‏ Romans 15

1Mur nam aka dǝna akwa hamnta dzǝri ka mur mbana ndzǝ nam kura aka dǝna akwa hamnta dzǝri ba adi ka mur panyi ɗǝfa kǝr mur wɛ. 2Kǝlara ndɛ akwa ntsa muri ka dzǝ panyi ɗǝfa ntǝwhulǝrni akuya ka ɗakurni, ani ka ndǝ kǝlatǝ tǝni. 3 ^aAkuya wala Kǝrsti dzǝ ta panyi ɗǝfa kǝrni wɛ ama, apa rǝbwa-rǝbwa: “Ngǝngǝlɛ yarɛ ni nam tǝ ndǝ ngǝngǝl tǝ gǝri pukǝrdzi alai.” 4Akuya kǝlara sǝ nam tǝ ndǝ rǝbwai watsi ndǝ rǝbwai akuya ka hyipǝ su ala muri, ani ka atar ɓatǝsu ba dǝnautsǝnidzi nǝr Labar Hyal ni ka mur ‘ya aka tǝmatsǝni.

5Ka Hyal ni nam ada la ndǝ ɓatǝsu ba dǝnautsǝnidzi ka dzǝ la gǝri mambǝlɛ nǝr mbwai nya akwa ntsa gǝri apa tǝ gǝri ada nu Kǝrsti Yɛsu, 6ani ka aka ɗǝfu duku ba nya duku ka gǝri la nggakur ala Hyal ba Atǝgǝra Thlakǝr muri Yɛsu Kǝrsti ni.

7Dlutsamǝ kǝma gǝri, dza, tsu apa tǝ Kǝrsti dlutsi tǝ gǝri, akuya ka gǝri si aka hǝmɛ ala Hyal. 8Akuya Yi nkǝrɛ ala gǝri apǝri Kǝrsti ndzai zǝr kǝi ala ndzǝr Yahudi ata nyar dzǝrkurǝr Hyal, ka dzǝ ‘yati alkawal yarɛ nam tǝ Hyal ‘ya ala kakár-kakár dar yarɛ 9 ^bani ka ndzǝ kura Yahudi yarɛ ka dar la nggakur ala Hyal akuya ka kǝtǝrdzǝrni, apa rǝbwa-rǝbwa:
“Kadǝbar ǝni Yi ata hǝm tǝngɛ akwa ntsa ndzǝ kura Yahudi;
Yi ata ha ha yarɛ ala thlǝma gɛ.”

10 ^cKadamwa, dzǝ nkǝrɛ,
“Kutsari, Ndzǝ kura Yahudi, kaka ndzǝr Hyal.”

11 ^dBa kadamwa,
“Hǝmɛ mɛ Thlaku ni, sanga gǝri ndzǝ kura Yahudi yarɛ,
ba hamɛ ha yarɛ ka hǝm tǝni, sanga ndzi.”

12 ^eBa kadamwa, Isaya nkǝrɛ,
“Ngǝyanga Dzɛsi ni ata ntsi asǝba,
ndǝ pathlu nam ata hyati ka ‘ya kuhyikur ata kǝra mǝlmǝ yarɛ;
ndzǝ kura Yahudi yarɛ ni ata ‘ya aka tǝmatsǝni akwa dza.”

13Ka Hyal nǝr tǝmatsǝni ni ghǝiyati tǝ gǝri aka sanga kutsari ba ndzai lapiya apa tǝ gǝr hau mbǝrsa akwa dza, ani ka gǝr ghǝi aka tǝmatsǝni nam hang atar dǝnar Mambǝl Kartǝ ni.

Bulusu Ndǝr Kǝthlǝr Hyal ala Ndzǝ kura Yahudi

14Yi tǝ kǝrna Yi mbǝrsa, madar mana yarɛ, apǝri gǝr tǝ kǝr gǝri gǝr ghǝi-ghǝi aka ɗakur, gǝr zǝndi sǝ ǝni yarni kal-kal nam tǝ gǝri ata mǝzi ka tsǝlɛ ala kǝma gǝri ata kǝra dar. 15Yi rǝbwai ala gǝri ngga-ngga ata kǝra ndǝrɛ yar laka, apamá ka Yi ɗǝngati ala gǝri kadamwa, kadǝbar ka ɗakur Hyal nam tǝ dzǝ lai 16ka Yi ndzai ndǝr kǝthlǝr nǝr Kǝrsti Yɛsu ala ndzǝ kura Yahudi aka kǝthlǝr fǝrist nǝr nkǝr ndǝrǝr Hyal nam sǝɗa, ani ka ndzǝ kura Yahudi yarɛ ka dar ndzai sǝr hamnta nam tǝ Hyal ada dluwɛ, tǝ Mambǝl Kartǝ vi pam ala Hyal ɗiɗi.

17Kadǝbar ǝni Yi ada agula akwa Kǝrsti Yɛsu akwa ‘ya kǝthlǝrna ala Hyal. 18Yi adi ata tsǝkwa ndǝrɛ nǝr kǝlara su wɛ ɗiɗi sǝ nam tǝ Kǝrsti kurai atarna akwa pwar ndzǝ kura Yahudi ka kǝlǝngkǝr ala Hyal atar sǝ nam tǝ Yi nkǝrɛ ba ‘ya— 19atar dǝnar parsu yarɛ ba sǝr ndati yarɛ, atar dǝnar Mambǝlɛ. Ani baditsǝni ata Ursalima ka dlǝti whalɛ nam adai ka la Ilirikum, Yi nkǝrnta ndǝrǝr Hyal nam sǝɗa nǝr Kǝrsti ni sang. 20Kǝlara saka dzǝ kǝ ndzai sǝ nam tǝ Yi ada bara ka Yi nkǝr ndǝrǝr Hyal nam sǝɗa akwa vui nam kura dar ta zǝndi Kǝrsti, ani ka ta Yi ta tsa ata kǝra piyartsǝni garuwur ndǝ damwa. 21 ^fAma, apa rǝbwa-rǝbwa:
“Ndzǝ nam kura ndǝ ta gha ala dar ata kǝrari dar ata wula,
ba ndzǝ nam kura ta ngati dar ata ngaba.”

22 ^gƏni ani sǝ nam tara ‘ya ka hang kura Yi ta ɓui si adzǝ gǝri.

Ɗǝmhǝdzǝr Bulusu ka Mwari akwa Rauma

23Ama kulini nam tǝ vui tsu adi alai ka kǝthlǝr akwa kuri-kuri yarni wɛ, ba tǝng tǝ Yi ada bara ka Yi wula tǝ gǝri nǝr fá yarɛ hangkurari, 24Yi ɗǝmhǝi apǝri Yi ata wula tǝ gǝri sakatǝ Yi mwari akwa Sǝpɛn. Yi tǝmatsǝni apǝri Yi ata wula tǝ gǝri sakatǝ Yi ada kwatsǝni atǝra ba ka gǝr mbana tǝra akwa buraburarna atǝra akwanda, aghǝla tǝ Yi nga sǝɗar pwarǝr gǝri nǝr saka laka. 25 ^hAma kulini, Yi ata whalǝrna atǝra akwa Ursalima ka kǝthlǝr ala ndzǝr Hyal akwanda. 26Akuya ndzǝr Makidauniya ba Akaya dar ‘ya kutsari ka tsǝmti su ala ndzǝ nam ngudi akwa ntsa ndzǝr Hyal nam akwa Ursalima. 27 ⁱƊǝfa dar sǝɗa ka ‘ya sǝ ǝnda, dzǝri ndzai kimbǝl ala dar. Akuya ma ndzǝ kura Yahudi ɓui su akwa barkar mambǝlɛ nǝr ndzǝr Yahudi, kǝ ndzai ala dar kimbǝl ka dar la dar barkar kariyir dar nǝr kumǝr dzɛ. 28Ani aghǝla tǝ Yi kurai kǝthlǝr ǝni ba Yi wula apǝri dar dlutsi sǝ nam tǝ ndǝ tsǝmti ni, Yi ata tǝra akwa Sǝpɛn ba Yi ata wula tǝ gǝri ata whalari. 29Yi zǝndi apǝri sakatǝ Yi si adzǝ gǝri, Yi ata si aka barka nǝr Kǝrsti ghǝi-ghǝi.

30Yi kǝgyǝ tǝ gǝri, madar mama yarɛ, atar Thlakǝr muri Yɛsu Kǝrsti ba yiɗǝdzǝr Mambǝl ni, ka gǝr vǝdzǝdzi alai akwa bǝbǝkǝi atar ‘ya aduwa ala Hyal akuya ka yɛ. 31‘Yamɛ aduwa apǝri ka ndǝ mbuli tǝra akwa tsiya ndzǝ nam kura aka mbǝrsa yarɛ ni nam akwa Yahudiya ba apǝri kǝthlǝrǝrna akwa Ursalima ka ndzǝr Hyal akwanda dlutsi, 32ani ka atar yiɗǝr Hyal ka Yi si adzǝ gǝri aka kutsari ba ka mur ghǝrbadzi atakǝmaduku kaka gǝri. 33Hyalǝr ndzai lapiya ni ka dzǝ ndzai kaka gǝri sang. Apani.