‏ Revelation of John 18

Dlar Babila

1Aghǝla ǝni Yi wula ndǝr hyantǝr Hyal damwa atahyal ada sǝgǝl. Dzǝ aka wada nam ngga, ba dunya ka mbǝltǝdzi atar mbǝlǝr dzari. 2 ^aDzǝ ndǝri lǝlɛ aka dǝna:
“Dla! Dla ani Babila nam ngga!
Dzǝ kǝ ndzai kǝiyir mambǝl kulɗa yarɛ
ba vui mbur kǝlara mambǝl nam kulɗa,
vui mbwɛ ala kǝlara ika nam kura kǝtsǝkǝtsi ba kǝlara mawi nam kura kǝtsǝkǝtsi tǝ ndǝ ngǝla.
3 ^bAkuya sanga dai yarɛ kǝ ghǝi
tǝ mbalǝr dlangkur nǝr badawikurni.
Kuhyir dunya yarɛ kǝ ‘ya badawikur aka dza,
ba ndzǝr fǝli yarɛ nǝr dunya kǝ ‘ya bǝrba atar hangkur nga sǝɗar ndziyirni.”

4 ^cAntǝ Yi ka ngati kuɗahu damwa atahyal ada nkǝrɛ:
“Sǝbamɛ akwa dza, ndzǝrna,
kadǝbar ta gǝr ta ndǝghǝi bikǝrni yarɛ,
kadǝbar ta gǝr ta ɓui kǝlara kǝrikǝrni yarɛ;
5 ^dakuya bikǝrni yarɛ tsaɓtsǝnidzi dzǝgam alǝti atahyal,
ba Hyal ka ɗǝngati kulɗakur sǝr ‘yarni yarɛ.
6 ^eLaramɛ apa tǝ dzǝ tara la ndzi;
nkyintamɛ ka sǝɗɛ sǝkur sǝ nam tǝ dzǝ ‘ya.
Gwazǝtamɛ alari nǝbwarni ka sǝɗɛ akwa kapu nam tǝ dzǝ gwazɛ akwa.
7 ^fLaramɛ bwanai ba tuwa hang
apa nggakur ba nga sǝɗa nam tǝ dzǝ tara la kǝrni.
Dzǝ ‘ya agula yarɛ akwa ɗǝfari,
‘Yi ndzai apa kuhyimwala; Yi adi kuɗǝghum wɛ,
ba Yi adi ata saga sǝngǝl wɛ.’
8Akuya ka ǝni akwa vǝr duku kǝrikǝrni yarɛ ata ɗǝkǝr alari:
nti, ‘ya sǝngǝlɛ ba mi.
Dza ata mbantadzi tǝ u’u,
akuya Thlaku Hyal nam ngga ani ndǝr haka tǝni.

9 ^g“Sakatǝ Kuhyir dunya yarɛ nam tara ‘ya badawikur aka dza ba ɗar ndzaiyir nga sǝɗakur ni kǝ wula i’yarǝr mba tǝni, dar ata tuwa ba sǝngǝlɛ ata kǝrari. 10Bwaniyirni hau tǝ dar akwa hyivǝr, dar ata hyati pǝɗǝm abǝla ka tuwa:
“‘Bwasam! Bwasam, Gǝ nam mǝlmǝ nam ngga,
Gǝ nam Babila, mǝlmǝ nam aka dǝna!
Akwa auwur duku hakar Hyal si ata kǝra gɛ!’

11 ^h“Ndzǝr fǝli nǝr dunya ata tuwa ba sǝngǝlɛ ata kǝrari kadǝbar ndǝr ɗǝl kariyir dar tsu adi kǝra wɛ— 12 ⁱKariyir dinar, lipǝla, paya yarɛ nam tǝ ndǝ ada ɗǝl dzau; lilǝng nam ɗaku, kari dainau-dainau, ngǝlazar magza; aka kǝlara dzǝli fur sǝwur sǝɗa, ba kǝlara dzǝli su yarɛ nam tǝ ndǝ ‘ya aka hyira tsuwar, fwɛ tǝ ndǝ tsi kwapa hang akwa, ɗankyalbwa, yang ba paya ghǝyau; 13kariyir fur sinamaun ba yadzi, ba nǝr sǝ sǝwur sǝɗa, mǝr ba dzá fur lubana, yimǝr inabi ba malǝr zaitun, mpwɛ ndzǝɗa ba lǝkama; thla ba tǝma; taku yarɛ ba dǝrkuɓa yarɛ; dzá ndzi ba mambǝlǝr ndzi.

14“Dar ata nkǝrɛ, ‘Munyar fwɛ nam tǝ gǝ ada bara ni kǝ tǝra ka ngyar tǝngɛ. Sanga bǝrbakur ngɛ ba nggakur ngɛ kǝ santadzi, tsu awa ɓuidzi kǝra wɛ.’ 15 ^jNdzǝr fǝli nam tara ɗǝlti sǝ yarni ka ɓui gabakar dar akwa dzǝ ata hyati pǝɗǝm ta dza, kadǝbar dar ada hyivǝr ta dar ta lǝkwa bwaniyirni. Dar ata tuwa ba sǝngǝlɛ 16ba dar ndǝri lǝlɛ:
“‘Bwasam! Bwasam, gǝ nam mǝlmǝ nam ngga,
tara hadzɛ lilǝng nam ɗaku, kari yimǝr galura ba magza,
ba ada mbǝli aka dinar, paya yarɛ nam tǝ ndǝ ada ɗǝl dzau!
17 ^kAkwa awur duku sanga dzǝli gabaka ni santadzi!’

“Kǝlara thlakǝr dzǝlkǝiyir yimi yarɛ, ba sanga ndzǝr mwari akwa dzǝlkǝiyir yimi, ndzǝr ndal dzǝlkǝiyir yimi yarɛ, ba sanga ndzǝ nam ada ɓui sǝr sǝmǝr dar akwa manda ni, ata hyati pǝɗǝm abǝla. 18 ^lSakatǝ dar wula i’yar mba tǝni, dar tuwa aka dǝna, ‘Mǝlmɛ saga ‘ya adai apa mǝlmǝ ǝni ngga ni?’ 19 ^mDar ata pu bǝr-bǝr akwa kǝra dar, aka tuwa ba sǝngǝlɛ:
“‘Bwasam! Bwasam, gǝ nam mǝlmǝ nam ngga,
vui nam tǝ sanga ndzǝ nam aka dzǝlkǝiyir yimi yarɛ ata manda
kǝ ‘ya bǝrba atar gabakar ngɛ!
Akwa awur duku dzǝ santadzi!
20 ⁿ‘Yamɛ kutsari ata kǝrari, gǝ nam atahyal!
Kutsari, ndzǝr Hyal ba ndzǝr hya yarɛ ba nabi yarɛ!
Hyal ɓui tǝni aka aibai akuya sǝ nam tǝ dzǝ ‘ya ala gǝri.’”

21 ^oAntǝ ndǝr hyantǝr hyal nam ɓwal dzǝ kǝtǝ ɗantsǝka nam ngga apa burɛ ka ɗalu tǝni akwa manda ni, ka nkǝrɛ:
“Tsu aka dǝna
tǝ ndǝ ata ɗalghǝldzi Babila mǝlmǝ nam ngga ni,
ndǝ tsu awa ɓui tǝni kǝra wɛ.
22 ^{p q}Har ndzǝr tsa zǝmbǝlɛ yarɛ ba ndzǝr ha yarɛ, ndzǝr mbǝr sala ba ndzǝr mbǝr aligǝta yarɛ,
ndǝ tsu adi ata ngati kǝra akwa gǝ wɛ.
Ndzǝr kǝthlǝr ba ndzǝr fǝli
tsu awa ɓuidzi kǝra akwa gǝ wɛ.
Kuɗaha burhadlɛ
tsu awa ngatǝdzi kǝra akwa gǝ wɛ.
23Parakǝr pitǝla
tsu awa dzakti mbǝli akwa gǝ kǝra wɛ.
Kuɗaha sala kǝduwa aka kǝduwa
ndǝ tsu awa dzakti ngati akwa gǝ kǝra wɛ.
Ndzǝr fǝliyir ngɛ dar dza ngganggar dunya.
Atar ‘ya su mutǝmutǝkur ngɛ gǝ zǝlanta sanga ndzǝr dunya ni.
24 ^rNdǝ ɓui masǝr nabi yarɛ ba nǝr ndzǝr Hyal yarɛ akwa gɛ,
aka nǝr sanga ndzǝ nam tǝ ndǝ thlakǝr wuya akwa dunya.”