‏ Acts 19

Kǝthlǝr Bulusu akwa Afisa

1Sakatǝ Apaulaus akwa Kwaranti, Bulusu kǝl whal bǝlami ba dzǝ ka si akwa Afisa. Akwanda dzǝ ɓui ndzǝr nuwɛ yarɛ 2ba dzǝ yu tǝ dar, “Gǝr dlutsi Mambǝl Kartǝ sakatǝ gǝri mbǝrsa?”

Dar sǝnau, “A’a, yar ta ngati ma apǝri Mambǝl Kartǝ adi wɛ.”

3Ani Bulusu yuwɛ, “Antǝ bamtizǝma madi tǝ gǝri tara dluwɛ?”

Dar sǝnau, “Bamtizǝmar Yawhana.”

4 ^aBulusu nkǝrɛ, “Bamtizǝmar Yawhana ǝnda bamtizǝmar tubi. Dzǝ gha ala ndzi ka dar mbǝrsa akwa ndǝ nam ata si aghǝlari, ani akwa Yɛsu.” 5Tǝ dar ngati ǝni, ndǝ ‘ya ala dar bamtizǝma akwa thlǝma Thlaku Yɛsu. 6Sakatǝ Bulusu pukǝr tsiyari ala dar, Mambǝl Kartǝ si ata kǝra dar, ba dar ndǝrɛ aka nya pam-pam ba ‘ya nabikur. 7Sang dar sǝli kum kapu sǝɗɛ nam tǝ ndǝ ‘ya ala dar bamtizǝma.

8Bulusu lǝkwa fǝr vǝkǝr sǝlaiyir ndzǝr Yahudi ba dzǝ ndǝrɛ aka dǝna akwanda nǝr hya makǝr, dzǝ ada labarǝr ndǝrhǝ hankala ndzi ata kǝra kuhyikur Hyal. 9Ama nakuma dar ‘ya kǝngɛ; dar ngǝla mbǝrsa ba dar ada gha su kulɗa akwa ntsa ndɛ ata kǝra whalari. Ani Bulusu ngyar tǝ dar. Dzǝ fati ndzǝr nuwɛ ba dar ada tsǝl su tatang akwa fǝr tsǝl sǝr Tiranusu. 10Əni lǝkǝma nǝr fá sǝɗɛ, ani ka sanga ndzǝr Yahudi ba Gǝriku yarɛ nam ada ndzai akwa diyir Asiya ngati labarǝr Thlaku.

11Hyal ‘ya sǝr ndati yarɛ wur-wur atar Bulusu, 12ani ka wala tawal yarɛ ba sǝr ndǝrkǝr nam tara tsǝkwar tǝni ndɛ ada mwari akǝr ala ndzǝ kura kalang, ba kura kalangkur dar ada kuri ba mambǝl nam kulɗa yarɛ ada sǝba akwa dza dar.

13Laka ndzǝr Yahudi nam ada mwari ka kǝdlǝba mambǝl nam kulɗa ‘ya ka kǝga thlǝma Thlaku Yɛsu ata kǝra ndzǝ nam aka mambǝl kulɗa yarɛ akwa dza dar. Dar ada gha apǝri, “Akwa thlǝma Yɛsu, nam tǝ Bulusu ada ndǝrɛ akǝr ni, Yi tsau ala gɛ ka gǝ sǝba.” 14Madar mama yarɛ murfwɛ, dar madar Sikyiva, dzǝ nggar fǝrist nǝr ndzǝr Yahudiya ani ada ‘ya ǝni. 15Vǝr laka mambǝl nam kulɗa ni sǝnau ala dar, “Yɛsu Yi zǝndi, ba Yi zǝndi sǝ ata kǝra Bulusu, ama gǝr wa?” 16Antǝ ndǝ nam aka mambǝl nam kulɗa ni fǝlɛ ka pwɛ ata dar ba dzǝ ka kwatsǝni dǝnar dar sang. Dzǝ ka dlaɓu tǝ dar nam tǝ dar whui asǝba akwa kǝi anghyaɗu ba pu masi.

17Sakatǝ ndzǝr Yahudi yarɛ ba Gǝriku yarɛ nam ada ndzai akwa Afisa ngati ǝni, hyivǝr ngǝti tǝ dar sang, ba thlǝma Thlaku Yɛsu haɓǝtǝdzi aka hǝmɛ. 18Ndzi hang nam tara mbǝrsa kulini si ka ghaba tǝ nya dar sǝr ‘yar dar nam kulɗa ata babal. 19Ndzi hang nam ada ‘ya ighakur si aka kakadǝr dar atakǝmaduku ka mbanta tǝ dar akwa ntsa ndzi. Sakatǝ dar kǝltsǝni hangkur kwapar kakadu yarni, sangkurari ‘ya kumthlani kumɛ ka ntufuthlani kwapar lipǝla. 20Akwa whal ǝni labarǝr Thlaku kikilntadzi hang ka kǝlí aka dǝna.

21Aghǝla tǝ sǝ yarni sang tara ‘ya, Bulusu kwamtsǝni apǝri dzǝ ata tǝra akwa Ursalima, tǝ dzǝ ata kwatsǝni akwa Makidauniya ba Akaya. Dzǝ ka nkǝrɛ, “Aghǝla tǝ Yi mwari akwanda, kǝ ndzai ntsakǝr Yi ata lǝkwa Rauma yɛ.” 22Dzǝ hyanti ndzǝr mbana tǝni sǝɗɛ, Timathlawus ba Arastus, alǝkwa Makidauniya, ama dzǝ ɗar ndzai akwa diyir Asiya.

Lǝkǝdzi Hyati akwa Afisa

23Ata saka ǝnda lǝkǝdzi ngga hyati ata kǝra Whalǝr Thlaku. 24Ighar dlǝ lipǝla laka tǝ thlǝmari Dimitriyus, dza ani ada ‘ya fǝr lipǝla nǝr mǝlǝmǝr hyal mwala Atimǝsu. Dza ada si aka kwapa hang ala ndzǝr kǝthlǝr tsi yarɛ.

25Dzǝ kǝgati tǝ dar atakǝmaduku kaka ndzǝr kǝthlǝr dzǝli fǝli nda, ka nkǝrɛ: “Ndzi sǝli, gǝri zǝndi muri ada ɓui ɗǝru hang akwa sanya ǝni. 26Ba gǝri wula ka ngati apa tǝ ndǝ ǝni Bulusu tara ndǝrti ka ndalnta hankala ndzǝ hang akwani akwa Afisa ba akwa sanga diyir Asiya. Dzǝ nkǝrɛ apǝri hyal yarɛ nam tǝ ndǝ dza mǝra adi hyal yarɛ tǝm wɛ. 27Bwanai adai adi ɗiɗi apǝri thlǝma fǝliyir muri ɗaku ni ata ɗi wɛ, ama tsuwɛ apǝri thlǝma fǝr Hyal mwala Atimǝsu nam ngga ni ata ndzai kura paida. Antǝ hyal mwala nam tǝ sanga diyir Asiya ba dunya ada vǝkǝr sǝlai adi ata ɓui hǝmɛ nam ɗa aka ndzi kǝra wɛ.”

28Sakatǝ dar ngati ǝni, ɗǝfa dar mbutǝdzi ba dar baditsǝni lǝlɛ: “Atimǝsu nǝr Afisa dza ngga!” 29Tǝkǝma mǝlmɛ ni sang lǝkwa pu lǝlɛ. Ndzǝ ni ngǝti Gayus ba Aristakus, ndzǝr mwarǝr Bulusu tara hyati akwa Makidauniya, dar ka whui apa ndǝ duku alǝkwa vui tsaɓtsǝnidzi nam ngga ni. 30Bulusu ada bara ka dzǝ sǝba akǝma dlamiyir ndzi, ama ndzǝr nuwɛ adi awa ngyar tǝni wɛ. 31Wala laka ndzǝ ngganggar mǝlmɛ, nam pazǝr Bulusu yarɛ, hyanti alari kuɗahu ada kǝgyǝ tǝni ta dzǝ ta yiɗɛ ka si akwa vui tsaɓtsǝnidzi nam ngga ni.

32Kulini laka akwa tsaɓtsǝnidzi ni ada lǝlɛ ka sǝ duku ba laka ada lǝlɛ ka su damwa. Kǝlara ndɛ lǝkwa yakatsǝnidzi ba hanga ndzǝ yarni ta zǝndi wala kami tǝ dar akwanda wɛ. 33Ndzǝr Yahudi mbiyati Alizanda alǝkǝma, ba nakuma dlamiyir ndzǝ ni ɗǝmnya alari. Dzǝ ɓak tsai ka ndǝ ndzai kǝɗǝk akuya ka dzǝ nkǝrba sǝ nam tara ‘ya akǝma ndzi. 34Ama sakatǝ dar vuti apǝri dzǝ ndǝr Yahudi, dar sang puti lǝlɛ atakǝmaduku nǝr apa awur sǝɗɛ: “Atimǝsu nǝr Afisa dza ngga!”

35Ndǝr rǝbwar kuta mǝlmɛ ‘yati tǝ dlamiyir ndzi ni ka ndzai kǝɗǝk dzǝ ka gha: “Ndzǝr Afisa, adi sanga dunya dza zǝndi apǝri ndzǝr mǝlmǝr Afisa ani ada ngǝzǝ fǝr Atimǝsu nam ngga ba payar parni nam tara ɗi atahyal ni wɛ? 36Kadǝbar ǝni tǝng tǝ dzǝrkur yarni ndɛ adi awa ngǝla wɛ, gǝri ata ndzai kǝɗǝk ba kura ‘ya su dlang-dlang. 37Gǝri si aka ndzǝ ni akwani, wala ahani nda dar ta hǝlti mima akwa fǝr Hyal yarɛ wɛ wala nkǝr su kulɗa ata kǝra mǝlǝmǝr mur wɛ. 38Ma, apǝri, Dimitriyus ba ndzǝr kǝthlǝr tsiyir ni yarɛ ma apǝri dar aka sǝr sǝwa ɗǝfu tǝ dar ata bǝrkwɛ kǝlara ndɛ, fǝr haka mburmburi ba gumna yarɛ yɛ adai. Dar ata mǝzi mwari aka bǝrkur dar akwanda. 39Ma sǝ laka adai alǝkǝma tǝ dar ada bara si akǝri, kǝ ndzai ntsakǝr ndɛ ata dzǝkuti akwa tsaɓtsǝnidzi nam kal-kal. 40Apa ǝni, muri akwa bwanai ndɛ ata nkǝrɛ apǝri muri ‘ya lǝkǝdzǝkur kadǝbar sǝ nam tara ‘ya asǝna. Akwa labar ni muri adi ata mǝzi ka tsǝba sǝ nam tara si aka lǝkǝdzi ni wɛ, tǝng tǝ sǝ tǝ muri ‘ya sǝni kari adi wɛ.” 41Aghǝla tǝ dzǝ nkǝrba ǝni, dzǝ gha ala ndzi ka dar tǝra.