Act 17 | CklSC | STEP | Bulusu aka Silas kwatsǝni akwa mǝlmǝr Amfipaulis ba Apaulauniya ka si akwa Tasalaunika, vui nam tǝ fǝr vǝkǝr sǝlai nǝr ndzǝr Yahudi adai.

‏ Acts 17

Bulusu aka Silas akwa Tasalaunika

1 Bulusu aka Silas kwatsǝni akwa mǝlmǝr Amfipaulis ba Apaulauniya ka si akwa Tasalaunika, vui nam tǝ fǝr vǝkǝr sǝlai nǝr ndzǝr Yahudi adai. 2 Apa tǝ Bulusu ada ‘ya tatang, dzǝ mwari akwa fǝr vǝkǝr sǝlaiyir ndzǝr Yahudi, vǝr Sǝbdu akwa kǝma ka makǝr dzǝ ndǝrɛ kaka dar akwa Labar Hyal. 3 Dzǝ ka tsǝba ba tsanǝba apǝri kǝ ndzai ntsakǝr Kǝrsti ata ɗar bwanai ba hyati akwa ntǝnti. Dzǝ nkǝrɛ, “Yɛsu ǝni tǝ Yi ada ndǝrɛ ala gǝri ata kǝrni dza ani Kǝrsti.” 4 Laka ndzǝr Yahudi lu ka nuti Bulusu ba Silas, vwam kaka ndzǝ sǝliyir Gǝriku hang nam ada hyivǝr Hyal ba mwahyi yarɛ nam ngga-ngga ɗar hangkurari.

5 Ama ndzǝr Yahudi ada sǝlku; ani dar ka tsaɓtsǝni laka ndzǝ susuwi hang akwa vui kasuku, dar lǝkwa dlangkur ka baditsǝni kura hankalkur akwa mǝlmɛ. Dar ɗǝkǝr ala kǝiyir Dzasaun tǝ dar ada bara Bulusu aka Silas ka dar faba tǝ dar asǝba ala dlamiyir ndzi. 6 Ama saka kura dar ta ɓui tǝ dar akwanda, dar ka ndǝghǝrba Dzasaun kaka laka ndzǝ nam tara hamnta dzǝri asi akǝma ndzǝ nam ngganggar mǝlmɛ, ada pu lǝlɛ gǝm: “Sǝli yarni dar dza ani ada hau sanga dunya akwa bwanai. Kulini dar si akwani, 7 ba Dzasaun ka dlutsi tǝ dar asivi aharni. Dar sang ada ɓǝlnta wadar Kaisar, tǝ dar ada nkǝrɛ apǝri kuhyi damwa adai tǝ ndɛ ada kǝga tǝ Yɛsu.” 8 Sakatǝ dar tara ngati ǝni, dlamiyir ndzǝr kuta mǝlmɛ kaka ndzǝ ngganggar mǝlmɛ hankala dar hyantǝdzi. 9 Antǝ dar ka hau Dzasaun kaka ndzǝ nam aka mbǝrsa yarnda ka vi kwapa ba dar ka sǝntá tǝ dar.

Bulusu ba Silas akwa Bǝriya

10 Tǝnyi aghǝla tǝ vǝr tara ɗi, ndzǝ nam aka mbǝrsa ka hyanti Bulusu aka Silas ka mwari akwa Bǝriya. Sakatǝ dar si akwanda, dar ka mwari akwa fǝr vǝkǝr sǝlaiyir ndzǝr Yahudi. 11 Kulini ndzǝr Bǝriya aka hankal nam ɗaku ta ndzǝr Tasalaunika, akuya dar kurtaka dlutsi ndǝrǝr Hyal aka ufti ba dar ada ghyǝngaba Labar Hyal tatang vǝri ka dar wula tar Bulusu aka Silas ada hyipɛ sǝ nam dzǝri. 12 Kadǝbar ǝni ndzǝr Yahudi hang mbǝrsa, tsu apani tǝ ndzǝ ngganggar mwahyir Gǝriku kaka ndzi sǝliyir dar hang ‘ya.

13 Sakatǝ ndzǝr Yahudi nam akwa Tasalaunika ngati apǝri Bulusu ada nkǝr ndǝrǝr Hyal akwa Bǝriya yɛ, dar mwari akwanda, tǝ dar ada bǝlkǝtsǝni dlamiyir ndzi ba hyanti ɗǝfa dar. 14 Kura aka santa saka laka madar mama yarɛ ka hyanti Bulusu atǝra ata nya kyagha, ama Silas aka Timathlawus ndzai akwa Bǝriya. 15 Ndzǝ sǝli nam tara pwar Bulusu si aka dza akwa Athlɛnsu antǝ dar ka tǝra aka gala ala Silas ba Timathlawus ka dar siya ɓui tǝni bǝtu-bǝtu ma awa ‘ya.

Bulusu Hyipɛ akwa Athlɛnsu

16 Sakatǝ Bulusu tsu ada sǝkǝ tǝ dar akwa Athlɛnsu, dzǝ damitsǝnidzi wurwuri nam tǝ dzǝ wula apǝri mǝlmɛ ndari ghǝi-ghǝi aka mǝlǝm yarɛ. 17 Ani dzǝ mwari akwa fǝr vǝkǝr sǝlaiyir ndzǝr Yahudi ka ‘ya ndǝrɛ ala ndzǝr Yahudi ba ndzǝr Gǝriku nam ada hyivǝr Hyal, tsu apani tǝ dzǝ ada ‘ya akwa vui kasuku tatang vǝri kaka ndzǝ nam tara ɓuidzi akwanda. 18 Albwar ndzǝr Abikuriya ba ndzǝr Sitauyik nam tara zǝndi kakadu baditsǝni ɓwalnya aka dza. Laka dar ada yuwɛ, “Mi tǝ ndǝ ni tǝ nyari hang ni ada bara nkǝrɛ?” Ndzǝ laka ada nkǝrɛ, “Dza ada bara nkǝr ndǝrɛ ata kǝra mǝlǝm yarɛ nam mǝthlǝɓi.” Dar gha sǝni akuya Bulusu ada nkǝr ndǝrǝr Hyal nam sǝɗa ata kǝra Yɛsu ba hyati akwa ntǝntǝrni. 19 Antǝ dar ka kǝtǝ tǝni ka mwari aka dza ata vui kǝltsǝni kǝr ata garǝr Arasa, tǝ dar ka nkǝrɛ alari, “Yar awa zǝndi sǝ ata kǝra sǝr hyipɛ ni nam bǝlin nam tǝ gǝ ada nkǝrɛ ya? 20 Gɛ ada si aka sǝr zǝndi laka yarɛ nam bǝlin ala yar, ba yar ada bara ka yar zǝndi karabwari.” 21 (Sanga ndzǝr Athlɛnsu ba mǝthlǝɓi yarɛ nam ada ndzai akwanda kura aka sǝr ‘ya ama ada ndǝrɛ ata kǝri ba nga sǝ nam aka zǝndi sǝ nam bǝlin yarɛ.)

22 Antǝ Bulusu ka hyati akǝma kǝltsǝni kǝr Arasa ka nkǝrɛ: “Sǝliyir Athlɛnsu! Yi wula apǝri akwa kǝlara whalɛ gǝr kǝ tsanti apǝri gǝr ndzǝr nu mǝlǝm yarɛ tǝm. 23 Akuya sakatǝ Yi ada nuɗɛ ka wulsu tǝ hankal ata dza sǝr vǝkǝr sǝlai gǝri yarɛ, har Yi ɓui muɓwɛ laka aka rǝbwa ni: ALA SƏR VƏKƏR SƏLAI NAM KURA NDƐ TA ZƏNDI. Kulini sǝ tǝ gǝri ada vǝkǝr sǝlai apǝri sǝ laka kura ndɛ ta zǝndi ni Yi ata nkǝrba ala gǝri.

24 ^a“Hyal nam tara hǝnti dunya ba sanga sǝ nam akwa dza ani Thlakǝr ati aka aghǝli ba dzǝ adi ada ndzai akwa fǝr Hyal yarɛ nam tǝ tsiya ndzi yarɛ dza tara tsa wɛ. 25 Ba tsiya ndzi adi ada mǝrti alari su wɛ, apa dzǝ ndǝ nam ada bara su, kadǝbar dzǝ tǝ kǝrni dzǝ ani ada la mpikɛ ala sanga ndzi ba mpihɛ ala sanga sǝ nam damwa. 26 Tangkǝma Hyal mǝrti ndǝ duku antǝ atarni dzǝ ka mǝrti sanga kulfǝr ndzi, apǝri ka dar ghǝiyati sanga dunya; ba dzǝ ka thlanta saka yarɛ ala dar ba kal-kal vui nam tǝ dar ata ndzai. 27 Hyal ‘ya sǝ ǝni akuya ka ndzi bara tǝni ba ma awa ‘ya ka dar sǝbǝ tǝni ba ka dar ɓui tǝni, wala apani dzǝ adi pǝɗǝm ta muri wɛ. 28 ‘Akuya muri ada ndzai akwa dza ba mwari ba ndzai aka mpikɛ.’ Apa tǝ laka ndzǝr rǝbwar gǝri tara gha, ‘Yar ma yar munyar ni.’

29 “Tǝng tǝ muri madar Hyal, muri adi ata kǝtǝ apǝri ndzaiyir Hyal ni dzǝ apa dinar wala lipǝla wala paya—parsu nam tǝ ndǝ dza mǝrti tǝ dabari. 30 Akwa saka tara kwatsǝni Hyal adi ada ɗǝnga sǝ tǝ dar ada ‘ya kura aka zǝndǝr ni wɛ, ama kulini dza dzǝ tsau ala sanga ndzǝ akwa kǝlara vui ka dar tubi. 31 Kadǝbar dzǝ kurtaka ɗǝmhǝ vǝr nam tǝ dzǝ ata ‘ya haka ala dunya akwa whal nam kal-kal atar ndǝ nam tǝ dzǝ kurtaka tsarba. Dzǝ ka tsanti dzǝrkur sǝni ala sanga ndzi atar hyanti tǝni akwa ntǝnti.”

32 Sakatǝ dar tara ngati sǝ ata kǝra hyanti ndɛ akwa ntǝnti, laka dar puti ngusi, ama laka ndzi nkǝrɛ, “Yar ada bara ka yar ɓakta ngati tǝ gǝri kadamwa ata kǝra ndǝr nda.” 33 Ata ǝnda, Bulusu tǝra ka ngyar vui kǝltsǝni kǝr nda. 34 Ndzǝ yiɗau laka nuti Bulusu ba dar ka mbǝrsa aka ndǝr Hyal nam sǝɗa ni. Akwa ntsa dar ani Diyaunisu, pathlu akwa ntsa ndzǝr garǝr Arasa, ba mwala laka yɛ tǝ thlǝmari Damarisu, ba ndzǝ laka damwa.