‏ Acts 13

Ndǝ Hyanta Barnabas aka Sawulu

1Akwa ikǝlizǝya nam akwa Antakiya nabi yarɛ ba malǝm yarɛ adai: Barnabas, Simiyaun (nam tǝ ndɛ ada ka tǝni tǝ ndǝ Mǝngǝl), Lukiyusu ndǝr Kairani, ba Manayin (nam tǝ dar kǝl vwam kaka kuhyi Hirudus), ba Sawulu. 2Vǝr laka apa tǝ ndzǝ yarni akwa fǝr vǝkǝr sǝlai ala Thlaku ba asam, Mambǝl Kartǝ nkǝrɛ, “Tsarba mɛ alai Barnabas aka Sawulu, ka kǝthlǝr nam tǝ Yi tara ka tǝ dar kari,” 3Ani aghǝla asam aka aduwa, dar ka pukǝr tsai ala dar ka hyanti tǝ dar ata whalǝr dar.

Barnabas aka Sawulu akwa Kuburus

4Ani Mambǝl Kartǝ hyanti Barnabas aka Sawulu alǝba. Dar ka mwari akwa vui fǝl sarǝr yimi nǝr Salukiya, antǝ dar ka lǝkwa Kuburus di nam tǝ yimi tara dlǝti. 5Sakatǝ dar si akwa Salamis dar ka nkǝr ndǝrǝr Hyal nam sǝɗa akwa fǝr vǝkǝr sǝlai ala Hyalǝr ndzǝr Yahudi. (Dar kǝtǝ Yawhana Markusu ka mbana tǝ dar.)

6Aghǝla ǝnda dar nuti sanga diyir Kuburus har tǝ dar si akwa Bafusa. Akwanda dar kǝɓai aka ndǝr Yahudiya laka ada ‘ya igha ba nabiyir hawi tǝ thlǝmari Bar-Yɛsu, 7dzǝ ndǝr kǝthlǝr ala gumna ni Sǝrgiyus Bulusu, ndǝ nam bǝrkawa. Gumna ni kǝga Barnabas aka Sawulu ka dar si adzǝni, kadǝbar dzǝ ada bara ka dzǝ ngati ndǝrǝr Hyal. 8Ama igha ni, nam tǝ thlǝmari ani Aliman akwa nyar Gǝriku, kanti ala dar ba ndǝrnta hankala gumna ni kura dzǝ awa nga labar Sawulu aka Barnabas. Dzǝ ada ‘ya ka dzǝ kanti ala gumna ni kura dzǝ awa mbǝrsa. 9Antǝ Sawulu, nam tǝ ndǝ zǝndi aka Bulusu ghǝi-ghǝi aka Mambǝl Kartǝ, dzǝ ka wul igha ndari taku. 10Antǝ dzǝ nkǝrɛ, “Gǝ zǝr Satan, ghǝi-ghǝi aka sǝr zǝla ba dlǝrpǝkur, ba kǝmangarkur ka sǝ nam ɗaku! Gɛ adi ata ngyar ndǝgalnta whal dzǝrkur nǝr Thlaku ni wɛ? 11Kulini tsiya Thlaku ata kǝra gɛ, gǝ ata ‘ya ghyang, gǝ adi ata wula parakǝr tsǝtsi wɛ nǝr saka laka.”

Kura aka santa saka ani mpurɗu aka kuthlɛ ka mbui ntsari, dzǝ baditsǝni bara ndǝ nam awa ngǝzi tsiyari ka ndǝr tǝni. 12Sakatǝ gumna tara wula sǝ nam tara ‘ya, dzǝ ka mbǝrsa, akuya dzǝ ndatǝdzi aka sǝr hyipɛ ata kǝra Thlaku.

Bulusu aka Barnabas akwa Antakiya nǝr Pisidiya

13Bulusu kaka pazǝr mwarǝrni yarɛ tǝ dar hyati akwa Bafusa akwa sar yimi, tǝ dar ka tsǝbti Pǝrga akwa diyir Pamfiliya. Yawhana Markusu ngyar tǝ dar ka ɓiti asi akwa Ursalima. 14Ama Barnabas aka Bulusu hyati akwa Pǝrga ka si akwa Antakiya nǝr Pisidiya. Vǝr Sǝbdu dar mwari akwa fǝr vǝkǝr sǝlai ala Hyalǝr ndzǝr Yahudi ka ndzai. 15Aghǝla tǝ ndǝ kǝratsǝni kakadǝr mabariyir Musa ba nǝr nabi yarɛ, ndzǝ nam ngga-ngga ata kǝra fǝr vǝkǝr sǝlaiyir ndzǝr Yahudi ka hyanti ala dar ndǝrɛ, “Madar mama, ma gǝri aka ndǝrǝr dǝnautsǝni ala ndzi azǝramɛ ka gǝri hamnta.”

16Ani Bulusu ka hyati, ka haɓǝtǝ tsiyari ka baditsǝni ndǝrɛ: “Gǝri ndzǝr Izǝraila, tǝ dzǝ nkǝrɛ, ba gǝri ndzǝ kura Yahudi nam ada hyivǝr Hyal, siyamɛ thlǝma alai! 17 ^aHyalǝr ndzǝr Izǝraila tsarba kakár muri yarɛ ka mǝrti tǝ dar ka kǝlí ɓaɓal akwa ndzaiyir mǝthlǝɓikur dar akwa diyir Masar. Antǝ aka dǝnarni tǝ dzǝ faba tǝ dar akwa falikur, 18 ^bfárni fwaɗu thlani tǝ dzǝ ada kǝl kǝmar ala dar akwa ntaku, 19 ^cdzǝ ka huzanta ndzǝli pam-pam murfwɛ akwa diyir Kan’ana ba dzǝ ka la diyari ala Izǝraila ka warta. 20 ^dSang ǝni kǝtǝ fá kumthlani fwaɗu aka ntufuthlani.

“Aghǝla ǝnda, Hyal la dar ndzǝr haka har sakar zamanǝr nabi Samaila. 21 ^eAta saka ǝnda dar kǝgyǝ ka ndǝ la dar kuhyi, ba Hyal ka la dar Sawulu zǝr Kisu. Dzǝ ndǝr ndzǝliyir Bandzami, nam tara ‘ya kuhyikur nǝr fá fwaɗu thlani. 22 ^fAma Hyal ka kǝlba Sawulu ka hau Dauda, ndǝ nam tǝ Hyal ndǝrɛ ata kǝrari, ‘Dauda zǝr Dzɛsi ndǝ nam ata ɗǝfawai; dzǝ ata ‘ya kǝlara sǝ nam tǝ Yi ada bara tǝni ka dzǝ ‘ya.’

23“Hyal ‘ya alkawal apǝri ndǝ laka akwa ntsa kulfǝr Dauda yarɛ, ata si ka mbati ndzǝr Izǝraila, ndǝ ni ani Yɛsu. 24 ^gKabutu dzǝ ata si, Yawhana ndǝr ‘ya bamtizǝma nkǝr ndǝrǝr Hyal nam sǝɗa apǝri sanga ndzǝr Izǝraila ka dar tubi ta bikǝr dar ka dar si adzǝ Hyal ka ndǝ ‘ya ala dar bamtizǝma. 25 ^hApa tǝ Yawhana tara ‘ya kudzǝghɛ aka kurai kǝthlǝrǝrni, dzǝ ka nkǝrɛ apǝri, ‘Gǝri ada ɗǝnga apǝri Yi wa? Yi adi ani dza wɛ. A’á, ama dzǝ ata si aghǝlawai, ndǝ nam wala ɓǝɓaiyirni ma Yi ta mǝzi mpǝli wɛ.’

26“Madar mama, madar Ibrahim, ba ndzǝ kura Yahudi nam ada hyivǝr Hyal akwa ntsa gǝri, Muri ani tǝ ndǝ hyanti ala muri labar mbatǝdzi ǝnǝni. 27Ndzǝ nam akwa Ursalima, ba ndzǝ nam ngganggar dar, dar ta zǝndǝba apǝri Yɛsu ani Ndǝr Mbati nam tǝ nabi yarɛ tara ndǝrɛ ata kǝrni wɛ. Ata vuiya ǝni dar hakatsǝni tǝni, ba akwa ‘ya ǝni dar ghǝiyaba ndǝrǝr nabi yarɛ nam tǝ ndǝ ada kǝratsǝni tatang vǝr Sǝbdu. 28 ⁱWala tǝ dar ta ɓui tǝni aka bikǝr mima nam tǝ ndɛ awatsi tǝni akǝr wɛ, dar kǝgyǝ Pǝlatus ka ndǝ tsi tǝni. 29 ^jSakatǝ dar kuraba sanga sǝ nam tǝ nabi yarɛ nkǝrɛ ata kǝrari, dar kǝli tǝni ata undzum kadlǝkadlɛ dar ka panyi tǝni akwa kulɛ. 30Ama Hyal hyanti tǝni akwa ntǝnti! 31 ^kAghǝla vǝr hang dzǝ tsanti kǝrni ala ndzǝ nam tǝ dar hyati vwam akwa Galili ka lǝkwa Ursalima, kulini dar dza ndzai sakǝidarni ala ndzǝr Izǝraila.

32 ^l“Ani kulini yar si ala gǝri aka nkǝr ndǝrǝr Hyal nam sǝɗa. Alkawal nam tǝ Hyal ‘ya ala kakár muri yarɛ, 33Hyal kǝ ghǝiyaba ala muri, muri nam madar dar, atar hyanti Yɛsu akwa ntǝnti. Apa rǝbwa-rǝbwa akwa kakadǝr zabura nǝr sǝɗǝkur:
“‘Gǝ dza Zǝrna;
asǝna Yi kǝ ndzai Babar ngɛ.’

34 ^mAkuya Hyal ‘ya alkawal apǝri dzǝ ata hyanti tǝni akwa ntǝnti, dzǝ adi ata ngyar tǝni ka dzǝ yiɗantadzi akwa kul wɛ. Dzǝ nkǝrɛ,
“‘Yi ata la gǝ barka dzǝri apa tǝ Yi ‘ya alkawal ala Dauda.’

35 ⁿKakadǝr zabura nkǝrba akwa vui damwa:
“‘Gǝ adi ata ngyar Ndǝ Kartǝr ngɛ ka dzǝ yiɗantadzi akwa kul wɛ.’

36“Aghǝla tǝ Dauda ‘ya kǝthlǝr ala ndzi akwa zamanǝrni apa tǝ Hyal ada bara. Dzǝ pi kura hyati ndǝ ka harnta tǝni kaka kakárni yarɛ dzǝ ka yiɗantadzi. 37Ama ndǝ nam tǝ Hyal tara hyanti akwa ntǝnti dzari ta yiɗa wɛ.

38“Madar mama yarɛ, siyamɛ thlǝmɛ! Yar ada bara ka gǝri zǝndi apǝri atar Yɛsu tǝ ndǝ nkǝrnta ala gǝri kyifǝnta bikǝr gǝri. 39Kǝlara ndǝ nam tara mbǝrsa aka dza dzǝ kǝ ndzai kal-kal akǝma Hyal, ǝni ani sǝ nam kura mabariyir Musa ata mǝzi ka ‘yati. 40Ka gǝ vǝdzǝ hankal ta gǝri ta ngyar labar nabi yarɛ ka dzǝ ɗǝkǝr ala gǝri. Akuya dar nkǝrɛ,
41 ^o“‘Wulamɛ, gǝri ndzǝr rutsǝni,
ka gǝri ndatǝdzi ba nti,
akuya Yi ata ‘ya sǝ laka akwa zamanǝr gǝri
sǝ nam kura gǝri awa mbǝrsa,
wala ma ndǝ laka nkǝrɛ ala gǝri ata kǝri.’”

42Apa tǝ Bulusu aka Barnabas ngyar fǝr vǝkǝr sǝlaiyir ndzǝr Yahudi vǝr nda, ndzǝ ka kǝgyǝ tǝ dar apǝri ka dar ɓǝla si ‘ya ndǝrɛ ata kǝra sǝ ǝni yarni kadamwa akwa vǝr Sǝbdu nam ata si. 43Sakatǝ ndǝ salamtsǝni ndzi, ndzǝr Yahudi hang ba ndzǝ kura Yahudi nam ada hyivǝr Hyal ka nu Bulusu aka Barnabas, nam tara ndǝrɛ ala dar ba galatsǝni tǝ dar ka dar lǝkǝma akwa ɗakur Hyal.

44Akwa vǝr Sǝbdu nam ada nuwɛ, kudzǝghɛ adzǝ sanga ndzǝr kuta mǝlmɛ sǝba ka nga tǝ dar ada nkǝr labar Thlaku. 45Ama sakatǝ laka ndzǝr Yahudi tara wula dlamiyir ndzi, dar ka ‘ya sǝlku; dar ka ɓwalnta nyar kǝlara sǝ nam tǝ Bulusu tara nkǝrɛ.

46Antǝ Bulusu aka Barnabas nkǝrba ala dar aka dǝna ata babal apǝri, “Kǝ ndzai ntsakǝr apǝri tangkǝma ka yar nkǝr ndǝrǝr Hyal ala gǝr nam ndzǝr Yahudi. Ama tǝng tǝ gǝri ngǝla ba gǝri ka hakatsǝni kǝr gǝri apǝri gǝri adi ata mǝzi ɓui mpikǝ nam kura kurkuri wɛ, yar ata ndalti ala ndzǝ kura Yahudi. 47 ^pAkuya ǝni ani tsau nam tǝ Thlaku kǝ la yar:
“‘Yi mǝrti tǝ gǝri paraku ala sanga ndzǝr dunya,
ka si aka mbatǝdzi ala kuɗǝmar dunya sang.’”

48Sakatǝ ndzǝ kura Yahudi tara ngati apani, dar nga sǝɗa ba hǝmnti labar Thlaku ni; ba sanga ndzǝ nam tsartsari akuya mpikǝ nam kura kurkuri ka ndzai ndzǝ nam tara mbǝrsa.

49Ani labar Thlaku ka kikilntadzi akwa di ndari. 50Antǝ ndzǝr Yahudi ka hati kǝr ala mwahyi nam ngga-ngga nam ada hyivǝr Hyal ba ndzǝ ngganggar kuta mǝlmɛ, dar hyanti lǝkǝdzǝkur ala Bulusu aka Barnabas ka kǝdlǝba tǝ dar abǝla ta kuta mǝlmɛ. 51 ^qAni dar ka ɓunta bǝr-bǝr nam ata thlǝla dar ka dzǝ ndzai sakǝida ata kǝra dar, dar ka tǝra akwa Ikauniyum. 52Ba ndzǝ nam aka hamnta dzǝri ka ghǝi aka kutsari ba aka Mambǝl Kartǝ.