‏ Ephesians 6

Madausai ba Ndzǝr Ya

1 ^aMadausai, ka gǝri ngandǝrǝr ndzǝr yar gǝri akwa Thlaku ni, akuya ǝni ani kal-kal. 2 ^b“Ka gǝri la nggakur ala babar gǝri ba mamar gǝri”—ǝni ani tsau nam tangkǝma aka alkawal— 3“ani ka sanga su mwar kal-kal ala gǝri ba ka gǝri ɓui nga sǝɗar mpikǝ dzǝgam akwa dunya ni.”

4 ^cTada yarɛ, ta gǝri ta hau ka madar gǝri kǝl ɗǝfu mai, ata vuiya ǝni, ka gǝri kǝlati tǝ dar akwa whal ‘yi-’yi ba hyipǝ su akwa whalǝr Thlaku.

Fali yarɛ ba Thlaku yarɛ

5 ^dFali yarɛ, ka gǝri ngandǝrǝr thlakǝr gǝri yarɛ nam akwa dunya, aka vǝkǝr sǝlai ba hyivǝr, ba aka ɗǝfu nam duku, tsu apa tǝ gǝri ata ngandǝrǝr Kǝrsti. 6Ka gǝri ngandǝrǝr dar adi ɗiɗi ka gǝri ɓui maiwakur aka dar ma ntsa dar adai wɛ, ama apa faliyir Kǝrsti yarɛ, ada ‘ya sǝ nam tǝ Hyal ada bara aka ɗǝfa gǝri. 7‘Yamɛ kǝthlǝr aka sanga ɗǝfa gǝri, apa gǝri ada ‘ya kǝthlǝrǝr Thlaku ni, adi ala ndzǝ wɛ, 8kadǝbar gǝri zǝndi apǝri Thlaku ni dzǝ ata la wadzǝɓa ala kǝlara ndɛ akuya ka kǝlara sǝ ɗaku nam tǝ dzǝ ‘ya, wala dzǝ fali wala kambɛ.

9 ^eBa gǝri nam thlaku yarɛ, ka gǝri vǝ faliyir gǝri yarɛ tsu ahani. Ka gǝr ngyar hyivǝra tǝ dar, tǝng tǝ gǝri zǝndi apǝri dzǝ nam Thlakǝr dar gyapu ba Thlakǝr gǝri dzǝ atahyal, ba dzǝ adi ada nkǝru wɛ.

Kariyir Mbu Dzɛ akwa Mpa nǝr Hyal ni

10Ata dǝnta, ka gǝri ndzai ɓaɓal akwa Thlaku ni ba akwa dǝnarni nam ɓwaltasang. 11Ka gǝr hadzɛ sanga kariyir mbu dzɛ akwa mpa nǝr Hyal ani ka gǝri mǝzi ka mbuli kǝr gǝri ta dabariyir Satan yarni. 12Akuya bǝbǝkǝiyir muri adi aka kum aka masi wɛ, ama aka ndzǝr kuhyi yarɛ, aka ndzǝr wada yarɛ, aka dǝna yarɛ nǝr dunyar kuthlɛ ǝni ba aka dǝna yarɛ nǝr mambǝl nam kulɗa akwa vui yarɛ nam atahyal. 13Kadǝbar ǝni ka gǝri pudzɛ sanga kariyir mbu dzɛ akwa mpa nǝr Hyal, ani ka sakatǝ vǝr kulɗa ni si, gǝri ata mǝzi ka mbuli kǝr gǝri, ba aghǝla tǝ gǝri ‘yati kǝlara su, nam kura gǝri awa dla. 14 ^fKa gǝri hyati ɓaɓal dzá, aka sǝr mbwa kusar nǝr dzǝrkur mbwa-mbwa ata kusara gǝri, aka yangǝr mbu kǝrathlɛ nǝr kalkalkur akwa vuiyirni, 15 ^gba ka gǝri hati ata thlǝla gǝri ɗǝmhǝdzi ni nam tǝ Hyal tara la gǝri akwa ndǝrǝr Hyal nam sǝɗa nǝr ndzi lapiya ni. 16Aghǝla sanga sǝ yarni, ka gǝri kǝtǝ tsǝrmbar hamnta dzǝri, nam tǝ gǝri ata mǝzi ka tsi u’ur hafɛ yarɛ nǝr ndǝ kulɗa ni. 17 ^hKa gǝri kǝtǝ darar yang nǝr mbatǝdzi ba katsakar Mambǝl ni, nam ani ndǝrǝr Hyal. 18Ba ka gǝri ‘ya aduwa akwa Mambǝl ni ata kǝra sanga su aka sanga dzǝli aduwa yarɛ ba kǝgyǝ yarɛ. Tǝ gǝri aka sǝ ǝni akwa kǝr, ka gǝri ɓǝla ba kǝlara saka ka gǝri lǝkǝma aka ‘ya aduwa akuya ka sanga ndzǝr Hyal yarɛ.

19Yi yɛ ka gǝri ‘ya alai aduwa, ani ka kǝlara sakatǝ Yi mburnta nyawai, ka Hyal lai labar nam tǝ Yi awa nkǝrba kura aka hyivǝr dzǝri ɗǝwa-ɗǝwa nǝr ndǝrǝr Hyal nam sǝɗa ni, 20akuya ka Yi wakil akwa fǝrsǝna. ‘Yamɛ aduwa ka Yi mǝzi ka nkǝrnta tǝni kura hyivǝr, akwa whalɛ nam kal-kal ka Yi ndǝrɛ.

Thlawardzǝr Dǝnta

21 ^{i j}Takikus, zǝr mama nam tǝ ndǝ yiɗɛ ba zǝr kǝiyir Thlaku ni nam aka dzǝrkur, dzǝ ata gha ala gǝri sanga su, ani ka gǝri zǝndi su ata kǝrawai ba sǝ nam tǝ Yi ada ‘ya. 22Yi ada hya tǝni ala gǝri akuya ka sǝ ǝni, apǝri ka gǝri zǝndi su ata kǝra yar, ba ka dzǝ dǝnautsǝni tǝ gǝri. 23Yi ‘ya aduwa ka Hyal Tada ni ba Thlaku ni Yɛsu Kǝrsti la ndzai lapiyakur ba yiɗǝdzi aka hamnta dzǝri ala gǝri madar mama kaka nkwaiyir mama yarɛ. 24Ka ɗakur Hyal ndzai ata kǝra sanga ndzǝ nam ada yiɗǝ Thlakǝr muri Yɛsu Kǝrsti aka yiɗǝdzi nam kura kurkuri.