‏ Acts 10

Karnaliyus Hyanti Ndzi ka Dar Si aka Bitrusu Alari

1Ndǝ laka adai akwa Kaisariya tǝ thlǝmari Karnaliyus, dzǝ ndǝ katsalar saudza kumthlani nam tǝ ndǝ ada kǝga albwar Italiya. 2Dzǝ ndǝr hyivǝr Hyal, dzǝ ada vǝkǝr sǝlai ala Hyal dar sang kaka yalǝrni, dzǝ ada hamnta sataka hang ala ndzǝ nam kura aka su, dzǝ ada ‘ya aduwa ala Hyal kǝlara saka. 3Vǝr laka apa kal-kal saka makǝr nǝr tǝhaku, dzǝ wulsu nam tǝ dzǝ wula ndǝr hyantǝr Hyal ada sǝmbwa adzǝni ka nkǝrɛ alari “Karnaliyus!”

4Karnaliyus sǝzǝrkǝr ntsɛ alari akwa hyivǝr ka nkǝrɛ, “Thlaku, mǝrɛ ǝni?”

Ndǝr hyantǝr Hyal ni sǝnau, “’Ya aduwar ngɛ ba sataka ala ngudi yarɛ Hyal dlutsi apa sǝr hamnta! 5Kulini ka gǝ hya ndzi akwa Dzaupa ka dar kǝgati Simaun nam tǝ ndɛ ada kǝga Bitrusu. 6Dzǝ ada ndzai aka Simaun ndǝr kǝthlǝr kutsi nam tǝ kǝiyirni ata nya manda.”

7Kura aka santa saka ndǝr hyantǝr Hyal ndari ka tǝrarni Karnaliyus ka kǝga ndzǝ sǝɗɛ akwa ntsa madar kǝiyirni ba saudza nam ada hyivǝr Hyal akwa ntsa ndzǝ nam ada kǝthlǝr alari. 8Dzǝ ka nkǝrba ala dar sanga sǝ nam tara ‘ya dzǝ ka hya tǝ dar akwa Dzaupa.

Wulsu nǝr Bitrusu

9Sǝbar arpɛ, tǝ dar akwa mwari dar ka si kudzǝghɛ adzǝ mǝlmɛ, Bitrusu ka fǝlti kǝra fǝr ada ‘ya aduwa ata tsǝtsi talangkǝr. 10Sakatǝ dzǝ ada ‘ya aduwa mi ka kal tǝni, tǝ dzǝ ada bara ka dzǝ sǝm su, ama sakatǝ ndǝ akwa ɗǝmhǝ sǝr sǝmari, antǝ sǝni ka si alari. 11Dzǝ wula atahyal mburntadzi, sǝ laka ngga ada sǝgǝl apa lǝru, ndɛ ada haghǝl tǝni asǝgǝl aka kuɗǝma fwaɗu. 12Akwa kutari, kǝlara mawi yarɛ nam aka thlǝl fwaɗu kaka nam ada mwar tǝ kuta ata dai, kaka ika yarɛ nam atahyal. 13Dzǝ ka ngati kuɗahu apǝri, “Bitrusu, hyati, tsai ka gǝ ɗɛ.”

14Ama Bitrusu ka nkǝrɛ, “A’a Thlaku, Yi ta saga ɗǝ kǝlara sǝ nam tǝ mabari kanti apǝri kura ndǝlang wala ghyǝmbur wɛ.”

15Dzǝ ɓakta ngati kuɗahu ndari nǝr sǝɗǝkur apǝri, “Sǝ nam tǝ Hyal tara kǝtsǝnta ta gǝ ta nkǝrɛ apǝri ghyǝmbur.”

16Sǝ ǝni ‘ya ka makǝr, ndǝ ka lǝti aka lǝru ndari atahyal.

17Bitrusu ka lǝkwa ɗǝnga ata kǝra sǝ ǝni, ba ndzǝ nam tǝ Karnaliyus tara hya nda ka si ɓui kǝi nam tǝ Simaun ada ndzai akwa, ba dar ka hyati abǝla nyatǝfu. 18Dar yuwɛ apǝri ani kǝi tǝ ndǝ laka tǝ thlǝmari Simaun Bitrusu ada ndzai akwani ya?

19Bitrusu tsu ada ɗǝnga ata kǝra sǝ nam tara tsantǝdzi nda, Mambǝlǝr Hyal ka nkǝrɛ alari, “Simaun, nda ndzǝ makǝr ada bara tǝngɛ. 20Hyati ka gǝ sǝgǝl ka gǝri mwar vwam kaka dar, ta gǝ ɗǝnga, akuya Yi ani tara hya tǝ dar.”

21Bitrusu ka sǝgǝl adzǝ dar, dzǝ ka nkǝrɛ, “Nda yɛ, Yi ani tǝ gǝri ada bara ni; kami tǝ gǝri si?”

22Dar nkǝrɛ, “Karnaliyus ndǝ katsalar saudza kumthlani, dzǝ hya tǝ yar. Dzǝ ndǝ nam ɗaku, ndǝr hyivǝr Hyal, sanga ndzǝr Yahudi ada hǝm tǝni, ndǝr hyantǝr Hyal ka gha alari ka dzǝ kǝga tǝngɛ asi aharni ani ka dzǝ ngati ndǝrɛ aka gɛ.”

23Antǝ Bitrusu ka kaivi tǝ dar, dar ka pi atakǝmaduku.

Bitrusu Ahar Karnaliyus

Sǝbar arpɛ Bitrusu ba ndzǝ nam tara hyati adzǝ Karnaliyus baditsǝni mwari ba ndzǝr nu Thlaku laka yarɛ akwa Dzaupa pwar tǝ dar. 24Sǝbar arpɛ dar si akwa Kaisariya vui nam tǝ Karnaliyus ada sǝkǝ tǝ dar. Dzǝ tsuwɛ dzǝ ka kǝgahǝ ndzǝrni yarɛ kaka pazǝrni yarɛ nam kudzǝghɛ. 25Sakatǝ Bitrusu tara livi aharni, Karnaliyus dlutsi tǝ dar dzǝ ka zǝɗi akǝmari ka vǝkǝr sǝlai alari. 26Ama Bitrusu ka hyanti tǝni ka nkǝrɛ alari, “Hyati, Yi ma Yi ndɛ apa gɛ.”

27Bitrusu tsu ada ndǝrɛ alari, dzǝ ka livi ka ɓui ndzǝ hang tara tsaɓtsǝnidzi. 28Bitrusu nkǝrɛ ala dar, “Gǝr zǝndi apǝri, adi kal-kal akwa mabariyir yar ka ndǝr Yahudiya livi akwa kǝiyir ndǝ kura Yahudi apani wɛ, wala mwardzi aka gǝri wɛ. Ama Hyal tsanti alai apǝri, ta Yi ta nkǝrɛ ala kǝlara ndɛ apǝri dzǝ kura kǝtsǝkǝtsi wala ghyǝmbur. 29Kadǝbar ǝni Yi si akwani kura aka ɓwalnya sakatǝ gǝ kǝga tǝra. Kulini nkǝrɛ alai kami tǝ gǝ hya ndɛ alai?”

30Karnaliyus ka sǝnau, “Vǝr fwaɗu tara kwatsǝni apa saka ǝni tǝ Yi aharna ada ‘ya aduwa, saka makǝr nǝr tǝhaku. Tǝkǝma, ndǝ laka aka kariyirni mwapu tiyal ada mbǝlmbǝli ada hyati akǝmawai. 31Ba dzǝ ka nkǝrɛ alai, ‘Karnaliyus, ndǝ ngati aduwar ngɛ, ba satakar ngɛ ala ngudi yarɛ kǝ ɗǝngatǝdzi adzǝ Hyal. 32Hya akwa Dzaupa ala Simaun nam tǝ ndɛ ada ka tǝ Bitrusu, dzǝ mǝthlǝɓi akwa kǝiyir Simaun ndǝr kǝthlǝr kutsi, ndǝ nam ada ndzai ata nya manda.’ 33Ani kura aka santa saka Yi ka hya ndɛ ala gɛ, kǝ ‘ya kal-kal tǝ gǝ si, kulini muri sang muri akǝma Hyal ka sǝthlǝmɛ ala kǝlara sǝ nam tǝ Thlaku tara tsau ala gɛ ka yar ngati.”

34 ^aBitrusu baditsǝni ndǝrɛ, “Kulini Yi zǝndi apǝri Hyal adi ada tsanǝ pampamkur wɛ. 35Akwa kǝlara kulfɛ, dzǝ ada dlutsi kǝlara ndzǝ nam ada hyivǝr tǝni ba ‘ya sǝ nam kal-kal. 36Gǝr zǝndi ndǝ nam tǝ Hyal hyanti ala ndzǝr Izǝraila, tara nkǝr ndǝrǝr Hyal nam sǝɗa nǝr ndzai lapiyakur, atar Yɛsu Kǝrsti nam Thlakǝr sanga ndzi. 37Gǝri zǝndi sǝ nam tara ‘ya akwa diyir Yahudiya sang, baditsǝni akwa Galili, aghǝla tǝ Yawhana tara baditsǝni nkǝr ndǝr nǝr bamtizǝma. 38Gǝri zǝndi ata kǝra tǝ Hyal pukǝr mal ala Yɛsu nǝr Nazarat aka Mambǝlǝr Hyal ba dǝna. Dzǝ mwari akwa kǝlara vui, dzǝ ada ‘ya kǝthlǝr ɗaku ba mbǝti ndzǝ nam tǝ Satan tara mbwai tǝ dar, akuya Hyal vwam aka dza.

39“Yar nam ndzǝr hya yarɛ, yar sakǝidar sanga sǝ nam tǝ dzǝ ‘yati akwa sanga diyir Yahudi, ba akwa Ursalima. Dar tsi tǝni atar kukwanta tǝni ata undzum kadlǝkadlɛ. 40Ama Hyal hyanti tǝni aka mpikɛ aghǝla vǝr makǝr, antǝ Hyal yiɗɛ alari ka dzǝ tsantǝdzi. 41Adi ala kǝlara ndǝ wɛ, ama ala ndzǝr sakǝida nam tǝ Hyal kurta tsarba, nam ani, ala yar nam tara sǝmɛ ba sa atakǝmaduku aka dza, aghǝla tǝ dzǝ hyati akwa ntǝnti. 42Dzǝ tsau ala yar ka yar nkǝr ndǝrǝr Hyal ala ndzi, ba nkǝrba apǝri dzǝ dza ndǝ nam tǝ Hyal kǝlba apa ndǝr haka ata kǝra ndzǝ nam aka mpikɛ ba ndzǝ ntǝnti. 43Sanga nabi yarɛ nkǝrba ata kǝrari, apǝri kǝlara ndǝ nam tara mbǝrsa akwa dza dar ata ɓui kyifǝnta bikǝr dar atar thlǝmari.”

44Tsu tǝ Bitrusu ada nkǝr labar, Mambǝl Kartǝ sǝgǝl ata kǝra sanga ndzǝ nam ada ngati tǝni. 45Ndzǝr Yahudi nam tara mbǝrsa tara si vwam kaka Bitrusu dar ndatǝdzi nam tǝ ndǝ pukǝr ala dar Mambǝl Kartǝ ala ndzǝ kura Yahudi yɛ. 46Akuya dar ngati tǝ dar ada labar aka nya laka pam tǝ dar ada hǝm Hyal.

Antǝ Bitrusu nkǝrɛ, 47“Ndǝ laka adai awa kanti kura ndǝ awa ‘ya bamtizǝma ala ndzǝ ni aka yimi ya? Dar dlutsi Mambǝl Kartǝ apa tǝ muri akǝri.” 48Ani ba dzǝ la dar tsau ka ndǝ ‘ya ala dar Bamtizǝma akwa thlǝma Yɛsu Kǝrsti. Aghǝla ǝnda, dar kǝgyǝ tǝni ka dzǝ ɗar ndzai vwam kaka dar.