‏ Revelation of John 11

Sakǝida yarɛ Sǝɗɛ ni

1 aNdǝ lai kusar laka dzǝgam apa zuwar nkǝrti su ba ndǝ gha alai, “Mwari ka gǝ nkǝrti fǝr Hyal ni ba muɓwɛ ni, ba ka gǝ tsǝba ndzǝ nam ada vǝkǝr sǝlai akwa. 2 bAma ta gǝ ta hau babalǝr ndzǝ kura Yahudi akwa; ta gǝ ta nkǝrti tǝni, kadǝbar ndǝ la tǝni ala ndzǝ kura Yahudi. Dar ata dlaɓwɛ aka thlǝlɛ mǝlmǝr Hyal ni nǝr hya 42. 3Ba Yi ata la dǝna ala sakǝidarna sǝɗɛ, ba dar ata ‘ya nabikur nǝr vǝr yarɛ 1,260, tǝ dar aka lǝkutǝr buhu.” 4 cƏni yarni ani fur zaitun sǝɗɛ ba thlǝmthlǝmǝr hai pitǝla sǝɗǝ nda nam ada hyati akǝma Thlakǝr dunya. 5Ma kǝlara ndɛ bara ka dzǝ ‘yanta tǝ dar, u’u ada sǝba akwa nya dar ka mbanta dǝgunmar dar. Əni ani whal nam tǝ kǝlara ndǝ nam tara bara ka dzǝ ‘yanta tǝ dar ata nti kǝ ndzai ntsakǝr. 6 dNdzǝ yarni dar aka dǝna ka dar harti dzahyal ati ani ka kura yimi awa si akwa saka nam tǝ dar ada ‘ya nabikur; ba dar aka dǝna tǝ dar ata sǝmwati yimi yarɛ ka dzǝ ‘ya masi ba ka dar tsa dai aka kǝlara dzǝli kǝriku ka hang apa tǝ dar ada bara.

7 eKulini sakatǝ dar kurai nkǝr sǝr dar, mawi kulɗa ni nam tara sǝba akwa Kau nam Dzǝgam nda ata ɗǝkǝr ala dar, ka kwatsǝni dǝnar dar ka tsi tǝ dar. 8 fNdǝ ata ngyar kumǝr dzá dar ada punta ata kǝra whalɛ akwa kuta mǝlmɛ nam ngga, nam akwa karabu ndɛ ada ka tǝ Saudaum aka Masar, vui nam tǝ ndǝ kukwanta Thlakǝr dar akwa yɛ. 9Nǝr vǝr makǝr aka raita sǝli akwa kǝlara ndzi, dǝr, nya ba dai ata wula kumǝr dzá dar ba ka ngǝla har tǝ dar. 10Ndzǝ nam akwa dunya ata kutsari ata kǝra dar ba dar ata ‘ya gyali ka hyanǝ sǝga yarɛ ala kǝma dar, kadǝbar nabi sǝɗɛ yarni la bwanai ala ndzǝ nam akwa dunya.

11 gAma aghǝla vǝr makǝr aka raita ni, mpihǝr mpikɛ nǝr Hyal lǝkwa dzá dar, ba dar hyati ata thlǝla dar, ba hyivǝr ka ngǝti ndzǝ nam tara wula tǝ dar. 12 hAntǝ dar ngati kuɗahu ngga atahyal ada nkǝrɛ ala dar, “Azǝramɛ asǝti akwani.” Ba dar ka mwari alǝtahyal akwa dlamba, tǝ dǝgunmar dar yarɛ ada wulɛ.

13 iTsu ata saka ǝnda kǝngǝrǝr dai nam dzau ‘ya ba bwa kumɛ nǝr mǝlmǝ ni whuzantadzi. Ndzǝ kumthlani kumɛ ka murfwɛ kurntadzi akwa kǝngǝrǝr dai ni ba ndzǝ nam kura ta kurntadzi lǝkwa hyivǝr ba dar la sǝlai ala Hyal nam atahyal.

14Su kulɗa nǝr sǝɗǝkur ni kǝ kwatsǝni; su kulɗa nǝr makǝrkur angwada si kulini-kulini.

Aligǝta nǝr Murfwǝkur ni

15 jNdǝr hyantǝr Hyal nǝr murfwǝkur mbǝr tǝmbǝlǝrni ni, ba kuɗahu yarɛ ngga atahyal, tara nkǝrɛ:
“Kuhyikur nǝr dunya kǝ ‘ya kuhyikur nǝr Thlakǝr muri ba nǝr Kǝrsti ni,
ba dzǝ ata ‘ya kuhyikur kura kurkuri.”

16Ba ndzǝ ngga-ngga sǝɗǝthlani kapu fwaɗu ni, nam ada ndzǝndzai ata dǝgǝl kuhyikur dar yarɛ akǝma Hyal, dlǝdla tǝ kǝma dar ka vǝkǝr sǝlai ala Hyal, 17tǝ dar ada gha:
“Yar gwaditsǝni ala gɛ, Thlaku Hyal nam ɓwaltasang,
gǝ nam kulini ba awatsi,
kadǝbar gǝ kǝtǝ dǝnar ngɛ nam ngga
ba gǝ baditsǝni ‘ya kuhyikur.

18 kƊǝfa ndzǝr dai yarɛ sǝwa;
ba sǝwa ɗǝfǝr ngɛ kǝ si.
Saka kǝ si akuya ka ‘ya haka ala ndzǝ ntǝnti,
ba ka la wadzǝɓa ala madar kǝiyir ngɛ yarɛ, nabiyir ngɛ yarɛ
ba ndzǝr ngɛ nam ada hyivǝr thlǝma gɛ,
gyapu ndǝ nam nkyiɗu ba ndǝ nam ngga—
ba akuya ‘yanta ndzǝ nam tara ‘yanta dunya.”

19 lAntǝ fǝr Hyal nam atahyal mburntadzi, ba akwa kuta fǝr Hyalǝrni ndǝ wula ɗakwatiyir sǝ mbwa-mbwa ni. Ba akwanda parakǝr makǝi, pǝral yarɛ, dlǝri, kǝngǝrǝr dai ba mandzandzǝlai hang si.
Copyright information for CklSC