Hebrews 2
Ɗǝmnya ka ndǝ vǝdzǝ hankal
1Kadǝbar ǝni, kǝ ndzai ntsakǝr ka mur vǝdzǝ hankal ala sǝ yarɛ nam tǝ muri ngati, akuya ta muri ta pǝranta. 2Akuya ma ndǝrɛ nam tǝ Hyal gha atar ndzǝr hyantǝr Hyal yarɛ kǝ ndzai mbwa-mbwa, ba kǝlara ndǝ nam tara ɓǝlnta wala ngǝla nga ndǝr ni dzǝ ada ɓui haka nam kal-kal akǝri, 3mǝmi tǝ muri awa mbulbadzi ma mur ngǝla dzǝli whal mbatǝdzi nam ngga ni? Mbatǝdzi ni, nam tǝ Thlaku tara nkǝrɛ tangkǝma ni, ndǝ nkǝrba ala muri atar ndzǝ nam tara ngati tǝni. 4Hyal yɛ sakǝidatsǝni tǝni atar parsu yarɛ, sǝr kudǝra yarɛ ba sǝr ndati yarɛ, ba sǝga yarɛ nǝr Mambǝl Kartǝ ni tǝ dzǝ ndǝghǝnta apa tǝ dzǝ bara.Hyal Mǝrti Yɛsu apa Madar Angǝri
5Akuya adi ala ndzǝr hyantǝr Hyal tǝ Hyal tara hau dunya nam ata si ni akwa tsiya dar wɛ, nam tǝ yar ada ndǝrɛ ata kǝrni. 6 aAma vui laka adai nam tǝ ndǝ laka ndǝrɛ:“Mi ani ndɛ tǝ gɛ ada ɗǝnga tǝni ni,
mi ani zǝrǝr ndɛ tǝ gɛ ada wulhǝ tǝni?
7Gǝ tǝrghǝl tǝni aghǝl ta ndzǝr hyantǝr Hyal nǝr saka nkyiɗǝ laka;
gǝ barnta kǝrari aka nggakur ba hǝmɛ
8ba gǝ pukur sanga su akwi dza.” Akwa tǝ dzǝ pukur kǝlara su akwi dza, Hyal ta ngyar mima nam kura akwi dza wɛ. Har ba kulini mur ta wula apǝri kǝlara su akwi dza wɛ. 9Ama mur wula Yɛsu, tǝ Hyal mǝrti tǝni ɗar alǝghǝl ta ndzǝr hyantǝr Hyal akwa saka nkyiɗǝ laka, ama kulini Hyal barnta kǝrari aka nggakur ba hǝmɛ kadǝbar tǝ dzǝ tara ɗar bwaniyir nti, ani ka atar ɗakur Hyal ka dzǝ ɗar nti akuya ka kǝlara ndɛ. 10Atar sivi aka madar hang ka ɓui nggakur, kǝ ndzai kal-kal apǝri, Hyal nam akuya ka dza ba atarni tǝ sanga su adai, ka dzǝ mǝrti ndǝ nam tara sǝba aka mbatǝdzi ala dar ka dzǝ kuraba atar sa bwanai. 11Gyapu ndǝ nam ada mǝrti ndzi kartǝ ba ndzǝ nam tǝ ndǝ tara mǝrti tǝ dar ndzai kartǝ dar madar kǝi duku. Ani Yɛsu adi ada nga sǝlaiyir kǝga tǝ dar madar mana yarɛ wɛ. 12 bDzǝ ka nkǝrɛ,
“Yi ata kaba thlǝma gɛ ala madar mana yarɛ;
Akǝma tsaɓtsǝnidzǝr ndzi Yi ata har hǝm tǝngɛ yarɛ.” 13 cBa kadamwa,
“Yi ata mbǝrsa akwa dza.” Ba dzǝ ka nkǝrɛ kadamwa,
“Nda yɛ, ba madausai nam tǝ Hyal tara lai.” 14Tǝng tǝ madausai yarni dar kum aka masi, dzǝ yɛ dzǝ ɗar ndzai akwa kumǝr dzɛ apa dar ani ka atar ntǝrni dzǝ ka huzanta ndǝ nam tara ngǝzi dǝnar ntǝ ni—ani Satan ni— 15ba dzǝ mbulba ndzǝ nam tǝ sanga ndzaiyir dar akwa falikur hyivǝr nti. 16 dAkuya dzǝrkurari adi ndzǝr hyantǝr Hyal ani tǝ dzǝ mbana wɛ, ama kulfǝr Ibrahim. 17Akuya ka ǝni ani tǝ kǝ ndzai ntsakǝr tǝ Hyal tara mǝrti tǝni apa madar angǝri akwa kǝlara whalɛ, akuya ka dzǝ ndzai ndǝr kǝtǝrdzi ba kuhyir fǝrist nam aka dzǝrkur akwa kǝthlǝr Hyal, ba apǝri dzǝ ata ndzai sǝr salau akuya ka bikǝr ndzi. 18Kadǝbar dzǝ tǝ kǝrni dzǝ ɗar bwanai sakatǝ dzǝ lǝkwa sǝr nkǝrti, dzǝ mǝzi ka mbana ndzǝ nam tara lǝkwa sǝr nkǝrti.
Copyright information for
CklSC