‏ Romans 11

Mambiya Ndzǝr Izǝraila

1 ^aYi yuwɛ dzá, Hyal ngǝla ndzǝrni ya? Adi ata ‘ya wɛ! Yi tǝ kǝrna ma Yi ndǝr Izǝraila, kulfǝr Ibrahim, akwa dzǝliyir Bandzami. 2Hyal ta ngǝla ndzǝrni, nam tǝ dzǝ tsarba kǝmata tǝ dar awa ‘ya adai wɛ. Gǝr ta zǝndi apǝri Labar Hyal nkǝrɛ ata kǝra Iliya—whal nam tǝ dzǝ kákǝr Hyal ala ndzǝr Izǝraila: 3 ^b“Thlaku, dar dlǝnta nabiyir ngɛ yarɛ ba dar huzanta muɓur ngɛ yarɛ; Yi duku ɗiɗi ani tara mbi, ba dar ada bara ka dar tsi tǝra.” 4 ^cBa mi ani sǝnauwur Hyal alari? “Yi ɗǝwar ka kǝrna ndzǝ kumthlani kumɛ ka murfwɛ nam kura ta zǝɗi ala Ba’al.” 5Ani ahani, ata saka ǝni, mambiya ndzǝr Izǝraila adai tǝ Hyal tsarba tǝ ɗakurni. 6Ba ma tǝ ɗakur Hyal, antǝ adi tsu tǝ kǝthlǝr yarɛ kǝra wɛ; ma adi ahani wɛ, ɗakur Hyal adi ata ndzai ɗakur Hyal kǝra wɛ.

7Sǝr mi dzá? Sǝ nam tǝ Izǝraila bara aka ufti kura dzǝ ta ɓui, ama ndzǝ nam tǝ Hyal tsarba ni ɓui. Ndzǝ damwa yarni ɗǝfa dar ‘ya ɓaɓal, 8 ^dapa rǝbwa-rǝbwa:
“Hyal la dar hankal nam kura dar awa mǝzi ka ‘ya ɗǝnga nam kal-kal,
ntsɛ yarɛ nam kura dar awa mǝzi ka wula su
ba thlǝmɛ yarɛ nam kura dar awa mǝzi ka ngati su,
har ka la vǝrǝr asǝna.”

9 ^eBa Dauda nkǝrɛ:
“Ngyar ka ndǝ ngǝti tǝ dar ba dlǝkǝr kǝi ala dar sakatǝ dar akwa wudzǝr;
ka ndǝ la dar bwanai!
10Ngyar ka ntsa dar hartǝdzi ka dzǝ ndzai mǝngǝl kura awa wula su,
ba ka hǝiya dar ngaidzi kura kurkuri.”

Tsizu yarɛ nam tǝ ndǝ ntsǝntsǝti

11Yi yuwɛ kadamwa: Dar mbuthlǝl ni akuya ka dar dla kura hyati ya? Adi ahani wɛ! Ama, kadǝbar ka aibaiyir dar, Hyal si aka mbatǝdzi ala ndzǝ kura Yahudi ka hau Izǝraila akwa sǝlku. 12Ama ma aibaiyir dar si aka bǝrbakur ala dunya ni ba asarǝr dar si aka bǝrbakur ala ndzǝ kura Yahudi, mǝmi hang wurwurǝr bǝrbakur nam tǝ ma dar sang ata si akǝri!

13Yi ada ndǝrɛ ala gǝri ndzǝ kura Yahudi. Tǝng tǝ Yi dza ani ndǝr hya ala ndzǝ kura Yahudi, Yi ada la sǝlai ala kǝthlǝr Hyalǝrna 14akwa tǝmatsǝni apǝri Yi akwa whal laka nam awa hyanti ɗǝfa ndzǝrna ka dar sǝlku ba ka Yi mbatǝ nakuma dar. 15Akuya ma ngǝlar dar ani salautsǝnidzǝr dunya ni, mi tǝ dluwur dar ata ndzai ama ma adi si aka mpikɛ akwa ntǝnti wɛ? 16Ma palaiyir mpu hǝrhǝri nam tangkǝma tǝ ndǝ thlitsi ka hamnta ala Hyal apa munya nam tangkǝma ani nǝr Hyal, antǝ sanga mambiya mpu hǝrhǝri ni kǝ ndzai nǝr Hyal; ma ngǝyanga fu ni ani nǝr Hyal, ani ahani tsizuwurni yar yɛ.

17Ma nakuma tsizuwurni yarɛ ndǝ ɓǝgǝlnta, ba gǝri, wala tǝ gǝri fur zaitun nǝr ntaku, ndǝ ntsǝntsǝti tǝ gǝri akwa ntsa tsizu yarɛ damwa ba kulini gǝri ada ndǝghǝi sǝr sǝmǝr kuta fur zaitun ni, 18ta gǝ ta agula ata kǝra tsizu yarɛ ǝnda. Ma gǝ ‘ya, ɗǝnga ata kǝra ǝni: Gɛ tsizu ɗiɗi mai gɛ adi ngǝyang wɛ, ama ngǝyang ni ani ada ngǝzi tǝngɛ. 19Gǝ ata nkǝr dzá, “Tsizu yarni Hyal ɓǝgǝlnta ani ka dzǝ ntsi tǝra ata vuiyari.” 20Əni dzǝri. Ama Hyal ɓǝgǝlnta tǝ dar kadǝbar ka kura mbǝrsar dar, ba gɛ ada hyati aka hamnta dzǝri. Ta gǝ ta ndzai kǝngɛ, ama ka gǝ hyivǝr. 21Akuya ma Hyal ta ngyar tsizu yarɛ nam nǝr dza fu ni wɛ dza adi ata ngyar tǝngɛ gǝ yɛ wɛ.

22Ɗǝngati dza hankalkur ba dzaukur nǝr Hyal: dzaukur ala ndzǝ nam tara dla, ama hankalkur ala gɛ, ma apǝri gǝ lǝkǝma akwa hankalkurni. Ma adi ahani wɛ, gǝ yɛ Hyal ata dǝlnta tǝngɛ. 23Ba wala dar, ma dar ta lǝkǝma aka ndzai akwa kura mbǝrsa wɛ, Hyal ata ntsǝti tǝ dar, akuya Hyal mǝzi ka dzǝ ntsǝti tǝ dar kadamwa. 24Mǝnika, ma ndǝ dǝlnta tǝngɛ akwa dza fur zaitun nam nǝr ntaku, ba kura akwa whal nam kal-kal tǝ ndǝ ntsi tǝngɛ ata fur zaitun nam ɗaku, mǝmi hangkur butukur ǝni yarni nam tsizuwur dzari tǝ ndǝ awa ntsǝti alǝkwa kǝrtǝr dar ata fur zaitun nǝdar ni!

Sanga Ndzǝr Izǝraila ata Ɓui Mbatǝdzi

25Yi adi ada bara ka gǝri ndzai kura gǝr ta zǝndi dzǝri ɗǝwa-ɗǝwa ni wɛ, madar mama, ani ka ta gǝr ta ndzai ka ɗǝnga apǝri gǝr bǝrkawa: Izǝraila kǝ ɗar ɓaɓalkur ɗǝfu akwa palai tar ma sanga ndzǝ kura Yahudi si ka lǝkwa. 26 ^fBa akwa whal ǝni sanga ndzǝr Izǝraila ata ɓui mbatǝdzi, apa rǝbwa-rǝbwa:
“Ndǝr mbuli ndɛ ata si akwa Zayaun;
dza ata mbalnta kulfǝr Yakubu ta ndzai kura Hyalkur.
27 ^gBa ǝni ani sǝ nam mbwambwarna kaka dar
sakatǝ Yi kǝlnta bikǝr dar.”

28Tǝbwar ndǝrǝr Hyal nam sǝɗa ndzǝr Yahudi kǝ ndzai dǝgun aka Hyal ata nyar gǝri; ama tǝbwar tsarɛ nam tǝ Hyal ‘ya, Hyal yiɗǝ tǝ dar ata nyar kakár-kakár muri yarɛ, 29akuya Hyal adi ada ɓakta dlutsi sǝga yarɛ nam tǝ dzǝ la ndǝ wɛ wala ngǝla ndzǝ nam tǝ dzǝ tsarba wɛ. 30Akwa saka nam tara kwatsǝni gǝri nam ndzǝ kura Yahudi adi ada ngandǝrǝr Hyal wɛ, Hyal aka kǝtǝrdzi ala gǝri ata vuiya ǝnari kadǝbar ndzǝr Yahudi adi ada ngandǝrɛ wɛ, 31ani kulini ndzǝr Yahudi ni ani ndzǝ nam kura ada ngandǝrǝr Hyal, ani ka kǝtǝrdzi nam tǝ Hyal ‘ya ala gǝri dzǝ ata ‘ya ala dar yɛ. 32Akuya Hyal ngyar sanga ndzi ka dar ndzai kura ngandǝrɛ ani ka Hyal ‘ya kǝtǝrdzi ala dar sang.

Har hǝm Hyal

33 ^hMǝmi nggakur bǝrbakur Hyal ba bǝrkawakur ba zǝndi sǝrni!
Adi awa mǝzi ka ‘ya tǝ ndǝ laka awa ngaba ‘ya hakarni yarɛ,
ba whalǝrni yarɛ kwatsǝni tǝ ndɛ awa nuba!
34 ⁱ“Wa tara zǝndi hankala Thlaku ni?
kǝna wa ani ada gala tǝni?”
35 ^j“Wa tara saga la su ala Hyal,
nam tǝ Hyal awa nkyǝ tǝni kari?”
36 ^kAkuya akari ba atarni ba alari sanga sǝ yarɛ.
Nggakur ndzai alari kura kurkuri! Apani.