‏ Hebrews 11

Tǝ Hamnta Dzǝri

1Kulini hamnta dzǝri dzǝ ani mbǝrsa aka sǝ nam tǝ gɛ ada tǝmatsǝni ba kǝtǝ apǝri dzǝri sǝ nam kura muri ta wula. 2Əni ani sǝ nam tǝ ndǝ hǝmɛ ndzǝr awatsi kari.

3 ^aAtar hamnta dzǝri mur ngaba apǝri Hyal mǝrti dunya ni tǝ tsawurni, ani ka sǝ nam tǝ ndɛ ada wula mǝrtǝdzi tǝ sǝ nam kura ndɛ ada wula.

4 ^bAtar hamnta dzǝri Habila hamnta ala Hyal kǝdlǝrsu nam ɗaku ta nam tǝ Kayinu ‘ya. Atar hamnta dzǝri ndǝ hǝmnti tǝni apǝri dzǝ ndǝ nam kal-kal, sakatǝ Hyal nkǝrɛ sǝ ɗaku ata kǝra hamnta sǝrni yarɛ. Ba kadǝbar ka sǝ nam tǝ Habila ‘yati, muri ata mǝzi ka nkǝrɛ apǝri wala tǝ Habila kurtaka nti, atar hamnta dzǝri dzǝ tsu ada ndǝrɛ asǝna.

5 ^cAtar hamnta dzǝri Hyal kǝtǝ Inaku atǝra, ani ka ta dzǝ ta ɗar nti; ndǝ ta ɓakta ɓui tǝni wɛ, kadǝbar Hyal kǝtǝ tǝni atǝra. Akuya kǝmata tǝ ndǝ awa kǝtǝ tǝni ndǝ hǝm tǝni apǝri dzǝ ada panyi ɗǝfa Hyal. 6Ma kura aka hamnta dzǝri adi awa mǝzi ka ‘ya tǝ ndɛ awa panyi ɗǝfa Hyal wɛ, kadǝbar kǝlara ndɛ nam ata si adzǝni kǝ ndzai ntsakǝr ka dzǝ mbǝrsa apǝri dzǝ adai ba dzǝ ada la wadzǝɓa ala ndzǝ nam ada bara tǝni.

7 ^dAtar hamnta dzǝri ani tǝ Nuhu, sakatǝ Hyal ɗǝmnya alari ata kǝra sǝ yarɛ nam kura ndɛ ta saga wula, dzǝ vǝdzǝ hankal aka ngandǝrɛ ala Hyal dzǝ ka tsati dzǝlkǝiyir yimi mbatǝ yalǝrni. Atar sǝ ǝni dzǝ hakatsǝni dunya ba dzǝ ka ndzai ndǝr sǝm warta nǝr kalkalkur nam tara si atar hamnta dzǝri.

8 ^eAtar hamnta dzǝri ani tǝ Ibrahim, sakatǝ Hyal kǝga tǝni ka dzǝ mwari akwa vui nam tǝ dzǝ ata siya dlutsi apa sǝr wartarni, dzǝ ngandǝrɛ ba dzǝ ka mwari, wala tǝ dzǝ ta zǝndi vui nam tǝ dzǝ ada mwari akwa wɛ. 9 ^fAtar hamnta dzǝri dzǝ mǝrti kǝiyirni akwa diyir alkawal ni apa mǝthlǝɓi akwa diyir ndɛ; dzǝ ndzai akwa nguzi yarɛ, apa tǝ Isaku aka Yakubu ‘ya, dar nam ndzǝr sǝm wartar alkawal ndari kaka Ibrahim. 10Akuya dzǝ ada wulɛ alǝkǝma mǝlmɛ nam aka piyartsǝni yarɛ, nam tǝ ndǝr ntǝhari ba tsari ani Hyal.

11 ^gTsuwɛ Ibrahim atar hamnta dzǝri, wala tǝ fárni kurtaka kwatsǝni—ba Saratu tǝ kǝrni dzǝ atsǝr—dzǝ ɓui dǝna tǝ dzǝ ndzai atǝgǝra ndɛ kadǝbar dzǝ ɗǝnga apǝri ndǝ nam tara ‘ya alkawal ni dzǝ ndǝ nam aka dzǝrkur. 12 ^hBa atar ndǝ duku ni, nam tǝ dzǝ ata nya nti, kulfɛ ɓuidzi hang apa tsambiya yarɛ atahyal ba kura awa tsǝbadzi apa wuyahu ata nya manda.

13 ⁱSanga ndzǝ yarni dar ndzai aka hamnta dzǝrǝr dar har ntǝr dar. Dar ta ɓui ka dlutsi sǝ yarɛ nam tǝ Hyal ‘ya alkawalari ni wɛ; dar wula sǝ yarni ɗiɗi tǝ dar tsu pǝɗǝm, dar ‘ya kutsari nǝr wula tǝ dar, ba dar ka lu apǝri dar ndzǝ si-si ba mǝthlǝɓi yarɛ akwa dunya. 14Ndzǝ nam ada nkǝrɛ dzǝli sǝ yarni dar ada tsanti apǝri dar ada bara diyir kǝra dar. 15Ma dar ani ada ɗǝnga di nam tǝ dar tara ngyar, dar ata ɓui whalɛ ka ɓakta lǝkwa. 16Ata vuiya ǝni, dar ada bara di nam ɗaku—nam atahyal. Kadǝbar ǝni Hyal ta nga sǝlai tǝ dar kǝga tǝni Hyalǝr dar wɛ, akuya dzǝ ɗǝmhǝi mǝlmɛ ala dar.

17 ^jAtar hamnta dzǝrǝr Ibrahim, sakatǝ Hyal tara nkǝrti tǝni, dzǝ hamnta Isaku apa kǝdlǝrsu. Dzǝ nam tara dlutsi alkawal yarni dzǝ angwada ‘ya kǝdlǝrsu tǝ zǝrǝrni duku ngyalang, 18 ^kwala ahani tǝ Hyal tara nkǝrɛ alari, “Atar Isaku ani tǝ ndǝ ata tsǝ kulfǝrni.” 19Ibrahim ɗǝnga apǝri ma Isaku nti, Hyal ata mǝzi ka hyanti tǝni ka mpikɛ kadamwa. Ba ndɛ ata mǝzi ka nkǝrɛ apǝri, Isaku nti ba Hyal ka hyanti tǝni aka mpikɛ ala Ibrahim.

20 ^lAtar hamnta dzǝri Isaku vǝdzǝ barka ala Yakubu ba Isuwa ata kǝra ndzaiyir dar nǝr kǝtǝ ka lǝkǝma.

21 ^mAtar hamnta dzǝri ani tǝ Yakubu, sakatǝ dzǝ angwada nti, dzǝ vǝdzǝ barka ala sanga madar Yusufu, ba dzǝ nganyi kǝrari dzǝ ka vǝkǝr sǝlai ala Hyal tǝ dzǝ ata zuwarni.

22 ⁿAtar hamnta dzǝri ani tǝ Yusufu, sakatǝ ntǝrni ‘ya kudzǝghɛ, dzǝ ndǝrɛ ata kǝra sǝbar Izǝraila yarni akwa diyir Masar, ba dzǝ tsǝba ala dar sǝ nam tǝ dar ata ‘ya aka ɗahyirni yarɛ.

23 ^oAtar hamnta dzǝri ndzǝr yar Musa ɗǝwar tǝni nǝr hya makǝr aghǝla tǝ ndǝ yai tǝni, kadǝbar dar wula dzǝ adi zǝr gyali wɛ, ba dar adi ada hyivǝr wadar kuhyi ni wɛ.

24 ^pAtar hamnta dzǝri ani tǝ Musa, sakatǝ dzǝ kǝlí, dzǝ ngǝla tǝ ndɛ awa nkǝrɛ apǝri dzǝ zǝr nkwar Firauna. 25Dzǝ tsarba kudzǝ ka ndǝ ‘ya alari kulɗakur atakǝmaduku kaka ndzǝr Hyal ta nga sǝɗar biku nǝr saka nkyiɗǝ laka. 26Dzǝ wula apǝri kudzǝ ka dzǝ sa bwanai ata nyar Kǝrsti ta tǝ sanga gabakar Masar awa ndzai nǝni, kadǝbar dzǝ vǝti ntsari ata wadzǝɓa nam tsu ata si. 27Atar hamnta dzǝri dzǝ ngyar Masar, kura aka hyivǝr sǝwa ɗǝfǝr kuhyi; dzǝ ɓati kadǝbar dzǝ wula ndǝ nam kura ada wuladzi. 28 ^qAtar hamnta dzǝri dzǝ ɓǝlati Wudzǝr Ngǝmba ni ba ɓutsǝti masǝr mawi ata nyatǝfu, ani ka ta ndǝr tsǝtsa yarkǝma ni kura awa tsǝkwa yarkǝmar Izǝraila.

29 ^rAtar hamnta dzǝri ndzǝ yarni kwatsǝni akwa Manda Magza ni apa ata dai ɓulɓuli; ama sakatǝ ndzǝr Masar tara bara ka dar nu tǝ dar, dar ntsǝghǝldzi.

30 ^sAtar hamnta dzǝri garuwur Dzarikau yarɛ dlantadzi, aghǝla tǝ ndzǝ yarni mwari ka dzǝwultsǝni tǝ dar nǝr vǝr murfwɛ.

31 ^tAtar hamnta dzǝri ani tǝ Rahapu zawar ni, kadǝbar dzǝ dlutsi ndzǝr wul asǝr yarni, ndǝ ta tsi tǝni vwam kaka ndzǝ nam tara ngǝla Hyal ni wɛ.

32 ^uBa sǝr mi hang tǝ Yi tsu awa nkǝrɛ? Yi adi aka sakatǝ Yi awa ndǝrɛ ata kǝra Gidiyaun, Barak, Samsǝn, Dzafthla, Dauda, Samaila ba nabi yarɛ ni, 33 ^vnam atar hamnta dzǝri dar mbugǝli diyir kuhyi yarɛ, dar si ka ‘ya sǝ nam kal-kal, ba dar ɓui ɗǝruwur sǝ nam tǝ Hyal ‘ya alkawalari; dzǝ nam tara harti nya dzǝngai yarɛ, 34 ^wtsai mbar u’u yarɛ, ba ughyibadzi ta hyira katsakar; ndzǝ nam kura dǝna dar ‘ya aka dǝna; ba dar ndzai aka dǝna akwa mpa ba dar kǝdlǝnta saudza yarɛ nǝr di damwa. 35 ^xMwahyi dlutsi ndzǝr dar nam tara nti, dar ka hyati aka mpikɛ kadamwa. Ndzǝ laka ndǝ tsan bwanai nam dzau ala dar ba dar ngǝla tǝ ndǝ awa sǝntá tǝ dar, ani ka dar ɓui hyati akwa ntǝnti nam ɗaku. 36 ^yNdzǝ laka dar ɓui ngǝngǝl yarɛ ba kwangyang, ndzǝ laka ndǝ mbwai tǝ dar aka tsalala ka pu tǝ dar akwa fǝrsǝna. 37 ^zNdǝ ɗǝgal tǝ dar aka paya, ndǝ ntau tǝ dar tǝ sau aka bwa sǝɗɛ; ndǝ tsi tǝ dar tǝ katsakar. Dar ada nuɗɛ aka kutsǝr tǝma ba kutsǝr kwai yarɛ ata vuiya kari ha, dar ngudi, ndɛ ada la dar bwanai ba ndɛ ada ‘ya ala dar sǝ kulɗakur— 38Dar ɗaku wur-wur ta ndzai akwa dunya ni. Dar nuɗɛ akwa ntaku ba paya yarɛ, ba akwa dlang yarɛ ba kau yarɛ ata dai.

39Ndzǝ yarni sang Hyal hǝm tǝ dar akuya ka hamnta dzǝrǝr dar, ama wala duku akwa ntsa dar nam tara dlutsi sǝ nam tǝ Hyal ‘ya alkawalari adi wɛ, 40kadǝbar Hyal kurtaka ɗǝmhǝi sǝ laka nam ɗaku ala muri ani kaka muri atakǝmaduku ɗiɗi tǝ dar ata ghǝiyabadzi.