Rom 5 | CklSC | STEP | Kadǝbar ǝni, tǝng tǝ Hyal mǝrti tǝ muri kal-kal atar hamnta dzǝri, muri ɓui ndzai lapiyakur aka Hyal atar Thlakǝr muri Yɛsu Kǝrsti,

‏ Romans 5

Ndzai Lapiyakur ba Kutsari

1 Kadǝbar ǝni, tǝng tǝ Hyal mǝrti tǝ muri kal-kal atar hamnta dzǝri, muri ɓui ndzai lapiyakur aka Hyal atar Thlakǝr muri Yɛsu Kǝrsti, 2 atar dzǝ nam tǝ muri ɓui whalɛ atar hamnta dzǝri alǝkwa ɗakur ǝni nam tǝ muri kulini ada hyati ati. Ba muri ada kutsari akwa tǝmatsǝni nǝr nggakur Hyal. 3 Adi ɗiɗi ahani wɛ, ama tsuwɛ muri ada kutsari akwa bwanaiyir muri yarɛ, kadǝbar muri zǝndi apǝri bwanai ada si aka ɓatǝsu; 4 ɓatǝsu ada si aka hal nam ɗa, ba hal nam ɗa ada si aka tǝmatsǝni. 5 Ba tǝmatsǝni adi ada hau tǝ muri akwa sǝlai wɛ, kadǝbar Hyal kǝ pu yiɗǝdzǝrni alǝkwa ɗǝfa muri atar Mambǝl Kartǝ, nam tǝ dzǝ tara la muri.

6 Gǝri wula, ata saka nam kal-kal, sakatǝ tǝ muri tsu kura aka dǝna Kǝrsti nti akuya ndzǝ kura ada ndzai nǝr Hyalkur. 7 Adi kǝsǝkai tǝ ndǝ laka awa nti akuya ka ndǝ nam kal-kal wɛ, wala ahani akuya ka ndǝ nam ɗaku ndǝ laka bisu ata kasatsǝni ka nti. 8 Ama Hyal tsanti yiɗǝdzǝrni ala muri akwa ǝni: sakatǝ mur tsu ndzǝr biku, Kǝrsti nti akuya ka muri.

9 Tǝng tǝ muri kǝ ndzai kal-kal akǝma Hyal kulini atar masǝr Kǝrsti, mǝmi hangkur tǝ muri ata ɓui mbatǝdzi ta ɗǝfǝr Hyal atarni! 10 Akuya ma, sakatǝ muri dawar Hyal, mur ɓui salautsǝnidzi atar ntǝr Zǝrǝrni ni, mǝmi hangkur, aghǝla tǝ muri ɓui salautsǝnidzi, tǝ muri ata ɓui mbatǝdzi atar mpikari! 11 Sǝni adi ɗiɗi ahani wɛ, ama muri ada kutsari yɛ akwa Hyal atar Thlakǝr muri Yɛsu Kǝrsti, atarni nam tǝ muri ɓui salautsǝnidzi.

Nti atar Adambu, Mpikɛ atar Kǝrsti

12 ^aKadǝbar ǝni, tsu apa tǝ biku si akwa dunya atar ndǝ duku, ba nti atar biku, ba akwa whal ǝni nti si ala sanga ndzi, kadǝbar sanga ndzi ‘ya biku— 13 akuya kǝmata Hyal awa hamnta mabariyir Musa, biku adai akwa dunya. Ama Hyal adi ada tsǝ biku saka kura mabari adai ni wɛ. 14 Ama tsu, nti aka dǝna ata kǝra sanga ndzi sakar Adambu har ka la sakar Musa, wala ata kǝra ndzǝ nam kura ta ‘ya bikǝr ɓǝlnta tsau, apa tǝ Adambu ‘ya, dzǝ nam tara ndzai sǝ tǝ ndɛ ata nkǝrti aka ndǝ nam ata si ni.

15 Ama sǝga ni adi apa bikǝr Adambu ni wɛ. Akuya ma ndzǝ hang nti atar bikǝr ndǝ duku ni, mǝmi hangkur ndzǝ nam tǝ ɗakur Hyal ba sǝga ni nam tara si atar ɗakur ndǝ duku ni, Yɛsu Kǝrsti, nam hang ada pukǝrdzi ala ndzǝ hang! 16 Kadamwa, sǝgar Hyal ni adi apa wadzǝɓar bikǝr ndǝ duku ni wɛ: haka ni nu biku duku ba dzǝ ka si aka thla haka, ama sǝga ni nu biku yarɛ hang ba dzǝ ka si aka ndzai kalkalkur. 17 Akuya ma, atar bikǝr ndǝ duku ni, nti ndzai atar ndǝ nda duku ni, mǝmi hangkur tǝ ndzǝ nam tara dlutsi whal ɗakur Hyal nam hang ba nǝr sǝgar kalkalkur ata ndzai akwa mpikɛ atar ndǝ duku ni Yɛsu Kǝrsti.

18 Ani dza, tsu apa tǝ wadzǝɓar biku duku thlakǝr haka ala ndzǝ sang, tsu ahani wadzǝɓar kǝthlǝrǝr kalkalkur duku ‘ya sǝr mǝrti ndzai kalkalkur nam tara si aka mpikɛ ala sanga ndzi. 19 Akuya tsu apa atar kura ngandǝrkur nǝr ndǝ duku ni ndzǝ hang ndzai ndzǝr biku, ani tsuwɛ atar ngandǝrǝr ndǝ duku ni ndzǝ hang ata ndzai kal-kal.

20 Hyal la mabariyirni ala Musa ani ka ndzǝ zǝndi hangkur biku nam tǝ dar ‘yati. Ama apa tǝ ndzǝ ada ‘ya biku hang, ɗakur Hyal ada dzagǝi ‘ya hang, 21 ani ka tsu apa tǝ biku ndzai aka dǝna kadǝbar tǝ sanga ndzi ata nti, ani tsuwɛ whal nam tǝ Hyal ada tsanti ɗakurni ndzai aka dǝna kadǝbar dzǝ mǝrti ndzi ka ndzai kal-kal ala kǝrni. Ka si aka mpikǝ nam kura kurkuri atar Yɛsu Kǝrsti Thlakǝr muri.