Gal 2 | CklSC | STEP | Aghǝla fá kum kapu fwaɗu Yi dzakti mwari akwa Ursalima atakǝmaduku aka Barnabas ǝnari. Yi kǝtǝ Taitus yɛ.

‏ Galatians 2

Ndzǝr Hya yarɛ Dlutsi Bulusu

1 ^aAghǝla fá kum kapu fwaɗu Yi dzakti mwari akwa Ursalima atakǝmaduku aka Barnabas ǝnari. Yi kǝtǝ Taitus yɛ. 2 Yi mwari akuya ka sǝ nam tǝ Hyal tara tsanti alai. Yi ka nkǝrɛ ala dar ndǝrǝr Hyal nam sǝɗa tǝ Yi ada ‘ya akwa ntsa ndzǝ kura Yahudi, akǝma ndzǝ tǝ ndǝ kǝtǝ apǝri dar dza ngganggar ikǝlizǝya, kadǝbar ta vu dǝna nam tǝ Yi ada ‘ya, wala nam tǝ Yi kurtaka ka ‘ya, ka dzǝ ndzai ɓǝrtu. 3 Apani, wala Taitus nam atakǝmaduku aka yɛ, ndǝ ta ntsakǝr alari ka dzǝ thlakatsa wɛ, wala tǝ dzǝ ndǝ kura Yahudi. 4 Labar ni hyati kadǝbar madar mama nǝr hawi yar laka nam tara lǝkwa ɗǝwa-ɗǝwa, kadǝbar ka dar wulba asǝra mbulbadzǝr muri nam tǝ muri akǝri atar Yɛsu Kǝrsti, akuya vu tǝ muri akwa falikur sǝr ‘yar Yahudi. 5 Yar ta sǝntá kǝma ala dar wala nkyiɗu wɛ, kadǝbar dzǝrkur ndǝrǝr Hyal nam sǝɗa ka dzǝ ndzai ala gǝri.

6 ^bNdzǝ nam ngga-ngga tǝ ndǝ kǝtǝ apǝri dar sǝ laka—ma apǝri dar sǝ laka yɛ, sang duku alai, kadǝbar Hyal adi ada wul sǝ abǝla ata dzǝ wɛ ndzǝ apani ta dzakti mima ala labar nam ɗaku tǝ yɛ ada nkǝr wɛ. 7 Ama ndzǝ nam ngga-ngga wula tǝ Hyal yiɗɛ alai kǝi ‘ya ala ndzǝ kura Yahudi labar nam ɗaku apa tǝ ndǝ yiɗɛ ala Bitrusu ka dzǝ ‘ya labar nam ɗaku ala ndzǝr Yahudi. 8 (Hyal nam ada ‘ya kǝthlǝr akwa Bitrusu tara mǝrti tǝni ndzǝr hya ala ndzǝr Yahudi, tsuwɛ dzǝ ani ada ‘ya kǝthlǝr akwa yɛ. Dzǝ dza mǝrti tǝra ndzǝr hya ala ndzǝ kura Yahudi.) 9 Sakatǝ Yakubu ba Bitrusu ba Yawhana dar nam ngganggar thlǝmthlǝmǝr ikǝlizǝya tara wula ɗakur Hyal adzǝ yar dar ka dlutsi tǝ yar akwa mwardzǝr yar aka Barnabas, kadǝbar ka yar mwari adzǝ ndzǝ kura Yahudi, dar tsuwɛ adzǝ ndzǝr Yahudi nam aka thlakatsa. 10 Sǝ nam tǝ dar gha ala yar ani ka yar ɗǝngati ndzǝ kura aka su, ǝni wala watsi ma Yi aka ɗǝngari dzǝr dzǝri.

Bulusu Ɗǝmnya ala Bitrusu akwa Antakiya

11 Tǝ Bitrusu si akwa Antakiya, Yi ka ɗǝmnya alari kadǝbar sǝ tǝ dzǝ sǝwati akǝma ndzi. 12 Kadǝbar kabutu ndzǝ laka ta si adzǝ Yakubu, dzǝ ada sǝm sǝr sǝmɛ kaka Kǝrsan nam kura Yahudi. Ama tǝ dar si dzǝ ka ngwarba kǝrni akwa ntsa dar. Kadǝbar dzǝ ada hyivǝr ndzǝ nam aka thlakatsa ni. 13 Ba mambiya ndzǝr Yahudi yarɛ ni nam aka mbǝrsa ‘ya su kǝlikatsaɗǝmkur vwam kaka dza, ani ka atar kǝlikatsaɗǝm wala Barnabas ma ndǝ zǝlanta tǝni.

14 Ama tǝ Yi wula dar adi ada nu ndǝrǝr Hyal nam sǝɗa aka dzǝrkur wɛ, Yi gha ala Bitrusu akǝma sanga ndzi, “Gǝ nam ndǝr Yahudi, ma gǝ ada ndzai apa ndǝ kura Yahudi, adi apa ndǝr Yahudi wɛ, mǝmi tǝ gɛ ada ntsakǝr ala ndzǝ nam kura ndǝr Yahudi ka dar nu sǝr ‘yar ndzǝr Yahudi?

15 “Muri nam ndzǝr Yahudi atar ya ba adi ndzǝ ‘kura Yahudi ndzǝr biku yarɛ’ wɛ 16 ^cka mur zǝndi ndɛ adi ada ɓui ndzai kal-kal ala Hyal atar nu mabari wɛ, ama atar hamnta dzǝri akwa Yɛsu Kǝrsti ɗiɗi, mur ma mur hamnta dzǝri akwa Yɛsu Kǝrsti, kadǝbar mur ɓui ndzai kalkalkur atar hamnta dzǝri akwa Kǝrsti, ba adi atar nu mabari wɛ, kadǝbar adi atar nu mabari tǝ ndǝ ata ɓui ndzai kalkalkur wɛ.

17 “Ma, apǝri mur ada bara ndzai kal-kal akwa paktsǝnidzi kaka Yɛsu Kǝrsti, antǝ ndzǝ laka ada gha apǝri muri aka kǝr mur ma mur ndzǝr biku, kasa Kǝrsti ada la dǝna ala kǝthlǝr biku ya? A’a wala kudzǝghɛ! 18 Ama ma Yi dzakti tsati sǝ nam tǝ Yi huzanta watsi, Yi kǝ ndzai ndǝr ɓǝlnta mabari. 19 Ala mabari Yi apa ndǝ ntǝnti akuya kǝi ndzai aka mpikɛ ala Hyal. 20 Ndǝ kukwanta tǝra atakǝmaduku aka Kǝrsti, kulini adi Yi tsuwɛ ani ada ndzai wɛ, Kǝrsti ani aka mpikɛ akwa yɛ. Mpikɛ nam tǝ Yi ada ndzai akwa kulini adi nǝr dzɛ wɛ, Yi ada ndzai aka mbǝrsa akwa Zǝr Hyal, nam tara yiɗǝ tǝra, har tǝ dzǝ hamnta kǝrni kadǝbarna. 21 Yi adi ata ngǝla ɗakur Hyal wɛ. Ma apǝri ndɛ ata ɓui ndzai kal-kal atar nu mabariyir Musa, ntǝr Kǝrsti kǝ ‘ya ɓǝrtu.”