‏ James 2

Tsan Pampamkur Adi Ɗa wɛ

1Madar mana kaka nkwaiyir mana yarɛ, gǝri nam aka mbǝrsa akwa Thlakǝr muri nam ngga Yɛsu Kǝrsti, ta gǝri tsan pampamkur. 2Akuya ma ndǝ laka si akwa tsaɓtsǝnidzǝr gǝri tǝ dzǝ akǝr ata dzari kulǝmǝr dinar ba kari nam ɗa-ɗa, ba ndǝ ngudi laka aka dazar kari yɛ si. 3Antǝ ma hankala gǝri tǝra ka ndɛ nam aka kari ɗa-ɗa ni ba gǝri nkǝrɛ alari, “Ndza vui ndzai ɗaku akuya ka gɛ,” ama gǝri nkǝrɛ ala ndǝ ngudi ǝnda, “Hyati tsu akwanda” wala “Ndzai ata dai akur thlǝlawai ni,” 4ǝni gǝri ta tsan pampamkur akwa ntsa gǝri wɛ ba gǝri mǝrti kǝr gǝri ndzǝr ‘ya haka nam aka ɗǝnga nam kulɗa wɛ?

5Siyamɛ thlǝma gǝri, madar mana ba nkwaiyir mana yarɛ nam tǝ Yi yiɗɛ: Hyal ta tsarba ndzǝ nam ngudi akwa ntsa ndzǝr dunya ni ka mǝrti tǝ dar bǝrba akwa hamnta dzǝri ba ka dar sǝm warta nǝr kuhyikur nam tǝ dzǝ ‘ya alkawalari ala dzǝ nam ada yiɗɛ tǝni wɛ? 6Ama gǝri ada ngǝngǝl ndzǝ nam ngudi! Adi ndǝ bǝrba ni ani ada dlǝrpǝtsǝni tǝ gǝri wɛ? Adi dar ani ada ndǝghǝr tǝ gǝri atǝra akǝma ndzǝr ‘ya haka wɛ? 7Adi dar ani ndzǝ nam ada nkǝr sǝ kulɗa ata kǝra thlǝma Yɛsu Kǝrsti ni nam ɗaku tǝ ndɛ ada kǝga tǝ gǝri akǝri ni wɛ?

8 ^aMa gǝri ɓǝlati mabariyir kuhyikur ni nam rǝbwa-rǝbwa akwa Labar Hyal, “Yiɗɛ ntǝwhulǝr ngɛ apa kǝrngɛ,” gǝri ada ‘ya sǝ nam kal-kal. 9Ama ma gǝri ada tsan pampamkur, gǝri ada ‘ya biku, ba ndǝ ngǝti tǝ gǝri atar mabari apǝri gǝri ndzǝr ɓǝlnta mabari. 10Akuya kǝlara ndɛ nam ada ɓǝlati sanga mabari yarɛ, ma dzǝ ka siya ɓǝlnta pathlu akwa ntsa dar, ani dzá kǝ ndzai ndǝr biku akwa dar sanga. 11 ^bAkuya dzǝ nam tara nkǝrɛ, “Ta gɛ ta ‘ya badawikur,” tsu dzǝ ani tara nkǝrɛ, “Ta gɛ ta tsa ndɛ.” Ma gɛ adi ada ‘ya badawikur wɛ ama gǝ ada tsa ndɛ, gɛ kǝ ndzai ndǝr ɓǝlnta mabari.

12Ka gǝri ndǝrɛ ba ‘ya su apa nǝr ndzǝ nam tǝ ndɛ ata ‘ya ala dar haka tǝ mabari nam ada si aka ɓui kǝr. 13Kadǝbar haka nam kura aka kǝtǝrdzi ani tǝ ndɛ ata ‘ya ala kǝlara ndɛ nam kura aka kǝtǝrdzi. Kǝtǝrdzi sǝmkǝr ata kǝra haka!

Hamnta Dzǝri ba Kǝthlǝr yarɛ

14Mi dza ani paidari, madar mana kaka nkwaiyir mana yarɛ, ma ndɛ gha apǝri dzǝ aka hamnta dzǝri ama dzǝ adi ada tsanti tǝ ‘ya kǝthlǝr wɛ? dzǝli hamnta dzǝri ǝni ata mǝzi ka mbati tǝni ya? 15Ma apǝri zǝr mama wala nkwar mama laka adi aka sǝr hati wala sǝr sǝm wɛ. 16Ma pathlu akwa ntsa gǝri nkǝrɛ alari apǝri, “Ka gǝ mwari lapiya, ba ka gǝ tǝtǝktǝdzi ka gǝ sǝm sǝr sǝmɛ ka gǝ ghǝi,” ama kura dzǝ ta lari sǝ nam tǝ dzǝ ada bara ni, mi ani paidari? 17Tsu apani, hamnta dzǝri ɗiɗi, ma adi aka kǝthlǝrǝrni wɛ, dzǝ ntǝnti.

18Ama ndɛ laka ata nkǝrɛ apǝri, “Gɛ aka hamnta dzǝri; Yi aka kǝthlǝrari.”

Tsanti alai hamnta dzǝrǝr ngɛ kura aka kǝthlǝr, ba Yi ata tsanti ala gɛ hamnta dzǝrǝrna atar kǝthlǝr nam tǝ Yi ‘ya. 19Gɛ mbǝrsa apǝri Hyal duku ani adai. Ɗaku! Wala mambǝl kulɗa yarɛ ma mbǝrsa apǝri ani ahani—ba dar ada kǝgǝdzi tǝ hyivǝr.

20Gɛ ndǝ dlang, gɛ ada bara ka ndɛ tsanti ala gɛ apǝri hamnta dzǝri kura aka kǝthlǝr paidari adai wɛ? 21 ^cHyal ta kǝtǝ kakár muri Ibrahim apǝri dzǝ ndɛ kal-kal akuya ka sǝ nam tǝ dzǝ ‘ya sakatǝ dzǝ hamnta zǝrǝrni Isaku ata muɓwɛ nǝr kǝdlǝrsu wɛ? 22Gǝri wula apǝri hamnta dzǝrǝrni ba kǝthlǝrǝrni mwari atakǝmaduku, ba hamnta dzǝrǝrni ghǝiyabadzi atar sǝ nam tǝ dzǝ tara ‘yati. 23 ^dBa sǝ tǝ Labar Hyal ni gha kǝ ghǝiyabadzi apǝri, “Ibrahim mbǝrsa aka Hyal, ba Hyal ka rǝbwai ata nya alari apǝri kalkalkur,” ba ndǝ ka ká tǝni tǝ pazǝr Hyal. 24Gǝri wula apǝri ndɛ ada ndzai kura aka aibai akǝma Hyal atar kǝthlǝr nam tǝ dzǝ ‘ya mai adi atar hamnta dzǝri ɗiɗi wɛ.

25 ^eAni tsuwɛ apani, Rahapu nam zawar ni ma hyal ta kǝtǝ tǝni apǝri dzǝ ndǝ kal-kal wɛ akuya ka sǝ nam tǝ dzǝ ‘ya sakatǝ dzǝ tara la vui pi ala ndzǝr wul asǝr yarɛ ni ba dzǝ ka hyanti tǝ dar atǝra ata whal damwa pam? 26Antǝ tsu apa tǝ dzɛ nam kura aka mambǝlɛ ani ntǝnti, ani tsu apani hamnta dzǝri kura aka kǝthlǝrari dzǝ ntǝnti.