Jam 4 | CklSC | STEP | Mi ani ada si aka mpa kaka ɓwalnya yarɛ akwa ntsa gǝri? Adi dar ada si atar mau sǝ yarɛ nam tǝ gǝri ada bara nam tǝ dar ada mpa akwa ɗǝfa gǝri wɛ.

‏ James 4

Ka Gǝri Kǝlǝngkǝr ala Hyal

1 Mi ani ada si aka mpa kaka ɓwalnya yarɛ akwa ntsa gǝri? Adi dar ada si atar mau sǝ yarɛ nam tǝ gǝri ada bara nam tǝ dar ada mpa akwa ɗǝfa gǝri wɛ. 2 Gǝri bara sǝ laka ama gǝri ta ɓui wɛ. Gǝri tsi ndɛ ba Gǝri mau sǝr ndɛ, ama gǝri ta ɓui sǝ nam tǝ gǝri ada bara wɛ. Gǝri ada ɓwalnya ba mpa. Gǝri ta ɓui wɛ, kadǝbar gǝri ta kǝgyǝ Hyal wɛ. 3 Ama sakatǝ gǝri kǝgyɛ, kura gǝri ta ɓui, kadǝbar sǝ nam akwa ɗǝfa gǝri kulɗa; apǝri gǝri ata santa sǝ nam tǝ gǝri ɓui ni akwa nga sǝɗar gǝri ɗiɗi.

4 Gǝri ndzǝr badawi, gǝri ta zǝndi apǝri pazǝkur aka dunya ni ani ndzai dawa aka Hyal wɛ? Kǝlara ndɛ nam tara tsarba ka ndzai pazǝr dunya ni dzǝ kǝ ndzai dawar Hyal. 5 Kǝna gǝri ada ɗǝnga apǝri Labar Hyal ni ndǝrɛ ɓǝrtu apanda ya sakatǝ dzǝ tara nkǝrɛ, “Hyal ada sǝlku dzau ata kǝra mambǝl ni nam tǝ dzǝ tara mǝrti ka dzǝ ndzai akwa dzá muri”? 6 ^aAma dzǝ la muri ɗakurni hang. Ani sǝ nam tara ‘ya tǝ Labar Hyal nkǝrɛ:
“Hyal ada kanti whalɛ ala ndzǝr agula
ama dzǝ ada la ɗakurni ala ndzǝ nam tara tǝrghǝl kǝra dar.”

7 Kadǝbar ǝni ka gǝri kǝlǝngkǝr ala Hyal. Ta gǝri ta ngyar whalɛ ala Satan ani dzǝ ata whui ta gǝri. 8 Ka gǝri si kudzǝghɛ adzǝ Hyal ba dzǝ ata si kudzǝghɛ adzǝ gǝri. Kǝtsǝnta mɛ tsiya gǝri, gǝri ndzǝr biku, ba ka gǝri kǝtsǝnta ɗǝfa gǝri, gǝri nam aka hal sǝsǝɗɛ. 9 Ka gǝri ndzai akwa ɗǝfu sǝwa, ka gǝr sǝngǝlɛ ba tuwa. Ka ngusǝr gǝri palidzi ka ‘ya tuwa, ba kutsariyir gǝri sǝn ka ‘ya mǝngǝlkur ɗǝfu. 10 Ka gǝri tǝrghǝl kǝra gǝri akǝma Thlaku, antǝ dzǝ ata haɓǝti tǝ gǝri.

11 Madar mama kaka nkwaiyir mama yarɛ, ta gǝri ta gha su kulɗa ata kǝma gǝri mai. Ndɛ nam ada gha su kulɗakur ata kǝra zǝrangǝri wala ‘ya haka alari, dzǝ ada gha su kulɗa ba ‘ya haka ala Mabari ni. Sakatǝ gɛ ada ‘ya haka ala mabari ni, gɛ adai ada ɓǝla Mabari wɛ, ama gɛ ada ndzai ka ‘ya haka alari. 12 Hyal ɗiɗi ani tara hamnta mabari ba dzǝ ani ndǝr haka, dzǝ ani ada mǝzi ka mbati mpikɛ wala santa mpikɛ. Ama gɛ—gǝ wa tǝ gǝ awa ‘ya haka ala ntǝwhulǝr ngɛ?

Agula Akuya ka Arpɛ

13 ^bKulini siyamɛ thlǝmɛ, gǝri nam ada nkǝrɛ apǝri, “Asǝna wala arpɛ muri ata mwari akwa mǝlmɛ ǝni wala ǝnda, ka muri kǝtǝ fá akwanda, tǝ muri ata ‘ya fǝli ka ɓui kwapa.” 14 Kami, gǝri adi ta zǝndi sǝ nam ata ‘ya wala arpɛ ma wɛ. Mpika gǝri ni mǝrɛ? Gǝri mǝɗǝzɛ nam ada si akwa saka laka ani dzǝ tǝra. 15 Ata vuiya ǝni, ata ‘ya ɗaku ka gǝri nkǝrɛ apǝri: “Ma Thlaku yiɗɛ, tǝ mpika muri adai, muri ata ‘ya su ǝni wala ǝnda.” 16 Ama kulini, gǝri ada agula aka sǝ yarɛ nam tǝ gǝri ata ‘ya. Sanga agular gǝri yarɛ ni adi ɗaku wɛ. 17 Kadǝbar ǝni, kǝlara ndɛ nam tara zǝndi sǝ nam kal-kal ka dzǝ ‘ya, ama ma dzǝ ta ‘ya wɛ, dzǝ ‘ya biku.