‏ Mark 3

1Vǝr laka Yɛsu mwari akwa fǝr vǝkǝr sǝlai, vui nam tǝ ndǝ laka aka tsiyari tara satǝdzi. 2Ndzǝ laka adai nam ada bara nkǝrɛ apǝri dzǝ ada ‘ya su kura kal-kal, tǝ dar ada wulɛ tar dzǝ ata mbǝti ndɛ vǝr Sǝbdu. 3Yɛsu gha ala ndǝ nam tǝ tsiyari tara satǝdzi ni, “Azǝrɛ akwani akǝma.”

4Antǝ dzǝ ka yu ndzi, “Mǝ tǝ mabariyir muri tara ngyar tǝ muri ka muri ‘ya vǝr Sǝbdu? Ka ndǝ ‘ya sǝ ɗaku kǝna ka ndǝ ‘ya kǝmangarkur? Ka ndǝ mbati mpika ndɛ kǝna ka ndǝ tsai tǝni?” Ama dar ta gha su wɛ.

5Ɗǝfa Yɛsu sǝwa sakatǝ dzǝ wul tǝ dar, ama tsu ata saka nda, dzǝ ‘ya kǝtǝrdzi ala dar kadǝbar ɓaɓalkur ɗǝfa dar. Antǝ dzǝ gha ala ndǝ ni, “Munta tsiya gǝ.” Dzǝ munta antǝ ka ‘ya kalang kadamwa. 6Antǝ ndzǝr Farisi ka ngyar fǝr vǝkǝr sǝlai ka lǝka kǝɓai kaka ndzǝr Hirudus, tǝ dar ka ‘ya sawari kadǝbar ka dar tsi tǝni.

Dlamiyir Ndzi Nu Yɛsu

7Yɛsu kaka ndzǝr nuwurni mwari ata nya mandar Galili, antǝ ndzi hang nu tǝni, dar hyati akwa Diyir Galili, aka diyir Yahudiya. 8Antǝ tsuwɛ akwa Ursalima, ba diyir Idumiya, ba di nam tǝbwar gǝdi ata ngwama Urdun ba di nam tara kalaktsǝni Taya aka Sidaun. Sanga ndzǝ ni si adzǝ Yɛsu kadǝbar dar ngati ata kǝra sǝ nam tǝ dzǝ ada ‘ya. 9 ^aNdzǝ ni dar hang tǝ Yɛsu gha ala ndzǝr nuwurni ka dar ɗǝmhǝi alari zǝr-zǝr sar, akuya ta ndzǝ ta mbǝmbǝya tǝni. 10Kadǝbar dzǝ mbǝti ndzǝ hang, antǝ sanga ndzǝ nam kura kalang ada bara whalɛ ka dar tsǝkwar tǝni. 11Antǝ ndzǝ nam aka mambǝl nam kulɗa akwa dza dar wula tǝni, dar ada dla akǝmari ada lǝlɛ, “Gǝ dza Zǝr Hyal!” 12Ama Yɛsu ɗǝmnya ala mambǝl nam kulɗa yarni ta dar ta gha ala ndɛ ata kǝrari.

Yɛsu Tsarba Ndzǝr

Hya Kumɛ Kapu Sǝɗǝ ni

(Mat 10:1-8; Luk 6:12-16)

13Yɛsu fǝlti ngwama paya ka kǝga ndzǝ nam tǝ dzǝ ada bara ala kǝrni, dar ka si adzǝni. 14Antǝ dzǝ tsarba kum kapu sǝɗɛ nam tǝ dzǝ vǝti thlǝmɛ ala dar ndzǝr hya. Dzǝ gha ala dar, “Yi tsarba tǝ gǝri ka mur ndzai atakǝmaduku. Yi ata hyanti tǝ gǝri alǝba ka gǝr nkǝr ndǝrǝr Hyal nam sǝɗa. 15Antǝ gǝri ata ɓui wada nǝr kǝdlǝba mambǝl yarɛ nam kulɗa.” 16Əni ani kum kapu sǝɗɛ tǝ dzǝ tsarba; Simaun (tǝ Yɛsu vǝtǝ thlǝmɛ alari Bitrusu); 17Yakubu aka zǝrangǝri Yawhana, madar Zabadi (Yɛsu la dar thlǝmɛ Bwanadzis, nam ada nkǝrɛ Madar Pǝral); 18Andǝrawusu, Filibusu, Barthlalaumisu, Mata, Tauma, Yakubu zǝr Halfa, Thladiyus, Simaun Zailaut, 19aka Yahuda Iskaryauti, ndǝ nam tara ɓǝlai Yɛsu.

Yɛsu ba Bɛlzǝbul

(Mat 12:22-32; Luk 11:14-23; 12:10)

20Antǝ Yɛsu lǝkwa kǝi laka. Dlamiyir ndzi ka dzakti kǝltsǝnidzi har Yɛsu kaka ndzǝr nuwurni adi aka sakar sǝm sǝr sǝmɛ wɛ. 21Sakatǝ ndzǝrni ngati ata kǝra sǝr ‘yarni, dar lǝba ka dar ngǝti tǝni alivi, akuya ndzǝ ada gha apǝri dzǝ ‘ya dlang!

22 ^bMalǝmǝr mabari yar laka nam tara hyati akwa Ursalima ada nkǝrɛ, “Dzǝ aka ka Bɛlzǝbul akwa dzari! Aka kuhyir mambǝl nam kulɗa yarni ani tǝ dzǝ ada kǝdlǝba mambǝl nam kulɗa yarni.”

23Yɛsu kǝga tǝ dar ka labar ala dar aka karabu, “Apa madi tǝ Satan ata kǝdlǝba Satan kǝmani? 24Ma kuhyikur ndǝghǝbadzi, dzǝ adi ata ‘ya aka dǝna wɛ. 25Ma kǝi ndǝghǝntadzi dzǝ adi ata ‘ya aka dǝna wɛ. 26Ma apǝri kuhyikur Satan ndǝghǝbadzi, kuhyikurni adi ata sǝkar wɛ, ama ata ‘ya kura dǝna, antǝ dǝnarni ata kuri.” 27“Ndɛ adi ata livi akwa kǝiyir ndǝr dǝna ka dzǝ fati kariyirni wɛ, tar ka dzǝ mbwai ndǝ ni kama dzǝ fati kariyirni. 28Yi ada gha ala gǝ dzǝri, sanga biku ba gha sǝ nam kulɗa ata kǝra Hyal nǝr ndzi ndǝ ata kyifǝnta ala dar. 29 ^cAma kǝlara ndǝ nam tara gha sǝ nam kulɗa ata kǝra Mambǝl Kartǝ, Hyal adi ata saga kyifǝnta alari bikǝrni wɛ, akuya dzǝ ‘ya biku nam ata ndzai ata kǝrari har kura kurkuri.”

30Yɛsu nkǝr ǝni akuya ndzǝ ada gha apǝri dzǝ aka mambǝl nam kulɗa.

Angǝra Yɛsu ba Madar Angǝri

(Mat 12:46-50; Luk 8:19-21)

31Antǝ angǝra Yɛsu kaka madar angǝri si, dar hyati abǝla ka hya kuɗahu apǝri dar ada bara tǝni. 32Ndzǝ hang ada ndzai adzǝ Yɛsu, antǝ dar ka gha alari “Wulɛ, nda ma kaka madar ma kaka nkwaiyir ma abǝla dar ada bara tǝngɛ.”

33Yɛsu sǝnau, “Wa ani mana kaka madar mana?”

34Dzǝ wul ndzǝ nam ada ndzai adzǝni, antǝ dzǝ ka gha, “Wulɛ, ǝni yarni ani mana kaka madar mana! 35Ndǝ nam ada ‘ya sǝ nam tǝ Hyal ada bara ka dzǝ ‘ya ani madar mana, kaka nkwaiyir mana ba mana.”