Romans 12
Sataka yarɛ Nam ata Mulɛ
1Kadǝbar ǝni, Yi kǝgyǝ tǝ gǝri, madar mama, atar kǝtǝrdzǝr Hyal, ka gǝr hamnta dza gǝri apa kǝdlǝrsu yarɛ nam ata mulɛ, alari ba ada panyi ɗǝfa Hyal—ǝni ani ‘ya vǝkǝr sǝlaiyir gǝri akwa mambǝlɛ. 2Ta gǝr ta nu sǝr ‘yar dunya ni, ama ka Hyal pali tǝ gǝri ka gǝr ndzai ndzǝ bǝlin atar pali whal nam tǝ gǝri ada ɗǝnga su. Antǝ gǝri ata zǝndi whal nam tǝ gǝri ata ‘ya sǝ nam tǝ Hyal ada bara ka gǝri ‘ya—sǝ nam ɗaku, ada panyi ɗǝfu ba kal-kal alari. 3Akuya atar ɗakur Hyal nam tǝ Dzǝ lai Yi ada nkǝrɛ ala kǝlara ndɛ akwa ntsa gǝri: Ta gǝ ta kǝtǝ nggakur kǝr ɓwalta kǝra gɛ, ama kudzǝ ka gǝ ‘ya ɗǝnga kal-kal ata kǝra kǝrngɛ, apa whal nam tǝ Hyal tara vi ka la gɛ akwa hamnta dzǝrǝr ngɛ. 4 aTsu apa tǝ kǝlara ndɛ akwa ntsa muri aka dzɛ duku aka palai yarɛ hang, ba palai yarɛ ni sang adi ada ‘ya su dzǝli duku wɛ, 5ani akwa Kǝrsti muri nam hang ni mur ‘ya dzɛ duku, ba kǝlara palai dzǝ nǝr palai yarɛ damwa ni. 6 bMuri aka sǝga yarɛ pam-pam, apa tǝ ɗakur Hyal tara la muri. Ma apǝri sǝgakur ndǝ laka ani nabikur, ngyar ka dzǝ ‘ya kǝthlǝr akǝri kal-kal aka hamnta dzǝrǝrni. 7Ma ‘ya kǝthlǝrǝr mbana, ngyar ka dzǝ ‘ya kǝthlǝr mbana; ma hyipɛ, ngyar ka dzǝ hyipɛ; 8ma dǝnautsǝni ndɛ, ngyar ka dzǝ dǝnautsǝni; ma hamnta su ka mbana ndzǝ damwa yarɛ, ngyar ka dzǝ hamnta kura aka whunɛ; ma ndzai ngga ata kǝra ndzi, ngyar ka dzǝ ‘ya kǝthlǝr kal-kal aka ufti; ma tsan kǝtǝrdzi, ngyar ka dzǝ ‘ya aka kutsari.Yiɗǝdzi
9Yiɗǝdzi kǝ ndzai ntsakǝr ka dzǝ ndzai aka ɗǝfu duku. Ka gǝ ngǝla sǝ nam kulɗa; ka gǝ ngǝzi sǝ nam ɗaku ɓaɓal. 10Hamntamɛ kǝr gǝri ala kǝma gǝri akwa yiɗǝdzi nǝr yar mamakur. Ka gǝri hǝmɛ kǝma gǝri ɓwalta kǝr gǝri. 11‘Yamɛ kǝthlǝr aka dǝna ba ta gǝr ta ndzai sǝrwai. Ka gǝri mau ‘ya kǝthlǝr ala Thlaku Hyal ni. 12Kutsariyamɛ akwa tǝmatsǝni, ‘yamɛ kǝmar akwa bwanai, lǝkǝmamɛ aka ‘ya aduwa tatang. 13Ka gǝri la su ala ndzǝr Hyal nam kura aka su. Ka gǝri mauwɛ dlu ndzǝr buraburá. 14 cKa gǝr vǝdzǝ barka ala ndzǝ nam ada tsanɛ ala gǝri bwanai; ka gǝr vǝkǝr barka ala su ta gǝr ta kǝl barkar su. 15Kutsariyamɛ kaka ndzǝ nam ada kutsari; tuwamɛ kaka ndzǝ nam ada tuwa. 16 dNdziyamɛ aka tamtamkur kaka kǝma gǝri. Ta gǝr ta agula, ama ka gǝr yiɗǝ kǝltsǝnidzi kaka ndzǝ nam kura ngga-ngga. Ta gǝri ta kǝtǝ apǝri gǝri bǝrkawa. 17Ta gǝr ta nkyǝ kulɗakur tǝ kulɗakur. Hankalamɛ ka gǝr ‘ya sǝ nam kal-kal akǝma kǝlara ndɛ. 18Ma apǝri awa mǝzi ka ‘ya, tǝbwar gǝri, ka gǝri ndzai lapiya aka kǝlara ndɛ. 19 eTa gǝri ta nkyǝ sǝkur, pazǝrna yarɛ, ama ngyar ka Hyal dza nkyǝ sǝkur, akuya rǝbwa-rǝbwa: “Nkyǝ sǝkur nana; Yi ata nkyinta,” Ndǝ Thlaku ni. 20 fPam ta ǝni:“Ma dawar ngɛ aka mi, lar ɗǝvɛ;
ma dzǝ aka thlǝlai, lar su ka dzǝ sa.
Akwa ‘ya ǝni, gɛ ata tsaɓtsǝni hahikǝr u’u ata kǝrari.” 21Ta kulɗakur ta ‘ya aka dǝna ata kǝra gǝri, ama ka gǝri ngǝmba kulɗakur tǝ ɗakur.
Copyright information for
CklSC