‏ Acts 18

Bulusu akwa Kwaranti

1Aghǝla ǝni, Bulusu ngyar Athlɛnsu ba dzǝ tǝra akwa Kwaranti. 2Akwanda dzǝ kǝɓai aka ndǝr Yahudi laka tǝ thlǝmari Akila, ndǝr Pauntus. Nam tara hyati ka si akwa Italiya vwam aka mwalarni Pǝrsila, kadǝbar Kǝlaudiyus, tsau apǝri sanga ndzǝr Yahudi ka dar ngyar Rauma. Bulusu mwari ka dzǝ wula tǝ dar, 3kadǝbar kǝthlǝr dar dzǝli duku, ndǝr dzǝgu nguzi, ba dzǝ ka ndzai ka kǝthlǝr kaka dar. 4Kǝlara vǝr Sǝbdu dzǝ ada ndǝrɛ akwa fǝr vǝkǝr sǝlaiyir ndzǝr Yahudi, tǝ dzǝ ada bara ndǝrhǝ hankala ndzǝr Yahudi ba ndzǝr Gǝriku ka dar nu Yɛsu.

5Sakatǝ Silas aka Timathlawus tara hyati akwa Makidauniya, Bulusu ngyar sanga su akuya nkǝr ndǝrǝr nam sǝɗa ala ndzǝr Yahudi, tǝ dzǝ ada nkǝrɛ ala ndzǝr Yahudi apǝri Yɛsu ani Kǝrsti. 6Ama sakatǝ ndzǝr Yahudi tara ngǝla Bulusu ba ngǝngǝl tǝni, dzǝ ɓunta kariyirni yarɛ ba dzǝ ka nkǝrɛ ala dar, “Sanga sǝ nam tara ɓui tǝ gǝri, gǝri dza bara! Tsiyawai tǝbwa hǝi. Ngǝzi ata asǝna Yi ata tǝra akwa ntsa ndzǝ kura Yahudi yarɛ.”

7Antǝ Bulusu hyati ka tǝra ka ngyar fǝr vǝkǝr sǝlaiyir ndzǝr Yahudi nda ka lǝhar ntǝwhulɛ, nam tǝ thlǝmari Taitus Dzustus, ndǝr vǝkǝr sǝlai ala Hyal. 8Kǝrispaus, nam nggar fǝr vǝkǝr sǝlaiyir ndzǝr Yahudi, ba sanga yalǝrni mbǝrsa akwa Thlaku ni; ba ndzǝr Kwaranti hangkurari nam tara ngati tǝni ka mbǝrsa ka dlutsi bamtizǝma.

9Vǝr laka avǝrvǝri Thlaku ka ndǝrɛ ala Bulusu akwa wulsu: “Ta ga ta hyivǝr mai; lǝkǝma aka ndǝrɛ, ta ga ta ndzai kǝɗǝk mai. 10Akuya Yi vwam aka gɛ, ba ndǝ duku nam adi ata tsǝkwa tǝngɛ ba ‘yanta tǝngɛ wɛ, akuya Yi aka ndzi hang akwa kuta mǝlmɛ ni.” 11Ani ahani Bulusu ka ndzai akwanda sǝr fá pathlu aka raita, tǝ dzǝ ada lǝkǝma aka hyipɛ ndǝrǝr Hyal ala dar.

12Sakatǝ Galiyu tara ndzai gumnar Akaya, ndzǝr Yahudi mbwai nya ka ɗǝkǝr ala Bulusu ba dar ka si aka dza akwa vui haka. 13Dar bǝrku tǝni apǝri, “Dza ada ndǝrnta hankala ndzǝr vǝkǝr sǝlaiyir Hyal akwa whal yar nam kura kal-kal aka mabari.”

14Ani ahani apa tǝ Bulusu ata baditsǝni ndǝrɛ, Galiyu nkǝrɛ ala ndzǝr Yahudi, “Ma gǝr ndzǝr Yahudi ada ‘ya bǝrkwɛ ata kǝra aibai nam nkyiɗu wala nam dzau, ata ndzai kal-kal ka Yi si thlǝmɛ ala gǝri. 15Ama tǝng tǝ sǝ ǝnari ata kǝra sǝr yuwɛ ata kǝra labar yarɛ ba thlǝm yarɛ ba mabariyir gǝri—dzǝkutamɛ akwa ɓwanga gǝri. Yi adi ata ndzai ndǝr ‘ya hakar ndzǝli sǝ ǝni yarni wɛ.” 16Ba dzǝ ka kǝdlǝba tǝ dar akwa fǝr haka ndari. 17Antǝ dar sang ka ngǝti Sasthlanisu ndǝ nggar fǝr vǝkǝr sǝlaiyir ndzǝr Yahudi, ba dar ka dlaɓu tǝni tsu akǝma vui haka ndari. Ama Galiyu ta ntǝhi apǝri dar ada ‘ya su wɛ.

Pǝrsila, Akila ba Apalaus

18 ^aBulusu ɗar sǝkar akwa diyir Kwaranti. Antǝ dzǝ ngyar madar mama yarɛ ba dzǝ ka tǝra akwa sar alǝkwa Siriya, ba Pǝrsila aka Akila ka pwar tǝni. Kabutu dzǝ ata lǝkwa sar ka tǝra, dzǝ tadǝrnta sǝsǝr kǝrari akwa Sǝnkǝriya kadǝbar ka mbǝrɛ nam tǝ dzǝ ‘ya. 19Dar si akwa Afisa, vui nam tǝ Bulusu ngyar Pǝrsila aka Akila. Dza aka kǝrni mwari akwa fǝr vǝkǝr sǝlaiyir ndzǝr Yahudi ka ndǝrɛ kaka ndzǝr Yahudi. 20Sakatǝ dar kǝgyǝ tǝni ka dzǝ ndzai hang kaka dar, dzǝ ta yiɗɛ wɛ. 21Ama aghǝla tǝ dzǝ tǝra, dzǝ ‘ya alkawal, “Yi ata ɓakta si ma apǝri yiɗǝr Hyal.” Antǝ dzǝ lǝkwa sar ka baditsǝni tǝra angyar Afisa. 22Sakatǝ dzǝ tsǝbti Kaisariya, dzǝ mwari alǝti ka thlawar ikǝlizǝya ba dzǝ ka tǝra asǝgǝl akwa Antakiya.

23Aghǝla tǝ dzǝ ɗar ndzai akwa Antakiya, Bulusu baditsǝni akwanda ba dzǝ ka mwari akwa vui pam-pam akwa kuta mǝlmǝr Galatiya aka Firidziya, tǝ dzǝ ada dǝnautsǝni sanga ndzǝr nuwɛ.

24Akwa saka ǝnda ndǝr Yahudi laka tǝ thlǝmari Apaulaus, dzǝ ndǝr mǝlmǝr Alizandǝrya, dzǝ si akwa Afisa. Dzǝ ndɛ nam tara zǝndi su, dzǝ aka zǝndi su hang ata kǝra Labar Hyal. 25Ndǝ hyipti alari whalǝr Thlaku, ba dzǝ ada ndǝrɛ aka dǝna ba hyipɛ su ata kǝra Yɛsu kal-kal, wala ahani dzǝ zǝndi bamtizǝmar Yawhana ɗiɗi. 26Dzǝ baditsǝni ndǝrɛ aka dǝna akwa fǝr vǝkǝr sǝlaiyir ndzǝr Yahudi. Sakatǝ Pǝrsila aka Akila ngati tǝni, dar kati tǝni alivi ahar dar ka nkǝrba alari whalǝr Hyal ɗa-ɗa.

27Sakatǝ Apalaus ada bara tǝra akwa Akaya, madar mama yarɛ dǝnautsǝni tǝni ba dar ka rǝbwai ala ndzǝr nu yarɛ akwanda ka dar dlutsi tǝni. Sakatǝ dzǝ si, dzǝ ndzai ndǝr mbana nam ngga ala ndzǝ nam tara mbǝrsa atar ɗakur Hyal. 28Akuya dzǝ ɓwalnya dzau kaka ndzǝr Yahudi akwa ntsa ndzi ba dzǝ tsanti ala dar akwa Labar Hyal apǝri Yɛsu dzǝ ani Kǝrsti.