Rev 12 | CklSC | STEP | Sǝr ndati ngga sǝba atahyal: mwala tara dli tsǝtsi, aka hya akwi thlǝlari ba aliyapǝr tsambiya kumɛ kapu sǝɗɛ ata kǝrari.

‏ Revelation of John 12

Mwala Ni aka Nggar Pwapu Kulɗa ni

1 Sǝr ndati ngga sǝba atahyal: mwala tara dli tsǝtsi, aka hya akwi thlǝlari ba aliyapǝr tsambiya kumɛ kapu sǝɗɛ ata kǝrari. 2 Dza aka hur, ba dzǝ ada tuwar kalɛ kadǝbar dzǝ angwada bara ya. 3 ^aAntǝ sǝr ndati damwa sǝba atahyal: nggar pwapu kulɗa laka ngga magza aka kǝr murfwɛ ba tǝmbǝl kumɛ ba aliyapu murfwɛ ata kǝrari yarɛ. 4 ^bKuɗari tsarnta bwa makǝrkur nǝr tsambiya yarɛ atahyal ka pughǝl tǝ dar ata dai. Nggar pwapu kulɗa ni hyati akǝma mwala nda nam ada bara ya ni, ani ka dzǝ ndahǝti zǝrǝrni ni tǝnyi ma dzǝ yai. 5 ^cDzǝ ka yai zǝr, zǝr sal, nam ata ‘ya kuhyikur ndzǝ yarɛ aka zuwar kuhyikur nǝr yang. Ba ndǝ ka kǝlnta zǝrǝrni ni alǝti adzǝ Hyal ba dǝgǝl kuhyikur ni. 6 Mwala ni whui atǝra akwa ntaku akwa vui nam tǝ Hyal tara ɗǝmhǝ alari, vui nam tǝ ndɛ ata wulhǝ tǝni nǝr vǝr yarɛ 1,260.

7 ^dBa mpa ka hyati atahyal. Makyal kaka ndzǝr hyantǝr Hyal yarɛ ni tǝ dar ada mpa nggar pwapu kulɗa ni, ba nggar pwapu kulɗa ni kaka ndzǝr hyantǝrni yarɛ yɛ ada mpa tǝ dar. 8 Ama nggar pwapu kulɗa ni dzǝ adi aka dǝna tara mǝzi wɛ, ba dar ka nai ta vuiyir dar atahyal. 9 ^eNdǝ ka ɗalghǝl nggar pwapu kulɗa nam ngga ni—pwapu nam watsi tǝ ndǝ ada ka tǝ Satan, nam tara zǝlanta dunya sang. Ndǝ ɗalghǝl tǝni ata dai, ba ndzǝr hyantǝr Hyal ni yarɛ kaka dza.

10 ^fAntǝ Yi ngati kuɗahu ngga atahyal ada gha:
“Kulini mbatǝdzi ba dǝna ba kuhyikur nǝr Hyalǝr muri,
ba wada Kǝrstiyirni kǝ si.
Akuya ndǝr bǝrku madar mama muri,
nam ada bǝrku tǝ dar akǝma Hyalǝr muri tsǝtsi aka vǝri,
ndǝ ɗalghǝl tǝni.
11 Dar sǝmkǝr ata kǝrari
atar masǝr Zǝr Agam
ba atar labar nam tǝ dar sakǝidatsǝni;
dar ta yiɗǝ mpika dar
tǝ dar awa hyivǝr ntǝ wɛ.
12 Kadǝbar ǝni kutsariyamɛ gǝri nam atahyal yarɛ
ba ndzǝ nam ada ndzai akwa gǝri!
Ama su kulɗa ala dai ba manda,
kadǝbar Satan ni kǝ tǝra alǝghǝl akwa gǝri!
Dzǝ ghǝi-ghǝi aka ɗǝfu,
kadǝbar dzǝ zǝndi apǝri sakar ni mbi nkusu.”

13 Sakatǝ nggar pwapu kulɗa wuti apǝri ndǝ kǝ ɗalghǝl tǝni ata dai, dzǝ kadu mwala nam tara yai zǝr sal ni. 14 ^gNdǝ la mwala ni bǝbǝga ambǝlǝm nam ngga sǝɗɛ, ani ka dzǝ mǝzi ka ɗǝghǝti atǝra akwa vui nam tǝ ndǝ ɗǝmhǝ alari akwa ntaku, vui nam tǝ ndɛ ata wulhǝ tǝni nǝr saka, saka yarɛ ba raitar saka, vui nam kura pwapu ni awa tsǝbti. 15 Antǝ pwapu ni ka puba yimi hang asǝba akwa nyari apa kyagha, ka dzǝ kǝtǝ mwala ni ba tsarnta tǝni atǝra aka whuyir yimi. 16 Ama dai ka mbana mwala ni, atar tǝ dai mburnta nyari ka ndahǝti kyagha nam tǝ nggar pwapu kulɗa ni tara puba akwa nyari ni. 17 Antǝ ɗǝfa nggar pwapu kulɗa ni ka sǝwa ala mwala ni ba dzǝ ka tǝra lǝka dlǝ mpa kaka mambiya madar mwala ni—ndzǝ nam ada ɓǝla tsawur Hyal yarɛ ba ada ngǝzi sǝ nam tǝ Yɛsu nkǝrɛ ba ‘ya. 18 Ba nggar pwapu kulɗa ni mwari ka hyati ata wuyahǝr manda.