‏ Mark 2

Yɛsu Mbǝti Ndǝ Ngurngudi

(Mat 9:1-8; Luk 5:17-26)

1Aghǝla vǝr yiɗau laka Yɛsu dzakti mwari akwa Kafarnahum, labarǝrni ka kikilntadzi apǝri dzǝ aivi. 2Ndzǝ hang si antǝ fǝr tara mbi adi wɛ, wala anyavǝr ma. Yɛsu nkǝr labar ala dar. 3Ndzǝ fwaɗu si, ada kǝl ngurngudi asi adzǝ Yɛsu. 4Akuya ka dlamiyir ndzi dar ta ɓui ka mwari adzǝ Yɛsu aka ndǝ ni wɛ, dar ka ntǝli gulɛ ata kǝra fǝr akwa vui tǝ Yɛsu ati. Sakatǝ dar mburnta vui ni dar haghǝl butsi nam tǝ ndǝ masǝkǝn ni ada pi ati. 5Sakatǝ Yɛsu wuti mbǝrsar dar aka dza, dzǝ nkǝrɛ ala ngurngudi ni, “Zǝrna, bikǝr ngɛ kǝ kyifǝntadzi.”

6Laka malǝmǝr mabari yarni nam akwanda ndzi ka ɗǝnga aka kǝr dar, 7“Mǝmi tǝ dzǝ ada labar apani? Əni ani sǝwa thlǝma Hyal! Dzǝ duku ani ata kyifǝnta biku!”

8Ata saka duku Yɛsu zǝndi sǝ nam tǝ dar ada ɗǝnga akwa kuta dar, antǝ dzǝ nkǝrɛ ala dar, “Kami tǝ gǝri ada ɗǝnga dzǝli sǝni? 9Madi ani kǝsǝkai: ka ndǝ nkǝrɛ ala ngurngudi ni, ‘Yi kyifǝnta ala gǝ bikǝr yarɛ,’ kǝna ka ndǝ nkǝrɛ, ‘Hyati, kǝti butsǝr ngɛ ka gǝ mwari’? 10Ama ani ka gǝri zǝndi apǝri Zǝr Ndɛ aka wada akwa dunya ka dzǝ kyifǝnta biku yarɛ....” Dzǝ ka nkǝrɛ ala ndǝ ngurngudi ni, 11“Yi gha ala gǝ, hyati, kǝtǝ butsǝr ngɛ ka gǝ tǝra livi!” 12Sakatǝ sanga dar wula ndǝ ni tara hyati, ka kǝtǝ butsǝrni, ka tǝra bǝtǝbǝtu, dar sang ndatǝdzi tǝ dar ka hǝm Hyal, ka nkǝrɛ, “Yar ta saga wula dzǝli su apani wɛ!”

Yɛsu Kǝga Lawi ni

(Mat 9:9-13; Luk 5:27-32)

13Yɛsu dzakti mwari ata nya mandar Galili. Ndzǝ hang si adzǝni, antǝ dzǝ baditsǝni hyipɛ ala dar. 14Sakatǝ dzǝ ada mwari, dzǝ wula ndǝr dlu tsǝmɛ, Lawi zǝr Halfa, ada ndzai akwa vui dlu tsǝmɛ. Yɛsu gha alari, “Nu tǝra.” Lawi hyati ka nuti tǝni.

15Aghǝla ǝni Yɛsu ada sǝm sǝr sǝmɛ akwa kǝiyir Lawi. Ndzǝr dlu tsǝmɛ hang kaka ndzǝr biku ada nu Yɛsu, antǝ ndzǝ hang kǝltsǝnidzi kaka dza aka ndzǝr nuwurni ata tɛbǝr duku. 16Bwadukwa malǝmǝr mabari yarni nam ndzǝr Farisi, wuti Yɛsu ada sǝm sǝr sǝmɛ kaka ndzǝ nam aka biku kaka ndzǝr dlu tsǝmɛ, antǝ dar yu ndzǝr nuwurni, “Kami tǝ dzǝ ada sǝmɛ aka dzǝli ndzǝ ni?”

17Sakatǝ Yɛsu ngati ǝni, dzǝ ka nkǝrɛ ala dar, “Ndzǝ nam kalang adi ada bara ndǝr kuzugu wɛ, ama ndzǝ kura kalang. Yi ta si ka Yi kǝga ndzǝ nam kal-kal wɛ, ama ndzǝr biku yarɛ.”

Ndǝ Yuwɛ Yɛsu ata Kǝra Asam

(Mat 9:14-17; Luk 5:33-39)

18Vǝr laka ndzǝr nuwur Yawhana kaka ndzǝr Farisi aka asam, antǝ dar ka si ka yu Yɛsu apǝri, “Kami tǝ ndzǝr nu Yawhana kaka ndzǝr Farisi aka asam, ama ndzǝr nu tǝngɛ adi akǝr wɛ?”

19Yɛsu ka sǝnau, “Mǝmi tǝ pazǝr salakambǝl yarɛ awa ndzai aka asam tǝ salakambǝl tsu adzǝ dar? A’a wɛ, Tsu tǝ salakambǝl kaka dar, dar adi ata kǝl asam wɛ. 20Ama vǝr ata si nam tǝ ndǝ ata kǝlnta salakambǝl akwa ntsa dar, antǝ saka nda dar ata kǝl asam.”

21“Ndǝ adi ada mbu lǝkutu halhali aka dina bǝlin wɛ, akuya mbu nam bǝlin ni ata murdzǝba ka thlǝkwanta nam hal-hal ni, antǝ thlǝkwari ata ‘ya kulɗa wurwuri. 22Ba ndǝ adi ada pu yimǝr inabi bǝlin akwa ngǝrkǝr yarɛ nam hal-hal wɛ. Ma dzǝ ‘ya, yimǝr inabi ni ata ndǝlanta ngǝrkǝr yarni, ba yimǝr inabi ni gyapu aka ngǝrkǝr yarni ata sǝwatǝdzi. A’á, dzǝ ata pu yimǝr inabi bǝlin akwa ngǝrkǝr yarɛ nam bǝlin.”

Thlaku nǝr Vǝr Sǝbdu ni

(Mat 12:1-8; Luk 6:1-5)

23 ^aVǝr Sǝbdu ni nam ani Vǝr Ghǝrbadzi tǝ Yɛsu ata kǝra mwari ka ɓǝlba ata fwakǝr uhyi yarɛ, ba apa tǝ ndzǝr nuwurni yarɛ ada mwari, dar ka baditsǝni ɓǝgǝl laka zangamǝr uhyi. 24Ndzǝr Farisi ni nkǝrɛ ala Yɛsu, “Wulɛ, kami tǝ ndzǝr nuwur ngɛ ada ‘ya sǝ nam tǝ mabari kanti ata vǝr Sǝbdu?”

25Yɛsu sǝnau, “Gǝri ta kǝra sǝ tǝ Dauda tara ‘ya sakatǝ dzǝ ada bara sǝr sǝm wɛ?” Tǝ dar kaka ndzǝrni aka mi, 26 ^{b c}antǝ dzǝ mwari akwa fǝr Hyal ka kwasǝ mantsǝkǝl nam tǝ ndǝ la Hyal. Əni mǝrtǝdzi sakatǝ Abiathla dza kuhyir fǝrist. Akwa mabariyir muri, fǝrist yarɛ ani ata sǝm mantsǝkǝl ni, ama Dauda kwasɛ har ma dzǝ la ndzǝrni.

27Antǝ Yɛsu kurai, vǝr Sǝbdu dza tǝ ndǝ mǝrti kadǝbar ɗakur ndzi, adi ndɛ tǝ ndǝ mǝrti kadǝbar vǝr Sǝbdu wɛ. 28Akuya ka Zǝr Ndɛ ni ani Thlaku wala nǝr vǝr Sǝbdu ni.