ɗaku ala gǝri ba kǝlara kǝthlǝr nam tara sǝba atar hamnta dzǝrǝr gǝri. 12Yar ‘ya aduwa ǝni ani ka thlǝma Thlakǝr muri Yɛsu ɓui nggakur akwa gǝri, ba gǝri akwa dza, kadǝbar ka ɗakur nǝr Hyalǝr muri, ba Thlaku Yɛsu Kǝrsti.
Copyright information for
CklSC