Gal 5 | CklSC | STEP | Ani dzǝri Kǝrsti kǝ la muri ɓui kǝr. Ka gǝr ndzai ɓaɓal, ta gǝri ta dzakti ɗu akwa yaku nǝr falikur tsuwɛ.

‏ Galatians 5

Ɓui Kǝr akwa Kǝrsti

1 Ani dzǝri Kǝrsti kǝ la muri ɓui kǝr. Ka gǝr ndzai ɓaɓal, ta gǝri ta dzakti ɗu akwa yaku nǝr falikur tsuwɛ.

2 Yau siyamǝ thlǝmɛ! Yi Bulusu, Yi ada gha ala gǝri apǝri, ma gǝr yiɗɛ ka ndǝ ‘ya ala gǝri katsa, Kǝrsti adi ata ‘ya ala gǝri paida wɛ. 3 Yi ada dzakti ɗǝngati ala kǝlara ndǝ nam tara yiɗɛ tǝ kǝrni tǝ ndǝ thlakatsa alari apǝri kǝ ndzai ntsakǝr ka dzǝ nu sanga mabari ni. 4 Gǝr nam ada bara ndzai kalkalkur atar nu mabari, gǝr kǝ ndǝghǝbadzi aka Kǝrsti; gǝr kǝ pǝranta ta ɗakur Hyal. 5 Ama mur nam ada ndzai atar Mambǝlɛ mur ada sǝkɛ ka mur dluwɛ kalkalkur atar hamnta dzǝri nam tǝ Hyal ‘ya alkawalari ala muri ni. 6 Ma mur nu Kǝrsti Yɛsu, thlakatsa wala zumbulǝm dar adi ata nya mima wɛ. Ama Sǝ nam ɗa ta sang ani hamnta dzǝri akwa Kǝrsti nam tara mǝrti tǝngɛ tǝ gǝ yiɗǝ ndɛ.

7 Gǝri ada ‘ya ɗaku. Wa tara kanti ala gǝri nu whal nam dzǝrkur? 8 Dzǝli zǝla nam tǝ ndǝ ada ‘ya ala gǝri ni adi atar Hyal nam tara kǝga tǝ gǝri wɛ. 9 ^aƊǝngati karabu nam tara nkǝrɛ apǝri, “Thlǝlam nam nkyiɗu ani ada mbihǝti mpur mantsǝkǝl.” 10 Yi ada mbǝrsa aka Thlaku, apǝri gǝri adi ata nu sǝr tsǝl nam hawi wɛ. Ndǝ nam ada hyantǝ hankala gǝri tsuwɛ Hyal ata hakatsǝni tǝni, wala dzǝ dza wa. 11 Ama ma alai, madar mama kaka nkwaiyir mama ma apǝri Yi ada dzakti ‘ya labarǝr katsa, apǝri kǝ ndzai ntsakǝr ka ndǝ thlakatsa kami tǝ ndǝ ada dzakti ɗar bwanai alai? Ma apǝri ǝni dzǝri, sǝr mbu thlǝlǝr undzum kadlǝkadlɛ kǝ kǝlnta labarǝr ntǝr Kǝrsti! 12 Yi ada bara ndzǝ nam ada hyanti hankala gǝrni ka dar tasi ntsu ala kǝr dar!

13 Madar mama, gǝr wula ndǝ kǝga tǝ gǝri kadǝbar ɓui kǝr. Ama akwa ɓui kǝr gǝrni ta gǝri ta ɗǝnga apǝri kulini gǝri ata ‘ya kǝlara sǝ nam kulɗa tǝ dzɛ ada bara. Ata vuiya ǝni, ka gǝr kǝthlǝr aka ɓui kǝr gǝrni ka gǝri mbana kǝma gǝri akwa yiɗǝdzi. 14 ^bKadǝbar sanga mabari ghǝiyabadzi aka ndǝr duku, “Ka gǝ yiɗǝ ntǝwhulǝr ngɛ apa kǝrngɛ.” 15 Ama ma gǝri ada ɓwalnya ba mpa aka kǝma gǝri, ka gǝr vǝdzǝ hankal, ta gǝr ta tsai kǝma gǝri.

Ndzai Atar Mambǝl ni

16 Əni ani tsawurna ala gǝri, ka gǝri ndzai aka nu Mambǝlǝr Hyal, adi apǝri gǝri ata nu kǝlara sǝ nam kulɗa tǝ dzɛ ada bara wɛ. 17 ^cAkuya sǝ nam tǝ dzǝr biku ni ada bara ani sǝ nam kura Mambǝl ni ada bara, tsuwɛ sǝ nam tǝ Mambǝl ni ada bara ani sǝ nam kura dzǝr biku ni ada bara. Dar akwa kampiku aka kǝma dar, ani ka gǝri adi awa ‘yati sǝ nam tǝ gǝri ada bara wɛ. 18 Ama ma apǝri Mambǝlǝr Hyal ani ada pwar tǝ gǝri, gǝri tsu adi faliyir mabari kǝra wɛ.

19 Kulini kǝthlǝrǝr sǝ nam kulɗa tǝ dzɛ ada bara dar ata babal: dar ani, badawikur, aka kǝthlǝr agyakur, aka susukur, 20 vǝkǝr sǝlai ala mǝlǝm aka igha, aka dugun, aka ɓwalnya, aka sǝlku, aka ɗǝfu, aka yiɗǝ kǝr, aka lǝkǝdzikur, aka ndǝghǝbadzi, 21 aka kwambalikur, aka sa su, aka sambarkur, aka tsuwɛ mambiya dzǝli ǝni yarni. Yi ada gala tǝ gǝri apa tǝ Yi galatsǝni tǝ gǝri watsi, apǝri ndzǝr ‘ya dzǝli sǝ yarni, dar adi ata ɓui warta akwa kuhyikur Hyal wɛ.

22 Ama munyar Mambǝl ni ani yiɗǝdzi, kutsari, lapiyakur, kǝmar, hankalkur, ɗakur, dzǝrkur, 23 kanadikur ba ɓǝlati kǝr. Dzǝli sǝ ǝni yarni mabari adi ata kǝra dar wɛ. 24 Ndzǝ nam tara mbǝrsa akwa Kǝrsti Yɛsu, dar kukwanta sǝ nam kulɗa tǝ dzɛ ada bara, kaka ɗǝngar yiɗǝ kǝrkur. Antǝ dar adi ata ‘ya dzǝli sǝ yarni wɛ. 25 Tǝng tǝ muri ada ndzai Mambǝl ni, ngyar ka muri lǝkǝma akwa mwari kaka Mambǝl ni. 26 Ta gǝr ta ndzai ndzǝr haɓǝkǝr aka ndzǝr ‘ya mpa wala sǝlku ala kǝma gǝri.