‏ Acts 16

Timathlawus Nuti Bulusu aka Silas

1Tangkǝma Bulusu mwari alǝkwa Darbi kama dzǝ tǝra akwa Listra. Akwanda ndǝr nu laka adai tǝ thlǝmari Timathlawus. Angǝri ndǝr Yahudiya nam tara mbǝrsa, ama atǝgǝri ndǝr Gǝriku. 2Madar mama kaka nkwaiyir mama yarɛ nam tara mbǝrsa akwa Listra ba Ikauniyum ada gha su ɗaku ata kǝra Timathlawus. 3Ani Bulusu bara ka dzǝ kǝtǝ Timathlawus adzǝni, ani dzǝ ka thlanta alari katsa. Dzǝ ‘ya ahani kadǝbar sanga ndzǝr Yahudi nam ada ndzai akwa vui yarɛ ǝnda zǝndi apǝri atǝgǝra Timathlawus ndǝr Gǝriku. 4Apa tǝ dar ada mwari akwa mǝlmɛ-mǝlmɛ, tǝ dar ada gha ala ndzǝ ka dar nuwɛ, apa tǝ ndzǝr hya yarɛ kaka ndzǝ ngga-ngga tara kwamtsǝni akwa Ursalima. 5Ani ikǝlizǝya ada ɓui dǝnautsǝnidzi akwa hamnta dzǝri ni ba dar ada dzagǝi hang kǝlara vǝri.

Ndǝ Kǝga Bulusu alǝkwa Makidauniya

6Bulusu kaka ndzǝr mwar ni mwari akwa diyir Firidziya ba Galatiya, kadǝbar Mambǝl Kartǝ ta ngyar tǝ dar ka nkǝr labar Thlaku akwa diyir Asiya wɛ. 7Antǝ dar ka si akwa kǝla Misiya, dar ka hakǝma alǝkwa Bithlǝniya, ama kadamwa Mambǝlǝr Yɛsu ta ngyar tǝ dar wɛ. 8Ani dar kwatsǝni akwa diyir Misiya, ka mwari alǝkwa Taruwasu. 9Akwa kuta vǝr nda Bulusu wulsu, nam tǝ dzǝ wula ndǝr Makidauniya ada hyati ada kǝgyǝ tǝni, “Fǝlba asǝba akwa Makidauniya ka gǝ mbana tǝ yar!” 10Sakatǝ Bulusu wulsu ni, ata saka duku yar ɗǝmhǝdzi ka mwari akwa Makidauniya, kadǝbar yar ada ɗǝnga apǝri Hyal kǝga tǝ yar ka yar nkǝr ndǝrǝr Hyal nam sǝɗa ala ndzǝ nam akwanda.

Lidiya Ndzai Ndǝr Nuwɛ akwa Filibi

11Yar hyati ka lǝkwa sar akwa Taruwasu yar ka mwar daɗu ka tsǝbti Samutaraki, sǝbar arpɛ ba yar ka lǝkwa Niyabulis. 12Akwanda yar tsǝbti Filibi, mǝlmɛ nam ngga akwa diyir Makidauniya akur Rauma. Ba yar ndzai akwanda nǝr vǝr yarɛ.

13Vǝr Sǝbdu yar ka kǝtǝ whal nam nkyiɗu alǝba ta mǝlmɛ ata nya kyagha, vui nam tǝ yar ɗǝnga apǝri ndzǝ ada kǝɓai ka ‘ya aduwa, ba yar ndzai ka ndǝrɛ aka mwahyi laka nam tara tsaɓtsǝnidzi akwanda. 14Pathlu akwa ntsa dar ani Lidiya tara hyati akwa Thliyatira, ndǝr ɗǝlnta kari dinau, nam ada vǝkǝr sǝlai ala Hyal. Apa tǝ dzǝ ada sǝthlǝmɛ ala yar, Thlaku mburnta ɗǝfari ba dzǝ ka dlutsi sǝ nam tǝ Bulusu ada nkǝrɛ. 15Ndǝ ‘ya alari bamtizǝma vwam kaka ndzǝr kuta kǝiyirni, ba dzǝ kǝgyǝ tǝ yar apǝri ka yar ndzai mǝthlǝɓiyirni, dzǝ nkǝrɛ, “Ma gǝri ɗǝnga apǝri dzǝri Yi mbǝrsa akwa Thlaku ni, azǝramɛ ka gǝri ndzai aharna.” Ba dzǝ ka ndǝrhǝ tǝ yar.

Bulusu aka Silas akwa Fǝrsǝna

16Vǝr laka tǝ yar ata kǝra mwari akwa vui ‘ya aduwa, yar ka kǝɓai aka nkwar kǝi laka nam aka mambǝl kulɗa, nam ada lar dǝna tǝ dzǝ ada nkǝrba sǝ nam ata ‘ya alǝkǝma. Ani ahani tǝ dzǝ ada ɓui kwapa hang ala thlakǝrni yarɛ. 17Nkwani ada nu Bulusu ba mambiya yar dzǝ ada lǝlɛ, “Ndzǝ ni dar ani madar kǝiyir Hyal nam ati ta sang, dar si ka nkǝrɛ ala gǝri whal nam tǝ gǝri ata mbatǝdzi.” 18Dza ada lǝkǝma aka ‘ya sǝ ǝni vǝr hangkurari. Ata dǝnta ɗǝfa Bulusu ka sǝwa ba dzǝ ka mbaltǝ kǝrni ka nkǝrɛ ala mambǝl nam kulɗa ni, “Akwa Thlǝma Yɛsu Kǝrsti Yi ada tsau ala gɛ ka gǝ sǝba akwa dza nkwani!” Tsu ata saka ǝnda mambǝl nam kulɗa ni ngyar nkwani.

19Sakatǝ thlakǝr nkwar kǝi ni tara wuti apǝri whal ɓui kwapar dar kǝ sǝwatǝdzi, dar ka ngǝti Bulusu aka Silas ba dar ka ndǝghǝrti tǝ dar alǝkwa kuta kasuku akǝma kuhyir mǝlmɛ yarɛ. 20Dar si aka dar akǝma ndzǝr hakar Rauma ka nkǝrɛ, “Ndzǝ ni ndzǝr Yahudi, ba dar ada sǝzǝwati hankala ndzǝr mǝlmǝr muri, 21atar hyipɛ sǝr kaka nam tǝ mabariyir muri ndzǝr Rauma tara ngǝla wala ‘ya.”

22Ba dlamiyir ndzi ni ka dlǝkǝrdzi ala Bulusu aka Silas, ani ba ndzǝr hakar Rauma ka hau ka ndǝ ngunta kariyir dar ka ngurtsǝni tǝ dar aka kwangyang. 23Aghǝla tǝ ndǝ ngurtsǝni tǝ dar dzǝr dzǝri, ndǝ ka pumbwa tǝ dar akwa fǝrsǝna, ba ndǝ ka tsau ala ndǝr ɓǝla nyavǝr fǝrsǝna ndari ka dzǝ ɓǝla tǝ dar aka hankal. 24Aghǝla tǝ dzǝ dlutsi ndzǝli tsau yarɛ ni, ndǝr ɓǝla pumbwa tǝ dar akwa kuta-kuta nam dzǝr dzǝri ba dzǝ ka mbwai thlǝla dar aka tsalala ata bangǝlang nam kǝgǝɓu.

25Kudzǝghɛ adzǝ kǝrathlǝr vǝri Bulusu aka Silas ada ‘ya aduwa ba har hǝm Hyal, ba laka ndzǝr fǝrsǝna ada sǝthlǝmɛ ala dar. 26Kura aka santa saka di ka ntaudzi aka dǝna nam tara hau tǝ piyartsǝniyir fǝrǝr fǝrsǝna ni tara kǝgǝdzǝtǝdzi. Tǝkǝma sanga nyavǝr fǝrsǝna ni mbugǝrntadzi, ba tsalalar kǝlara ndɛ pughǝldzi whuiyap. 27Ndǝr ɓǝla fǝrsǝna ni hyati ata hanyi, ma dza ta wulɛ nyavǝr fǝrsǝna yarari mbugǝrntadzi patǝlai, dzǝ ndǝrba katsakarǝrni tǝ dzǝ ada bara tsai kǝrni kadǝbar dzǝ kǝtǝ apǝri ndzǝr fǝrsǝna yarni kǝ whui atǝra. 28Ama Bulusu ka ndǝri lǝlɛ, “Ta ga ta ‘yanta kǝrngɛ! Yar sang akwani!”

29Ndǝr ɓǝla ni kǝga ka ndǝ lar tautsi, dzǝ ka whuiya lǝmbwa ka dla aka hyivǝr akǝma Bulusu aka Silas. 30Antǝ dzǝ ka faba tǝ dar asǝba ka yuwɛ, “Thlakǝrna yarɛ, mǝ tǝ Yi awa ‘ya ka Yi ɓui mbatǝdzi?”

31Dar ka sǝnau alari, “Mbǝrsa aka Thlaku Yɛsu, gǝ ata ɓui mbatǝdzi; gɛ ba ndzǝr kǝiyir ngɛ.” 32Antǝ dar ka nkǝrɛ alari labar Thlaku ba ala sanga laka ndzǝ aivi aharni. 33Tsu akwa kuta vǝr ǝnda ndǝr ɓǝla ni kǝtǝ tǝ dar ka kǝtsǝnta mbǝlka dar yarɛ; antǝ kura ka santa saka dza ba sanga yalǝrni ka dlutsi bamtizǝma. 34Antǝ dzǝ ka sivi aka dar aharni ka la dar sǝr sǝmɛ; dzǝ ghǝi aka kutsari, kadǝbar dzǝ si ka mbǝrsa aka Hyal—dza ba sanga yalǝrni.

35Sakatǝ vǝr kuri, ndzǝr hakar Rauma hyanǝba ndzǝr kǝthlǝrǝr dar ala ndǝr ɓǝla fǝrsǝna aka tsau: “Sǝnta mɛ ndzǝ nda.” 36Ani ndǝr ɓǝla ni ka nkǝrɛ ala Bulusu, “Ndzǝr hakar Rauma kǝ tsau apǝri ka ndǝ sǝntá tǝngɛ ba Silas. Kulini gǝri ata mǝzi ka tǝra. Mwaramɛ lapiya.”

37Ama Bulusu sǝnau ala ndzǝr haka yarni: “Dar dlaɓu tǝ yar ata babal kura yuyuwɛ, dar pumbwa tǝ yar akwa fǝrsǝna ama yar yɛ yar ndzǝr Rauma. Ama kulini dar ada bara ka yar tǝra ɗǝwa-ɗǝwa? A’a! Ngyar ka dar si aka kǝr dar ka dar pwarba tǝ yar alǝba!”

38Sakatǝ ndzǝr kǝthlǝr hakar Rauma tara mwari aka ndǝr ni ala ndzǝr hakar Rauma, sakatǝ dar ngati apǝri Bulusu aka Silas ndzǝr Rauma dar ka kǝtǝ hyivǝr. 39Ani ndzǝr hakar Rauma ka si akwa fǝrsǝna ni ka tubi ala dar. Antǝ dar ka pwarba tǝ dar asǝba ta fǝrsǝna ba kǝgyǝ tǝ dar ka dar ngyar mǝlmari. 40Aghǝla tǝ Bulusu aka Silas sǝba akwa kuta fǝrsǝna, dar tǝra ahar Lidiya, vui nam tǝ dar kǝɓai kaka madar mama yarɛ ka dǝnautsǝni tǝ dar. Antǝ dar ka ngyar vui ǝnda.