‏ Revelation of John 19

Hǝm Hyal!

1Aghǝla ǝni Yi ngati kuɗahu apa nǝr ndzǝ hang aka dǝna atahyal ada nkǝrɛ:
“Hǝm Hyal!
Mbatǝdzi ba nggakur ba dǝna kǝ ndzai nǝr Hyalǝr muri,
2 ^aakuya hakarni dzǝri ba kal-kal.
Dzǝ ɓui zawar nam ngga ni aka aibai
dzǝ dza tara sǝwati dunya atar badawikurni.
Dzǝ kǝ kyinta sǝkur masǝr madar kǝiyirni yarni.”

3 ^bBa dar dzakti haɓǝtǝ kuɗahu:
“Hǝm Hyal!
I’yar u’ur mba mwala ni mwari alǝti kura kurkuri.”

4Ndzǝ ngga-ngga sǝɗǝthlani kapu fwaɗu ba sǝ aka mpikɛ fwaɗu yarnda dla ka vǝkǝr sǝlai ala Hyal, dzǝ nam ada ndzai ata dǝgǝl kuhyikur. Ba dar nkǝrɛ:
“Apani, Hǝmɛ!”

5 ^cAntǝ kuɗahu ka sǝba akwa dǝgǝl kuhyikur ni, ada nkǝrɛ:
“Hǝmamɛ Hyalǝr muri,
sanga gǝri madar kǝiyirni,
gǝr nam ada hyivǝr tǝni, waza kaka ndzǝ ngga-ngga sang!”

6 ^dAntǝ Yi ngati kuɗahu apa dlamiyir ndzi, apa tuwar whuyir yimi yarɛ aka pǝral nam aka dǝna, ada lǝlɛ:
“Hǝm Hyal!
Akuya Hyal Thlakǝr muri nam Ɓwaltasang ada ‘ya kuhyikur.
7Ngyar ka mur kutsari ba ɗǝfu mwapu
ba ka mur lar nggakur!
Akuya kǝldzi nǝr Zǝr Agam ni kǝ si,
ba kǝduwa ni kǝ ɗǝmhǝ kǝrni.
8Lilǝng nam ɗa, ada mbǝli ba kǝtsǝkǝtsi,
tǝ ndǝ lari ka dzǝ hati.”

(Lilǝng nam ɗaku ni dzǝ ani kǝthlǝr yarɛ nam ɗa tǝ ndzǝr Hyal tara ‘ya.)

9 ^eAntǝ ndǝr hyantǝr Hyal ka nkǝrɛ alai, “Rǝbwai: ‘Kutsari aka ndzǝ nam tǝ ndǝ kǝga ka sǝr sǝmǝr kǝldzi nǝr Zǝr Agam ni!’” Ba dzǝ dzakti nkǝrɛ, “Əni yarni ani labar yarɛ nǝr Hyal nam dzǝri.”

10Antǝ Yi dla ata thlǝlari ka vǝkǝr sǝlai alari. Ama dzǝ nkǝrɛ alai, “Ta gǝ ta ‘ya sǝ ǝni! Yi zǝr kǝiyir Hyal apa gɛ kaka madar ma nam tara ngǝzi sǝ nam tǝ Yɛsu nkǝrnta. Vǝkǝr sǝlai ala Hyal! Akuya sǝ nam tǝ Yɛsu nkǝrɛ aka sǝ nam tǝ ndǝ nkǝrɛ ata kǝra ntǝrni ba hyati akwa ntǝntǝrni tsu ani labar nam tǝ mambǝl nam ɗaku tara hamnta atar nabi yarɛ.”

Ndǝr Dlǝr Taku ata Taku Mwapu

11 ^fYi wula atahyal mburntadzi ba akwanda akǝmawai taku mwapu, nam tǝ ndǝr dlǝr tǝni ndɛ ada kǝga tǝ Ndǝ aka Dzǝrkur ba Dzǝri. Aka kalkalkur tǝ dzǝ ada ‘ya haka aka mpa. 12 ^gNtsari yarɛ apa kanyara u’u, ba aliyapu yarɛ hang ata kǝrari. Dzǝ aka thlǝmɛ rǝbwa-rǝbwa ata dzari nam tǝ ndǝ tara zǝndi adi wɛ ama si dzǝ tǝ kǝrni. 13Dzǝ hadzǝ lǝkutu nam tǝ ndǝ ntsu akwa masi, ba thlǝmari ani Ndǝrǝr Hyal ni. 14Saudza yarɛ nam atahyal ada nu tǝni, tǝ dar ada dlǝr taku mwamwapu ba dar hadzǝ lilǝng nam ɗaku, mwapu ba kǝtsǝkǝtsi. 15 ^hAkwa nyari katsakar nam tsǝltsǝli ada sǝba nam tǝ dzǝ ata tsa sanga ndzǝr dunya akǝri. “Dzǝ ata ‘ya kuhyikur ata kǝra dar aka zuwar yang.” Dzǝ ata dlaɓwɛ aka thlǝlɛ sǝr ɓǝtsǝ yimǝr inabi ka ɓǝtsǝba sǝwa ɗǝfǝr Hyal nam Ɓwaltasang. 16Ata lǝkutǝrni ba ata bwangari dzǝ aka thlǝm ǝni rǝbwa-rǝbwa:

KUHYIR KUHYI YARƐ BA THLAKƏR THLAKU YARƐ.

17 ⁱBa Yi wula ndǝr hyantǝr Hyal ada hyati akwa tsǝtsi, nam tara lǝlɛ aka kuɗahu nam ngga ala sanga ika yarɛ nam ada ɗǝghǝti akwa sambar, “Azǝramɛ, tsaɓtsǝniyamǝdzi atakǝmaduku akuya sǝm sǝr sǝmǝr tǝhaku nam ngga nǝr Hyal, 18ani ka gǝr ɗǝ kumǝr dzá kuhyi yarɛ, ndzǝ katsalar mpa yarɛ, ba ndzǝ nam ɓwal-ɓwal, nǝr taku yarɛ ba ndzǝr dlǝr tǝ dar, ba kumǝr dzá sanga ndzi, kambɛ ba fali, ndzǝ nkyǝnkyiɗu ba ndzǝ ngga-ngga.”

19Antǝ Yi wula mawi ni ba kuhyi yarɛ nǝr dunya ba saudzar dar yarɛ tsaɓtsǝnidzi atakǝmaduku ka ‘ya mpa ata kǝra ndǝ nam ada dlǝr taku ni ba saudzarni. 20 ^jAma ndǝ ngǝti mawi kulɗa ni, ndǝ ka ɓui nabiyir hawi nam ada ‘ya parsu nǝr ndatǝdzi ata vuiyari. Aka sǝr ndati yarni dzǝ zǝlanta dzǝ nam tara dlutsi ntar mawi ni ba vǝkǝr sǝlai ala parni ni. Gyapa dar ndǝ pu tǝ dar ata mulɛ akwa mandar u’u nam ada mba aka kagǝlar barudu. 21Mambiya dar ndǝ tsai aka katsakar nam tara sǝba akwa nya ndǝr dlǝr taku ni, ba sanga ika yarɛ ghǝiyati kuta dar aka kumǝr dzá dar.