‏ Mark 13

Par Su nǝr Dǝntar Zaman ni

(Mat 24:1-2; Luk 21:5-6)

1Apa tǝ Yɛsu angwada ngyar fǝr Hyal, duku akwa ntsa ndzǝr nuwurni nkǝrɛ alari, “Malǝm! Wul paya yar nam ngga-ngga ni aka fǝr yarɛ nǝr ndati!”

2Yɛsu sǝnau, “Gǝ wula sanga fǝr yarni nam ngga-ngga ni? Paya duku akwani nam tǝ ndǝ ata ngyar ata kǝra kǝmani adi wɛ, kǝlara duku ndǝ ata ɗalghǝl ata dai.”

3Apa tǝ Yɛsu ada ndzai ata kǝra Payar Zaitun ata ngwama fǝr Hyal, Bitrusu, Yakubu, Yawhana, ba Andǝrawusu yu tǝni ɗǝwa-ɗǝwa, 4“Nkǝrɛ ala yar saka madi tǝ sǝ yarni ata ‘ya? Aka mi ata ndzai pa apǝri dar sang angwada ghǝiyabadzi?”

5Yɛsu ka nkǝrɛ ala dar. “Ka gǝr vǝdzǝ Hankal ta ndǝ laka ta zǝlanta tǝ gǝri. 6Ndzǝ hang ata si akwa thlǝmawai, ka dar nkǝrɛ, ‘Yi ani dza,’ dar ata zǝlanta ndzi hang. 7Sakatǝ gǝri ngati mpa kaka kǝriku, ta hankalǝr gǝri ta hyati mai. Əni yarni si madar ‘ya ama sakar kurǝr zaman ta ‘ya wɛ. 8Di ata ɗǝkǝr ata kǝra di, ba kuhyikur ata kǝra kuhyikur. Ndǝ ata ‘ya kǝngǝrǝr dai yarɛ akwa vui yarɛ pam-pam, ba mi yarɛ. Əni yarni ani baditsǝniyir kal yarɛ nǝr thlǝ munar ya.

9 ^a“Ama ka gǝri vǝdzǝ hankal ala kǝr gǝri, kadǝbar dar ata la tǝ gǝri ala bǝlama yarɛ ka dar dlaɓwɛ tǝ gǝri akwa fǝr vǝkǝr sǝlai ala Hyal, gǝri ata hyati akǝma Gumna yarɛ, kaka kuhyi yarɛ, kadǝbar gǝr ndzǝr nu tǝra, ka nkǝrɛ ala dar ndǝrǝr Hyal nam sǝɗa. 10Akuya ndɛ ata ‘ya ndǝrǝr Hyal nam sǝɗa kǝma ala sanga dunya. 11Sakatǝ ndǝ ngǝti tǝ gǝri ka mwari aka gǝri akǝma haka, ta gǝri ta damitsǝnidzi kǝma ta sǝ tǝ gǝri awa gha. Ɗiɗi ghamɛ sǝ nam tǝ ndǝ la gǝri ata saka nda. Akuya adi gǝr dza ani ada ndǝr wɛ, ama Mambǝl Kartǝ.

12“Zǝr mama ata ɓǝlai zǝr mama ka tsi tǝni, ba tada yɛ ala zǝrǝrni; madausai ata siya muli ata kǝra ndzǝr yar dar har ma ba hamnta ka ndǝ tsi tǝ dar. 13 ^bBa sanga ndzi ata siya ngǝla tǝ gǝri ata nyarna, ama ndǝ nam tara ɓati ka la dǝnta dzǝ ata ɓui mbatǝdzi.

14 ^c“Sakatǝ gǝr wula ‘sǝr agya ni nam ada si aka whuzanta su,’ ada hyati akwa vui nam kura nǝni— akwa vui nam kura kal-kal ngyar ka ndǝr kǝra ni ka dzǝ ngaba—ngyar ka ndzǝ nam akwa Yahudiya whui atǝra akwa paya yarɛ. 15 ^dNdǝ nam ati ata bukarfǝr tsuwɛ ta dzǝ ta sǝgǝl wala lǝmbwa ka kǝl su. 16Ndǝ nam akwa fwaku ta dzǝ ta mwara livi ka kǝl lǝkutǝrni mai. 17Bwasam ala mwahyi nam aka whur ba nam tsu aka madar ata nya u’uwa akwa vǝr yarɛ ǝnda! 18Ka gǝri ‘ya aduwa ta sǝ ǝni ta ‘ya akwa sakar lang-lang, 19 ^ekadǝbar akwa saka ǝnda, bwanai ata ‘ya hang ta watsi tǝng sakatǝ Hyal mǝrti dunya, ka la saka ǝni, ani adi ata dzakti ‘ya hang kǝra wɛ. 20Ma adi Thlaku tara kǝnta vǝr yarnda wɛ, ndɛ adai nam ata ɓui mbatǝdzi wɛ. Ama kadǝbar ndzǝ tsartsari ni dzǝ kǝnta vǝr yarnda. 21Ata saka ǝnda ma apǝri ndǝ laka nkǝrɛ ala gǝri, ‘Wulɛ, nda Kǝrsti akwani!’ wala, wulɛ Anda dza akwanda, ta gǝri ta mbǝrsa akǝr; 22Akuya ndzǝr hawiyir Kǝrsti yarɛ ba nabiyir hawi yarɛ ata sǝba ka tsan parsu yarɛ ba ‘ya sǝr ndati yarɛ nam ata zǝlanta ndzǝ nam tǝ Hyal tsarba—ma apǝri ǝndari awa ‘ya. 23Ama vǝdzamɛ hankal, Yi nkǝrɛ ala gǝri sanga su kǝma ta tǝ dzǝ awa ‘ya.

24 ^f“Ama akwa vǝr yarɛ ǝnda, aghǝla bwanai yarni,
“‘tsǝtsi ni ata siya ‘ya kuthlɛ pǝlǝk,
ba hya ni adi ata mbǝli kǝra wɛ;
25 ^gtsambiya yarɛ ni nam ati ata pughǝldzi,
ba dǝna yarɛ ni nam atahyal ata siya kǝngǝrtǝdzi.’

26 ^h“Akwa saka ǝnda ndzi ata wula Zǝr Ndɛ ada sǝgǝl akwa dlamba vwam kaka dǝna nam ɓwaltasang, ba nggakurni; 27Antǝ dzǝ ata hyanti ndzǝr hyantǝrni yarɛ ka dar tsaɓtsǝni ndzǝ nam tsartsarǝrni akwa kuɗǝma fwaɗu, aka dǝntar dunya ba aka dǝntar ati.

28“Kulini ka gǝri tsǝlɛ sǝr tsǝl ǝni ata fur kanda; sakatǝ thlaliyirni ada punta ba ada ɗǝɗa nam bǝlin, gǝri zǝndi apǝri viya kǝ ‘ya kudzǝghɛ. 29Tsu apani, sakatǝ gǝri wula sǝ ǝni yarni ada ‘ya, gǝri zǝndi apǝri dzǝ kǝ ‘ya kudzǝghɛ, ngǝngǝɗu anyavǝr. 30Yi ada gha ala gǝri dzǝri, zaman ǝni adi ata kwatsǝni wɛ, tar ma sanga sǝ ǝni yarni ‘yatǝdzi. 31Atahyal aka dai ata kwatsǝni, ama labarǝrna adi ata saga kwatsǝni wɛ.

Vǝr ni ba Saka ni Ndǝ

Ta Zǝndi wɛ

(Mat 24:36-44)

32 ⁱ“Ndɛ adai nam tara zǝndi sǝ ata kǝra vǝri wala saka ni wɛ, wala ndzǝr hyantǝr Hyal nam atahyal, wala Zǝr, ama ɗiɗi Tada ni. 33Vǝdzǝmɛ hankal, ndzai ɗǝmhǝɗǝmhǝi! Akuya gǝri ta zǝndi vǝr tǝ saka ata si wɛ. 34 ^jAta ndzai apa sal tara tǝra alǝba: dzǝ ka ngyar kǝiyirni ba dzǝ ka hau akwa tsiya madar kǝiyirni yarɛ ka dar wulɛ kǝi ni, ba dzǝ la kǝlara ndɛ kǝthlǝr tǝ dzǝ ata ‘ya ba la mbari ala ndǝr wul nyavǝr ka dzǝ ɓǝla.

35“Kadǝbar ǝni ka gǝri wulɛ kadǝbar gǝri ta zǝndi sakatǝ thlakǝr kyi ata si wɛ, ma apǝri ata mǝzi ndzai tǝhaku, wala rakǝndi wala tuwar vukum, wala sǝtǝr tsǝtsi. 36Ma apǝri dzǝ si kura ka yakǝn, ta dzǝ ta ɓui tǝngɛ ata hanyi. 37Sǝ nam tǝ Yi tara nkǝrɛ ala gǝri, ani, Yi nkǝrɛ ala ndzi sang, ‘Ka gǝr wulɛ!’ ”