‏ Romans 1

1Kakadu ni hyati aka Bulusu, zǝr kǝiyir Yɛsu Kǝrsti, tǝ Hyal kǝga ka ndzai ndǝr hya ba tǝ dzǝ tsarba akuya ka nkǝr ndǝrǝr Hyal nam sǝɗa— 2ndǝrǝr Hyal nam sǝɗa tǝ dzǝ ‘ya alkawalari kabutu ata ‘ya, atar nabiyirni yarɛ akwa Labar Hyal. 3Nabi yarɛ ndǝrɛ ata kǝra Zǝr Hyal, nam tǝ dzǝ apa ndɛ dzǝ kulfǝr Dauda, 4ba atar Mambǝl Kartǝ nkǝrɛ aka dǝna apǝri dzǝ Zǝr Hyal ata nyar hyanti tǝni akwa ntǝnti: Yɛsu Kǝrsti Thlakǝr muri. 5Atarni ba akuya ata nyar thlǝmari, muri dlutsi ɗakur ba ndzǝr hyakur ka kǝga ndzi akwa ntsa sanga ndzǝ kura Yahudi ka dar ngandǝrɛ nam tara si atar hamnta dzǝri. 6Ba gǝr yɛ gǝr akwa ntsa ndzǝ nam tǝ Hyal kǝga ka dar ndzai nǝr Yɛsu Kǝrsti.

7Yi ada rǝbwa ala sanga ndzi akwa Rauma nam tǝ Hyal yiɗɛ ba kǝga ka dar ndzai ndzǝr Hyal.

Ka Hyal Tada ni ba Kǝrsti Yɛsu Thlakǝr muri la gǝri ɗakur Hyal ba ndzai lapiyakur.

Bulusu ada Bara Ka Dzǝ Mwara akwa Rauma

8Tangkǝma, Yi gwaditsǝni ala Hyalǝrna atar Yɛsu Kǝrsti akuya ka gǝri sang, kadǝbar ndzɛ ada ndǝrǝr hamnta dzǝrǝr gǝri akwa sanga kuta dunya. 9Hyal, ani sakǝidarna nam tǝ Yi ada ‘ya kǝthlǝr ni aka sanga ɗǝfawai akwa nkǝr ndǝrǝr Hyal nam sǝɗa nǝr Zǝrǝrni, apǝri kǝlara saka Yi ada ɗǝngati tǝ gǝri 10akwa aduwarna ata sanga saka yarɛ; ba Yi ‘ya aduwa apǝri kulini ata dǝnta aka yiɗǝr Hyal whalɛ mburntadzi alai ka Yi si adzǝ gǝri. 11Yi bara ka Yi wula tǝ gǝri ani ka Yi hau ala gǝri nakuma sǝgar mambǝlɛ ka mǝrti tǝ gǝri ɓaɓal— 12ani dza, apǝri gǝri ba Yi ata ɓui dǝnautsǝnidzi vwam tǝ hamnta dzǝrǝr kǝma muri. 13 ^aYi ada bara ka gǝri zǝndi, madar mama yarɛ, apǝri Yi ɗǝmhǝi ka hang ka Yi si adzǝ gǝri (ama ndǝ kanti alai ‘ya sǝ ǝnari si kulini) akuya ka Yi ɓui ndzǝr nu Kǝrsti akwa ntsa gǝri, tsu apa tǝ Yi ɓui akwa ntsa ndzǝ damwa nam kura Yahudi yarɛ.

14Yi aka su ata kǝrawai kǝ ndzai ntsakǝr tǝ Yi ata ‘ya ala ndzǝr Gǝriku gyapu aka ndzǝ kura Gǝriku yarɛ, ala ndzǝ bǝrkawa gyapu aka ndzǝ kura bǝrkawa yarɛ. 15Ani sǝ nam tara ‘ya tǝ Yi ada bara-bara ka Yi nkǝrɛ ndǝrǝr Hyal nam sǝɗa ala gǝri nam akwa Rauma yɛ.

16 ^bYi adi ada nga sǝlai akuya ka ndǝrǝr Hyal nam sǝɗa wɛ, kadǝbar ǝni ani dǝnar Hyal nam tǝ dzǝ ada kǝthlǝr akǝri ka mbatǝ kǝlara ndɛ nam tara mbǝrsa: tangkǝma ala ndzǝr Yahudi, aghǝla ǝni ala ndzǝ kura Yahudi. 17 ^cAkuya akwa ndǝrǝr Hyal nam sǝɗa Hyal tsanti kalkalkurni, kalkalkur nam tǝ dzǝ ada la ndɛ atar hamnta dzǝri, ba ɗiɗi atar hamnta dzǝri ndari, ata baditsǝni ka la dǝnta, tsu apa rǝbwa-rǝbwa: “Ndzǝ nam tǝ Hyal mǝrti tǝ dar kal-kal atar hamnta dzǝri dar ata ndzai atar hamnta dzǝri.”

Sǝwa Ɗǝfǝr Hyal ata Kǝra Ndzi

18Sǝwasǝwakur ɗǝfa Hyal tsantǝdzi atahyal ata kǝra sanga ndzai nam kura nǝr Hyalkur ba kǝmangarkur nǝr ndzǝ nam ada tsani dzǝrkur atar kǝmangarkur dar, 19tǝng tǝ sǝ nam tǝ ndɛ ata mǝzi ka zǝndi ata kǝra Hyal ata babal ala dar, kadǝbar Hyal mǝrti tǝni ata babal ala dar. 20Akuya tǝng tǝ Hyal mǝrti dunya, ndzaiyir Hyal nam kura ndɛ ada wula—dǝnarni nam kura kurkuri ba ndzaiyir Hyalkur ni—ndǝ kǝ wula ata babal, nam tǝ ndǝ zǝndi atar sǝ yar nam tǝ dzǝ mǝrti, ani ka ndzǝ adi aka sǝr vǝti nya wɛ.

21 ^dAkuya wala tǝ dar zǝndi Hyal, dar ta lari nggakur Hyalkur ni wɛ wala gwaditsǝni alari wɛ, ama dar ndzai dlang akwa ɗǝngar dar ba dar ta mǝzi ka zǝndi dlangkur nǝr ɗǝfa dar yarɛ wɛ. 22Wala ahani dar kǝtǝ apǝri dar bǝrkawa, dar kǝ ndzai dlang yarɛ 23 ^eba dar palti nggakur Hyal nam kura ada nti akuya dludzǝr sǝ yarɛ tǝ ndǝ mǝrti apa ndɛ nam ada nti ba ika yarɛ ba mawi yarɛ ba su yarɛ nam ada mwari tǝ kuta.

24Kadǝbar ǝni Hyal ngyar tǝ dar ka lǝkǝma akwa ‘ya biku nam tǝ ɗǝfa dar ada bara ‘ya baradzi nam kura kal-kal akuya ka sǝwati dza kǝma dar. 25Dar palti dzǝrkur Hyal aka hawi, ba dar vǝkǝr sǝlai ba kǝthlǝr ala sǝ yarɛ nam tǝ ndǝ dza hǝnɛ ata vuiya dzǝ nam tara mǝrti sanga su—dzǝ nam tǝ ndǝ ada hǝmɛ kura kurkuri. Apani.

26Kadǝbar ǝni, Hyal ngyar tǝ dar ala sǝr sǝlai nam tǝ dar ada bara. Wala mwahyir dar yarɛ ada palti mwardzǝr dar nam tǝ Hyal mǝrti aka nam kura Hyal dza mǝrti. 27Tsu akwa whal ǝni sǝli yɛ ngǝla mwardzi aka mwahyi nam tǝ Hyal mǝrti ba miyir dar ada hyati ka bara kǝma dar. Sǝli ada ‘ya su ghyǝmbur aka sǝli damwa, ba dar dlutsi aka kǝr dar haka nam kal-kal akuya thlamparkur dar.

28Kadamwa, tǝng tǝ dar ta ɗǝnga apǝri ɗaku ka dar ngǝzi zǝndi Hyal wɛ, dzǝ ngyar tǝ dar ala hankal kulɗakur dar, ba dzǝ ngyar tǝ dar ada ‘ya sǝ yarɛ nam kura kal-kal ka ndǝ ‘ya. 29Dar kǝ ndzai ghǝi-ghǝi aka kǝlara dzǝli kǝmangarkur, kulɗakur, lambwakur ba imaikur. Dar ghǝi-ghǝi aka sǝlku, tsa ndɛ, ɓwalnya, zǝla ndɛ ba mbǝla ndɛ. Dar ndzǝr gha ndɛ, 30ndzǝr gha su kulɗa ata kǝra ndɛ, ndzǝr ngǝla Hyal, kura sǝlaikur, kǝngkur ba agula; dar mǝrti whal yarɛ nǝr ‘ya kǝmangarkur; dar adi ada kǝlǝngkǝr ala ndzǝr yar dar wɛ; 31dar kura aka ɗǝnga, kura aka hamnta dzǝri, kura aka ɗǝfu, ba kura aka kǝtǝrdzi. 32Wala tǝ dar zǝndi hakar Hyal nam kal-kal apǝri ndzǝ nam ada ‘ya sǝ ǝni yarni dar ata nti, dar ta lǝkǝma aka ‘ya sǝ yarni ɗiɗi wɛ ama dar ada hǝmɛ ndzǝ nam ada ‘ya sǝ yarni ma.