‏ Acts 23

1Bulusu wul Ndzǝr Hakar Yahudi ni daɗu ka nkǝrɛ, “Madar mama, Yi kurta kurai kǝthlǝrǝrna ala Hyal akwa sanga ɗǝngar ɗǝfu nam ɗaku har ka la asǝna.” 2Ata ǝni kuhyir fǝrist Hananiya hau ka ndzǝ nam ada hyihyati kudzǝghɛ adzǝ Bulusu ka dar tsa tǝni ata nya. 3 ^aAntǝ Bulusu gha alari, “Hyal ata tsa tǝngɛ, gǝ nam dza fǝr tǝ ndǝ fati alawa! Gǝ ndzai akwanda tǝ gǝ ada ‘ya alai haka akwa whalǝr mabari, ndza gǝ tǝ kǝrngɛ gǝ ada ɓǝlnta mabari atar hau apǝri ka ndǝ tsa tǝra!”

4Ndzǝ nam ada hyati kudzǝghɛ adzǝ Bulusu nkǝrɛ, “Gǝ ɓati ka ngǝli kuhyir fǝrist nǝr Hyal?”

5 ^bBulusu sǝnau, “Madar mama, Yi ta zǝndi apǝri dzǝ ani kuhyir fǝrist wɛ; akuya rǝbwa-rǝbwa: ‘Ta gǝ ta gha sǝ kulɗa ata kǝra nggar ndzǝr gǝri.’”

6 ^cAntǝ Bulusu, tǝ dzǝ zǝndi apǝri nakuma dar ndzǝr Saduki ba nakuma dar ndzǝr Farisi dzǝ ndǝrɛ aka kuɗahu ngga akǝma Ndzǝr Hakar Yahudi ni, “Madar mama, Yi ndǝr Farisi, zǝr Farisi. Yi ada hyati tǝ ndɛ ada ‘ya alai haka kadǝbar ka tǝmatsǝni nam tǝ Yi akǝri akwa hyati akwa ntǝnti!” 7Sakatǝ dzǝ gha ǝni, ɓwalnya hyati akwa ɓwanga ndzǝr Farisi ba ndzǝr Saduki. Ba tsaɓtsǝnidzi ni ka ndǝghǝbadzi. 8 ^d(Ndzǝr Saduki ada nkǝrɛ apǝri hyati akwa ntǝnti adi wɛ, ba ndzǝr hyantǝr Hyal wala mambǝl yarɛ yɛ adi wɛ, ama ndzǝr Farisi mbǝrsa akwa sanga sǝ yarni.)

9Lǝkǝdzi ngga hyati, ba nakuma malǝmǝr mabari yarni nam tǝ dar ndzǝr Farisi hyati ka ɓwalnya dzau. Dar ka nkǝrɛ, “Yar ta ɓui sǝ kulɗa aka ndǝ ni wɛ. Mǝmi ma apǝri mambǝlɛ wala ndǝr hyantǝr Hyal ndǝrɛ alari?” 10Ɓwalnya ni ‘ya aka dǝna nam tǝ katsalar saudza kumthlani kumɛ ni hyivǝr apǝri dar ata nkyinkyaku Bulusu dangul-dangul. Dzǝ hau ka saudza yarɛ mwari alǝghǝl ka dar kǝtǝ Bulusu atǝra ta dar aka dǝna ka dar si aka dza akwa kǝiyir saudza.

11Ɗiyir vǝri nda Thlaku hyati kudzǝghɛ adzǝ Bulusu ka gha, “Kǝtǝ dǝna! Apa tǝ gǝ tara sakǝidatsǝni tǝra akwa Ursalima, ani ahani kǝ ndzai ntsakǝr tǝ gǝ ata sakǝidatsǝni tǝra akwa Rauma.”

Ndǝ Ɗǝmhǝ Sǝ Kulɗa ka Tsa Bulusu

12Sǝbar arpɛ kula-kula, ndzǝr Yahudi ɗǝmhǝ kulɗakur dar ka kǝtǝ mbǝrɛ kura dar awa sǝmɛ wala sa si ma dar tsai Bulusu. 13Sǝli hang ta fwaɗu thlani nam tǝ nya dar akwa mbwa kulɗakur ǝni. 14Dar mwari adzǝ nggar fǝrist yarni ba adzǝ ndzǝ ngga-ngga yarɛ ka nkǝrɛ, “Yar kǝtǝ mbǝrɛ kura yar awa sǝm kǝlara su si ma yar tsai Bulusu. 15Antǝ kulini, gǝri ba Ndzǝr Hakar Yahudi ka gǝri hyanti kuɗahu ala katsalar saudza kumthlani kumɛ nǝr Rauma ni ka dzǝ si aka dza akǝma gǝri ka gǝri tsanti alari apǝri gǝri ada bara ka gǝri ɓui labar nam kal-kal ata kǝra bǝrkur ni. Yar kǝ ɗǝmhǝdzi tǝ yar ata tsai tǝni kabutu ma dzǝ ata si akwani.”

16Sakatǝ kusǝkǝr Bulusu ngati mbwa su kulɗa ni, dzǝ mwari akwa kǝiyir saudza ni ka ghaba ala Bulusu.

17Antǝ Bulusu kǝgaba pathla katsalar saudza kumthlani ni ka nkǝrɛ, “Mwaramɛ aka zǝr dakwai ni ala katsalar saudza kumthlani kumɛ ni; dzǝ aka labar nam aka paida tǝ dzǝ ata gha alari.” 18Ani dzǝ mwari aka dza ala katsalar saudza kumthlani kumɛ ni.

Katsalar saudza kumthlani ni ka nkǝrɛ, “Bulusu, ndǝr fǝrsǝna, hya alai apǝri kǝi si aka zǝr dakwai ni ala gɛ kadǝbar dzǝ aka labar nam aka paida tǝ dzǝ ata gha ala gɛ.”

19Katsalar saudza kumthlani kumɛ ni ngǝzi tsiya zǝr dakwai ni, dzǝ ka ndǝrar tǝni tǝ ngwam ka yuwɛ, “Sǝr mi tǝ gǝ ada bara gha alai?”

20Dzǝ gha: “Ndzǝr Yahudi mbwai apǝri dar ata gha ala gɛ ka gǝ si aka Bulusu akǝma Ndzǝr Hakar Yahudi ni arpɛ. Dar ata gha apǝri dar ada bara yu Bulusu sǝr yu hang ani ka dar ɓui labar nam dzǝri hang ata kǝrari. 21Ta gǝ ta yiɗɛ ala dar, kadǝbar dar hang ta fwaɗu thlani ada mbwɛ akuya sǝkǝ tǝni. Dar kǝtǝ mbǝrɛ kura dar awa sǝmɛ wala sa si ma dar tsi tǝni. Dar ɗǝmhǝdzi kulini, dar ada sǝkɛ sǝ tǝ gǝ ata gha ata kǝra sǝ tǝ dar bara ni.”

22Katsalar saudza kumthlani kumɛ ni salamtsǝni zǝr dakwai ni ba dzǝ gala tǝni, “Ta gǝ ta gha ala kǝlara ndɛ apǝri gǝ tsǝba alai sǝ ǝni.”

Ndǝ Pali Bulusu atǝra akwa Kaisariya

23Antǝ dzǝ ka kǝgaba sǝɗɛ akwa ntsa katsalar saudza kumthlani ni ba dzǝ ka gha ala dar, “Ɗǝmhamǝdzi ka gǝri fatsi saudza kumthlani sǝɗɛ, ndzǝr taku murfwɛ thlani ba ndzǝr mwasi kumthlani sǝɗɛ ka dar mwari akwa Kaisariya saka mǝdlǝr vǝri asǝna. 24Ka gǝri ɓui taku yarɛ nam awa mwari aka Bulusu ala Gumna Filisu lapiya.”

25Dzǝ rǝbwai kakadu apa ǝni:

26Kǝlaudiyus Lisiyas,

Ala ndǝ ngga ta sang, Gumna Filikus tǝ barkar ngɛ:

Thlawardzi Yarɛ.

27Ndzǝr Yahudi ani tara ngǝti sal ni ba dar angwada bara tsi tǝni, ama Yi si kaka saudzarna yarɛ ka mbulba tǝni, akuya Yi ngaba apǝri dzǝ ndǝr Rauma. 28Yi bara ka Yi zǝndi kami tǝ dar ada bǝrku tǝni. Ani Yi ka si aka dza akǝma Ndzǝr Hakar dar. 29Yi ɓui apǝri bǝrku ni tsǝkwar sǝr yuwɛ ata kǝra mabariyir dar, ama sǝr haka adi ata kǝrari nam tara tsǝbti ka ndǝ tsi tǝni wala ka dzǝ sǝm fǝrsǝna wɛ. 30Sakatǝ ndǝ gha alai sǝ ata kǝra mbwa su kulɗa ata kǝrari, Yi hyanti tǝni ala gɛ kura aka santa saka. Tsuwɛ Yi hau ndzǝr bǝrku tǝni ka dar mwari akǝri ala gɛ sǝ nam tǝ dar ada bǝrku tǝni kari.

31Ani saudza yarni ka lǝkǝma aka sǝ tǝ ndǝ gha ala dar, dar kǝtǝ Bulusu tsu avǝrvǝri ka si aka dza akwa Antipatiris. 32Sǝbar arpɛ saudza yarɛ ni ngyar ndzǝr taku ka tǝra aka Bulusu, dar tsuwɛ dar ɓitasi akwa kǝiyir saudza. 33Sakatǝ ndzǝr taku ni si akwa Kaisariya, dar la kakadǝ ni ala gumna ba dar ka hau Bulusu akwa tsiyari.

34Gumna ka kǝratsǝni kakadǝ ni ba dzǝ ka yuwɛ di madi tǝ dzǝ hyati akwa. Tǝ dzǝ ngati apǝri dzǝ hyati akwa Kilikiya, 35dzǝ ka nkǝrɛ, “Yi ata siya ngati labar nam ata kǝra gɛ sakatǝ ndzǝr bǝrku tǝngɛ kǝ si akwani.” Antǝ dzǝ hau apǝri ka ndǝ mwari aka Bulusu akwa kǝiyir kuhyi Hirudus ka ndǝ ɓǝla tǝni.