Rev 17 | CklSC | STEP | Pathlu akwa ntsa ndzǝr hyantǝr Hyal yarɛ murfwɛ nam aka ntasa yarɛ murfwǝ ni si ka nkǝrɛ alai, “Azǝrɛ, Yɛ ata tsanti ala gɛ bwanai nǝr zawar nam ada ndzai ata kǝra yimi yarɛ.

‏ Revelation of John 17

Zawar ba Mawi Kulɗa ni

1 ^aPathlu akwa ntsa ndzǝr hyantǝr Hyal yarɛ murfwɛ nam aka ntasa yarɛ murfwǝ ni si ka nkǝrɛ alai, “Azǝrɛ, Yɛ ata tsanti ala gɛ bwanai nǝr zawar nam ada ndzai ata kǝra yimi yarɛ. 2 ^bKuhyir dunya yarɛ ‘ya badawikur aka dza ba ndzǝ nam ada ndzai akwa kuta dunya ka ghǝi tǝ mbalǝr badawikurni.”

3 ^cAntǝ ndǝr hyantǝr Hyal ni ka kǝtǝ tǝra akwa mambǝlɛ alǝkwa ntaku. Akwanda Yi wula mwala ada ndzai ata mawi kulɗa magza pitu nam tǝ ndǝ mbui aka thlǝmǝr ngǝngǝl yarɛ ba dzǝ aka kǝr yarɛ murfwɛ ba tǝmbǝl yarɛ kumɛ. 4 ^dMwala ni hadzǝ kari apa yimǝr galura ba magza pitu, ba ada mbǝli apa dinar, dzǝli paya yarɛ hang nam tǝ ndɛ ada ɗǝlɛ dzau. Dzǝ ngǝzi kapǝr dinar akwa tsiyari, ghǝi-ghǝi aka sǝr aghya yarɛ ba diɗɛ nǝr badawikurni yarɛ. 5 Ba ata murmurkǝmari rǝbwa-rǝbwa thlǝma su ɗǝwa-ɗǝwa:

BABILA NAM NGGA

ANGƏRA ZAWAR YARƐ

BA ANGƏRA SƏ NAM AGYA YARƐ AKWA DUNYA.

6 Yi wula apǝri mwala ni kǝ ghǝi aka masǝr ndzǝr Hyal, masǝr ndzǝ nam tara nkǝrnta su ata kǝra Yɛsu.

Sakatǝ Yi wula tǝni Yi ndatǝdzi dzǝr dzǝri. 7 Antǝ ndǝr hyantǝr Hyal ni ka nkǝrɛ alai: “Kami tǝ gǝ ndatǝdzi? Yɛ ata nkǝrɛ ala gɛ ɗǝngar mwala ni ba mawi kulɗa nam tǝ dzǝ ada dlǝrɛ, nam aka kǝr murfwɛ ba tǝmbǝlɛ kumɛ ni. 8 ^eMawi kulɗa ni, nam tǝ gǝ wula, watsi dzǝ adai, ama kulini dzǝ adi wɛ, ba dzǝ ata sǝba akwa Kau nam Dzǝgam ni ka mwari akwa vui santadzǝr ni. Ndzǝ nam ada ndzai akwa dunya ni nam kura thlǝma dar rǝbwa-rǝbwa akwa kakadǝr mpikɛ tǝng tǝ ndǝ hǝnti dunya dar ata ndatǝdzi sakatǝ dar wula mawi ni, kadǝbar watsi dzǝ adai, ama kulini dzǝ adi wɛ, ba wala ahani dzǝ ata si.

9 “Əni ada kǝga ɗǝnga nam aka bǝrkawakur. Kǝr murfwɛ ni ani gar yarɛ nam tǝ mwala ni ada ndzai ati. 10 Dar ani kuhyi murfwɛ tsuwɛ. Ntufu kǝ dlantadzi, pathlu ada ‘ya kuhyikur kulini, pathlari ta si kwataku wɛ; ama sakatǝ dzǝ si, kǝ ndzai ntsakǝr dzǝ ata ndzai nǝr saka nkyiɗǝ laka. 11 Mawi kulɗa nam watsi dzǝ adai, ama kulini dzǝ adi wɛ ni, dzǝ ani kuhyi nǝr ntsisukur. Dzǝ kǝ lǝkwa ntsa kuhyi murfwɛ yarni ba dzǝ ada mwari akwa vui santadzǝr ni.

12 ^f“Tǝmbǝl kumɛ tǝ gǝ wula ni ani kuhyi kumɛ nam kura ta dlutsi kuhyikur kwataku, ama auwur pathlu alǝkǝma dar ata dlutsi wada apa kuhyi yarɛ vwam kaka mawi kulɗa ni. 13 Dar aka ɗǝnga duku ka dar la dǝna ba wadar dar ala mawi kulɗa ni. 14 Dar ata ‘ya mpa ata kǝra Zǝr Agam ni, ama Zǝr Agam ni ata sǝmkǝr ata kǝra dar kadǝbar dzǝ dza Thlakǝr thlaku yarɛ ba Kuhyir kuhyi yarɛ—ba ata ndzai kaka dza ndzǝ nam tǝ dzǝ kǝgati, ba tsarba ba ndzǝ nam aka mbǝrsa ba ada nuwɛ aka dzǝrkur.”

15 Antǝ ndǝr hyantǝr Hyal ni ka nkǝrɛ alai, “Yimi yarɛ tǝ gǝ wula ni, vui nam tǝ zawar ni ada ndzai ati ni, ani ndzi yarɛ, dlamiyir ndzi, dai yarɛ, ba nya yarɛ. 16 Mawi kulɗa ni ba tǝmbǝl kumɛ tǝ gǝ wula ni ata ngǝla zawar ni. Dar ata ngunta tǝni ka ngyar tǝni anghyaɗu; dar ata ɗǝnya kumǝr ni ba mbanta tǝni aka u’u. 17 Akuya Hyal ani tara hau akwa ɗǝfa dar ka dar ‘yati sǝ nam tǝ dzǝ ada bara atar tǝ dar yiɗɛ ka la mawi kulɗa ni dǝnar dar nǝr ‘ya kuhyikur har si ma ndǝrǝr Hyal ghǝiyabadzi. 18 Mwala ǝni tǝ gǝ wula ni dzǝ ata vuiya mǝlmǝ ngga nam ada ‘ya kuhyikur ata kǝra kuhyir dunya yarni.”