2Ti 2 | CklSC | STEP | Timathlawus, zǝrna, ndzai ɓaɓal atar ɗakur Hyal ni nam tǝ Hyal la gɛ akwa Kǝrsti Yɛsu.

‏ 2 Timothy 2

1 Timathlawus, zǝrna, ndzai ɓaɓal atar ɗakur Hyal ni nam tǝ Hyal la gɛ akwa Kǝrsti Yɛsu. 2 Ba sǝ yarɛ nam tǝ gǝ ngati tǝ Yi gha akǝma sakǝida yarɛ hang, ka gǝ nkǝrɛ ala ndzǝ nam tǝ ndzǝ mbǝrsa akǝri ndzǝ nam ata mǝzi ka hyipɛ ala ndzǝ damwa yarɛ. 3 Ka gǝ ɓati bwanai kaka yar apa saudzar Kǝrsti Yɛsu nam ɗaku. 4 Ndǝ nam tǝ dzǝ akwa kǝthlǝr saudza dzǝ adi ada hau kǝrni akwa sǝ nam tǝ ndzǝ kura saudza ada ‘ya wɛ—dzǝ ada bara ka dzǝ panyi ɗǝfa nggar saudza nam tara hau tǝni. 5 Tsu apani, ma kǝlara ndǝ nam akwa pǝpǝlar gyaliyir whuwhui kaka fǝgǝli, dzǝ adi ata ɓui aliyapǝr sǝmkǝr wɛ tar ma dzǝ nu sanam yarɛ nǝr ‘ya pǝpǝla ni. 6 Ndǝr tsǝwhɛ nam tara ‘ya kǝthlǝr dzau ani ata baditsǝni sǝm sǝr fwaku ni. 7 Ka gǝ ɗǝnga ata kǝra sǝ tǝ Yi ada gha ni, akuya Thlaku ata la gɛ tǝ gǝ ata ngaba sǝ yarɛ ni sang.

8 Ka gǝ ɗǝngati Yɛsu Kǝrsti, nam tǝ Hyal hyanti akwa ntǝnti, dzǝ kulfǝr Dauda. Əni ani ndǝrǝr Hyal nam sǝɗa akwa nkǝr ndǝrǝrna. 9 Akuya ka ǝni tǝ Yi ada sa bwanai nam tara tsǝbti mbwa aka tsalala apa ndǝ nam tara sǝwati su kulɗa. Ama ndǝrǝr Hyal adi ada mbwaidzi wɛ. 10 Akuya ǝni Yi ɓati sanga su akuya ka ndzǝ nam tǝ Hyal tsarba, apǝri dar yɛ ka dar ɓui mbatǝdzi, nam akwa Kǝrsti Yɛsu, aka nggakur nam kura kurkuri.

11 Ndǝr ǝni dzǝri:
Ma mur nti kaka dza,
muri ata ndzai kaka dza;
12 ^aMa muri ɓati,
muri ata ‘ya kuhyikur kaka dza.
Ma muri ngǝla tǝni,
dzǝ yɛ dzǝ ata ngǝla tǝ muri;
13 Ma muri adi aka dzǝrkur wɛ,
dzǝ ata ndzai aka dzǝrkur,
akuya ka dzǝ adi ada mǝzi ngǝla kǝrni wɛ.

Ndǝr Kǝthlǝr nam Kal-kal Akǝma Hyal

14 Ka gǝ lǝkǝma aka ɗǝngati ala dar sǝ yarɛ ni. Tsau ala dar akǝma Hyal ta dar ta ndzai ka ɓwanya ata kǝra labar yarɛ; adi aka paida wɛ, ba ɗiɗi ada sǝwati ndzǝ nam ada sǝthlǝmɛ. 15 Ka gǝ ‘ya kwakwaliyir ngɛ nam ɓwaltasang tǝ Hyal awa dlutsi tǝngɛ, ndǝr kǝthlǝr nam kura awa lǝkwa sǝlai ba ndǝ nam ada nkǝrba labarǝr dzǝrkur ni kal-kal. 16 Ka gǝ tabardzi ta labar nam kura nǝr Hyalkur, kadǝbar ndzǝ nam ada ‘ya ada mǝrti tǝ ndzai kura nǝr Hyalkur dar ada dzagǝdzagi. 17 Sǝ nam tǝ dar ada hyipɛ ada kikili apa mbǝlkǝr mǝvɛ. Akwa ntsa dar Himinayus ba Filitus akwa. 18 Ndzǝ yarɛ ni dar pǝranta atǝra ka ngyar dzǝrkur ni. Dar ada nkǝrɛ apǝri hyati akwa ntǝnti kurtaka kwatsǝni, ba dar ada whuzanta hamnta dzǝrǝr ndzǝ laka. 19 ^bAma piyartsǝniyir Hyal nam ɓaɓal ni ada hyati ɓaɓal, aka ɗǝhǝr Hyal ati nam ada nkǝrɛ: “Thlaku ni zǝndi ndzǝ nam nǝni,” ba, “Kǝlara ndǝ nam ada kǝga thlǝma Thlaku ni ntsakǝr ka dzǝ ngyar ‘ya kulɗakur.”

20 Akwa kǝi ngga kariyir kǝthlǝr yarɛ adai adi ɗiɗi nǝr dinar ba lipǝla wɛ, ama kaka nǝr fwɛ ba kariyir hai, nakumari akuya ka kǝthlǝr yarɛ nam aka sǝlai ba nakumari ka kǝthlǝrǝr tatang vǝri. 21 Əni ani tsu apani ata ‘ya aka ndzi. Ma kǝlara ndǝ nam tara kǝtsǝnta kǝrni ta sǝ nam kulɗa, dzǝ ata ndzai kariyir kǝthlǝr nam aka sǝlai, nam tǝ Hyal vi pam ala kǝrni ɗiɗi, dzǝ ata ndzai aka paida ala Thlakǝrni ba ɗǝmhǝdzi ka ‘ya kǝlara kǝthlǝr nam ɗaku.

22 Whui ta mau sǝ kulɗa nǝr wazakur ni, ka gǝ bara ndzai kalkalkur, hamnta dzǝri, yiɗǝdzi ba ndzai lapiya, kaka ndzǝ nam ada kǝga Thlaku ni aka ɗǝfu kǝtsǝkǝtsi. 23 Ta gǝ ta lǝkwa kampiku nǝr dlangkur ba bǝlkǝkur, kadǝbar ada si aka ɓwalnya yarɛ. 24 Ba kǝ ndzai ntsakǝr ta zǝr kǝiyir Thlaku ta ‘ya ɓwanya; ata vuiya ǝni, ntsakǝr ka dzǝ ndzai aka hankal ala kǝlara ndɛ, ka dzǝ mǝzi hyipǝ sǝ ala ndɛ, kura ngǝzǝ sǝ akwa ɗǝfu. 25 Ndzǝ nam ada dǝlthlǝlari ntsakǝr ka dzǝ hau tǝ dar akwa whalɛ aka hankal, akwa tǝmatsǝni apǝri Hyal ata la dar whalǝr tubi tǝ dar awa ɓui ka zǝndi dzǝrkur, 26 ba apǝri dar ata si akwa hankalǝr dar ba ka dar whui asǝba ngyar kyalǝr Satan, nam tara ngǝti tǝ dar faliyir ‘ya sǝ nam tǝ dzǝ ada bara.