‏ Acts 12

Lǝkwa Fǝrsǝna aka Mbulbadzǝr Bitrusu

1Akwa saka ǝnda kuhyi Hirudus Agripa baditsǝni la bwanai ala ndzǝr ikǝlizǝya. 2Dzǝ tsi Yakubu zǝr angǝra Yawhana aka katsakar. 3Sakatǝ dzǝ wula ǝni kǝ ‘ya ɗaku ala ndzǝr Yahudi, dzǝ lǝkǝma ka ngǝti Bitrusu. Əni ‘ya akwa Wudzǝr Mantsǝkǝl kura Thlǝlam. 4 ^aAntǝ dzǝ hau tǝni akwa fǝrsǝna, dzǝ vu tǝni akur ndzǝr ɓǝla nǝr albwa fwaɗu aka saudza fwaɗu-fwaɗu. Hirudus ɗǝmhǝ ka sǝba aka Bitrusu ata babal akuya haka aghǝla Wudzǝr Ngǝmba.

5Ani ndǝ ngǝzi Bitrusu akwa fǝrsǝna, ama ndzǝ nam aka mbǝrsa ada ‘ya aduwa aka dǝna ala Hyal akuya dza.

6Avǝrvǝri kabutu Hirudus awa sǝba aka dza ka haka, Bitrusu ada hanyi akwa ɓwanga saudza sǝɗɛ, ndǝ mbwai tǝni aka tsalala sǝɗɛ, ba ndzǝr ɓǝla ada hyati abǝla nyavǝr. 7Tǝkǝma ndǝr hyantǝr Hyal Thlaku tsantǝdzi ba paraku ka mbǝli akwa fǝrsǝna. Dzǝ tsarar Bitrusu ata ghyimbiyari ka hyanti tǝni ata hanyi. Dzǝ ka nkǝrɛ “Hyati, bǝtu!” Ba tsalala nam ata tsiyari ka pughǝldzi.

8Antǝ ndǝr hyantǝr Hyal nkǝrɛ alari, “Hati kariyir ngɛ ba ɓǝɓai.” Ba Bitrusu ‘yati apani. Ndǝr hyantǝr Hyal ka gha alari, “Hakǝr lǝkutǝr ngɛ nam ngga ka gǝ nu tǝra.” 9Ani Bitrusu hyati ka nu ndǝr hyantǝr Hyal ni, ama akwa sanga saka nda dzǝ ada ɗǝnga apǝri wulsu. Dzǝ ta zǝndi apǝri sǝ ǝni dzǝri wɛ. 10Dar kwatsǝni ndǝr ɓǝla nǝr tang aka nǝr sǝɗǝkur ka si adzǝ nyatǝfur yang nam ada lǝkwa kuta mǝlmɛ. Dzǝ ka mburntadzi ala dar tǝ kǝrni dar ka lǝba ati. Sakatǝ dar ɗar mwari nkyiɗǝ laka akwa kuta mǝlmɛ, tǝkǝma ndǝr hyantǝr Hyal ni ka ngyar tǝni.

11Antǝ Bitrusu ngaba sǝ nam tara ‘ya alari, dzǝ ka nkǝrɛ, “Kulini Yi zǝndi kura aka dzamɛ Thlaku ni hyanti ndǝr hyantǝrni ka mbuli tǝra akwa tsiya Hirudus ba akwa kǝlara su tǝ ndzǝr Yahudi ada bara ka dar ‘ya!”

12Sakatǝ dzǝ ngaba ǝni, dzǝ ka mwari ahar Maryamu angǝra Yawhana Markusu, vui nam tǝ ndzǝ hang tara tsaɓtsǝnidzi akuya aduwa. 13Dzǝ tsa nyatǝfu, ba nkwar kǝi tǝ thlǝmari Rauda si ka mbur nyavǝr. 14Sakatǝ dzǝ ngaba kuɗaha Bitrusu, dzǝ ka ‘ya kutsari dzǝr dzǝri apǝri, ata vuiya tǝ dzǝ awa mburnta nyavǝr, dzǝ dzakti whuiya livi ka nkǝrɛ ala sanga ndzi, “Bitrusu ada hyati anyavǝr!”

15Dar nkǝrɛ alari, “Gǝ adi akwa hankala gǝ wɛ.” Sakatǝ dzǝ lǝkǝma aka nkǝrɛ apǝri ahani, dar ka nkǝrɛ, ata ‘ya ndǝr hyantǝr Hyalǝrni.

16Har ba kulini Bitrusu lǝkǝma aka tsa, sakatǝ dar mburnta nyatǝfu ka wula tǝni, dar ka ndatǝdzi. 17Dzǝ ɓak tsai ala dar ka dar ndzai kǝɗǝk. Ba dzǝ ka tsǝba ala dar whal nam tǝ Thlaku tara kǝlba tǝni akwa fǝrsǝna. Antǝ dzǝ nkǝrɛ ala dar, “Gha ala Yakubu ba laka madar mama sǝ nam tara ‘ya.” Antǝ dzǝ ka tǝra akwa vui damwa.

18Sǝbar arpɛ, adi su nkyiɗu tara ‘ya akwa ɓwanga saudza yarɛ ata kǝra sǝ tara ɓui Bitrusu wɛ. 19Aghǝla tǝ Hirudus hau ka ndǝ bara tǝni ba ndǝ ta ɓui tǝni wɛ, dzǝ ka ghyǝnga ndzǝr ɓǝla yarni ba dzǝ ka hau apǝri ka ndǝ tsi tǝ dar.

Ntǝr Hirudus

Aghǝla ǝni Hirudus ngyar Yahudiya ka ndzai akwa Kaisariya nǝr vǝr nkyiɗǝ laka. 20Kulini ɗǝfa Hirudus sǝwa dzǝr dzǝri aka ndzǝr Taya ba ndzǝr Sidaun. Tǝ dar ka hyanti ndzi ka dzǝgu ɓwanga dar aka dza kadǝbar mǝlmǝr dar ada vǝtǝ kǝr ata diyir Hirudus akuya ka ɓui sǝr sǝmɛ. Aghǝla tǝ dar kǝgyiba kǝra Bilastasa ndǝ nam ada mbana Hirudus.

21Tǝ vǝr nam tǝ dar tara thlanta nda tara si, Hirudus ka hati kariyir kuhyikurni, dzǝ ka ndzai ata dǝgǝl kuhyikurni, tǝ dzǝ ada labar ala dar. 22Dar puti lǝlɛ, tǝ dar ka nkǝrɛ apǝri, “Əni kuɗaha hyal laka, adi kuɗaha ndǝ wɛ!” 23Kura aka santa saka ba ndǝr hyantǝr Hyal ka baktsǝni Hirudus, akuya dzǝ ta la nggakur ala Hyal wɛ, ba kwaɗǝna yarɛ ka ɗǝnya tǝni har tǝ dzǝ ka nti.

24Ama ndǝrǝr Hyal ada dzakti kǝlkǝlí hang aka dǝna.

25Sakatǝ Barnabas aka Sawulu tara kurai kǝthlǝrǝr, dar ngyar Ursalima dar kǝtǝ Yawhana nam tǝ ndǝ ada ka tǝ Markusu adzǝ dar.